“Epidemioloji fəlakət”in yaşandığı Ermənistanda səhiyyə sistemi çöküb

Bakı:

16 °C

94 %

3 m/s

Əlaqə

AZ RU EN

Ana səhifə / Siyasət / “Epidemioloji fəlakət”in yaşandığı Ermənistanda səhiyyə sistemi çöküb

“Epidemioloji fəlakət”in yaşandığı Ermənistanda səhiyyə sistemi çöküb

12.06.2020 [09:12]

Rusiya mediası işğalçı ölkədə Paşinyan hakimiyyətinin səriştəsizliyi ucbatından koronavirus pandemiyasının ağır fəsadlar törətməsindən yazır
Sosial-iqtisadi tənəzzülün müşahidə edildiyi işğalçı Ermənistanda pandemiyanın yaratdığı problemlərin də həllində acizlik nümayiş etdirən Paşinyan hakimiyyətinin yarıtmaz fəaliyyəti durumu daha da ağırlaşdırıb. Artıq bir çox xarici ölkə mətbuatında, o cümlədən Rusiya mediasında koronavirus pandemiyasının Ermənistanda ağır fəsadlar törətməsi, hakimiyyətin səriştəsizliyi ucbatından ölkə səhiyyəsinin bu problemə qarşı mübarizədə “məğlub olması”, bu ölkəni fəlakət gözlədiyi barədə çoxsaylı məqalələrə rast gəlinir.
Məsələn, 11 iyun tarixində Rusiyanın aparıcı xəbər portallarından olan “lenta.ru” saytında “Cəhənnəmə addımlayırıq” adlı yazıda qeyd edilir ki, Ermənistanın koronavirus infeksiyası (COVID-19) ilə mübarizədə “məğlub olan” dövlətlər siyahısına düşmək üçün bütün şanslara malikdir. Belə ki, ölkədə xəstəliyə yoluxma nisbətində yenidən “partlayış” səviyyəsində artım müşahidə olunur, ağır vəziyyətdə olan xəstələrin nisbəti kəskin şəkildə çoxalıb və səhiyyə sisteminin ehtiyatları tükənməkdədir.
“Lenta.ru”nun məqaləsində daha sonra vurğulanır ki, Ermənistanın epidemiyanın “ikinci dalğası” ilə qarşı-qarşıya olduğu artıq gizli saxlanacaq məsələ deyil. Ötən çərşənbə günü baş nazir Nikol Paşinyan “Facebook”da canlı yayım zamanı vətəndaşları yeni xəbərlərlə şoka saldı: ölkədə “epidemioloji fəlakət” mövcuddur və o, bütün ailəsi ilə birlikdə COVID-19-a yoluxub.
Yeri gəlmişkən, Paşinyanın koronavirusa yoluxmasına inanmayanlar da çox olub. Belə ki, bu xəbər elan edildikdən sonra hökumətdəki fəaliyyətini daha da aktivləşdirən Paