Fransa Azərbaycanın ən yaxın tərəfdaşına çevrilib

Bakı:

13°C

76%

12m/s

Əlaqə

AZ RU EN

Ana səhifə / Siyasət / Fransa Azərbaycanın ən yaxın tərəfdaşına çevrilib

Fransa Azərbaycanın ən yaxın tərəfdaşına çevrilib

26.11.2009 [09:34]

Bu ölkə respublikamızla ticarət dövriyyəsinin həcminə görə, Avropa Birliyinə üzv dövlətlər sırasında ikinci yeri tutur
Avropanın ən inkişaf etmiş dövlətlərindən olan Fransa ilə Azərbaycan arasında siyasi-iqtisadi, mədəni-humanitar və digər sahələrdə münasibətlər möhkəmlənərək ən yeni inkişaf mərhələsinə qədəm qoyub. Azərbaycan-Fransa siyasi-iqtisadi əlaqələrinin inkişafında dövlət başçılarının qarşılıqlı səfərləri ilə yanaşı, ölkələr arasında yaradılmış hökumətlərarası komissiyanın fəaliyyəti də mühüm rol oynamaqdadır. 1997-ci ildə yaradılan komissiyanın indiyədək keçirilmiş bir neçə iclasında tərəflər arasında iqtisadiyyatın müxtəlif sahələrində əməkdaşlığın əlaqələndirilməsi, təşviqi və yeni sahələr üzrə əməkdaşlığın yaradılması ilə bağlı mühüm qərarlar qəbul edilib.
Azərbaycan və Fransa arasında investisiyaların qarşılıqlı təşviqi və qorunması, ikiqat vergiqoymanın aradan qaldırılması ilə bağlı sazişlər imzalanıb ki, bu da sərmayədarların axını üçün geniş imkanlar yaradıb. ümumilikdə, həm hökumətlərarası komissiyanın, həm də iş adamları arasında birbaşa təmasların nəticəsi olaraq ölkələr arasında ticarət dövriyyəsinin həcmi əhəmiyyətli dərəcədə yüksəlib. Hazırda ölkələr arasında mal mübadiləsinin həcmi 700 milyon dollara çatıb. Fransa Azərbaycanla ticarət dövriyyəsinin həcminə görə, Avropa Birliyi ölkələri sırasında ikinci yeri tutur. Hazırda Azərbaycanda müxtəlif sahələrdə Fransa kapitalı olan 45 şirkət fəaliyyət göstərir.
Əməkdaşlığın yeni mərhələyə qədəm qoyması Fransa şirkətlərinin Azərbaycan iqtisadiyyatında çəkisinin hər il artmasına səbəb olub və bu ölkə respublikamıza yatırılan sərmayələrin həcminə görə 4-cü yerdə qərarlaşıb. Neft və qaz sahəsində fəaliyyət göstərən fransız şirkətlərindən “Total” (“TotalFinaElf”) indiyədək imzalanmış neft müqavilələrinin 3-ündə pay sahibidir və şirkət Bakı-Tbilisi-Ceyhan və Bakı-Tbilisi-Ərzurum layihələrində səhmdarlar qrupunda yer alıb. “Total” “Şahdəniz” layihəsində də böyük paya malikdir. 10 faizlik paya sahib olan səhmdar bununla kifayətlənməyərək yeni karbohidrogen yataqlarının geoloji kəşfiyyatı və hasilatı ilə bağlı işləri davam etdirir.
Fransa ilə Azərbaycan arasında iqtisadi əməkdaşlığın intensiv xarakter almasında və dinamizmin möhkəmlənməsində bu ölkənin ən nəhəng təşkilatı olan Fransa Sahibkarlar Birliyinin (MEDEF) apardığı siyasətin təsiri xüsusilə böyükdür və bu qurum Avropada ictimai və iqtisadi çəkisinə görə ən iri strukturlardan hesab olunur. Fransanın ən iri şirkətlərini özündə birləşdirən MEDEF regionda ən iri layihələrin həyata keçirilməsində lokomotiv rolunu oynayır. 700 mindən artıq fransız şirkətinin cəmləşdiyi bu qurumun nümayəndələrinin respublikamıza səfərləri mütəmadi xarakter alıb və bir müddət əvvəl ölkəmizə səfər edən MEDEF-in nümayəndə heyətinin rəhbəri, xanım Paskal Janin Perezi Prezident İlham Əliyev qəbul edib. Paskal Janin Perez dövlətimizin başçısı ilə aparılan müzakirələr zamanı bir daha bəyan edib ki, Fransa şirkətlərinin respublikamıza olan marağı böyükdür və onlar enerji, nəqliyyat, bank xidmətləri, sənaye, kənd təsərrüfatı və digər sahələrdə əməkdaşlığı möhkəmləndirmək istəyirlər.
MEDEF-in təşkilatçılığı nəticəsində fransız şirkətlərinin ölkəmizdə fəallığı bir qədər də yüksəlib. Dövlət Neft Şirkəti ilə “BNP Paribas” sindikatı arasında 750 milyon dollar məbləğində kredit sazişi imzalanıb. Bankın digər böyük layihəsi Sumqayıtdakı yeni inşa olunan İstilik Elektrik Stansiyasının tikintisinin maliyyələşdirilməsini nəzərdə tutur. Fransanın “BNV Paribas” bankı bu gün istər neft, istərsə də nəqliyyat-infrastruktur layihələrinin maliyyələşdirilməsində ən fəal iştirak edən qurumdur. “BNP Paribas” Bakıdan Gürcüstan sərhəddinədək uzanan magistral avtomobil yolunun tikintisinin maliyyələşdirilməsində və su təchizatının yaxşılaşdırılması, kommunikasiya sisteminin yenidən qurulması, meliorasiya təsərrüfatının əsaslı şəkildə bərpası layihələrində iştirak edir. Fransanın digər maliyyə institutu olan “Societe Generale” bankı da Azərbaycanda investisiya imkanlarını genişləndirmək niyyətindədir. Bank neft sektoru ilə bərabər enerji, maliyyə və qeyri-neft sektoruna kredit qoyuluşunu artırmaq barədə qərara gəlib. “Societe Generale” Dövlət Neft Şirkətinin Bakı-Tbilisi-Ceyhan neft kəmərinin tikintisindəki payını da maliyyələşdirib. Bank bu məqsədlə 65 milyon dollar kredit ayırıb. Bundan əlavə, Sumqayıtdakı buxar-qaz qurğusunun tikintisinə 30 milyon dollardan çox vəsait yönəldilib. Hazırda fransız bankının maliyyələşdirmək istədiyi iki layihə özəl sektorda istehsal və xidmət sahələrini əhatə edir. ümumilikdə, “Societe Generale”nin strategiyası Azərbaycanda sahibkarlığın inkişaf etdirilməsini nəzərdə tutan layihələrdən ibarətdir. Bundan başqa, Fransanın Avropada zirehli maşınların istehsalına görə fərqlənən “PARNARD DEFENSE” şirkəti ölkəmizdə hərbi sənaye kompleksi üçün texnikaların hazırlanmasını təklif edir.
Fransa həmişə birmənalı şəkildə Azərbaycanın ərazi bütövlüyünü dəstəklədiyini və ərazilərin güc yolu ilə dəyişdirilməsinin mümkünsüzlüyünü bəyan edib. Minsk qrupunun həmsədrlərindən biri kimi Fransa Dağlıq Qarabağ münaqişəsinin Azərbaycanın ərazi bütövlüyü çərçivəsində sülh yolu ilə həll olunacağına əminliyini ifadə edib.
ELBRUS CƏFƏRLİ

Paylaş:

Baxılıb: 984 dəfə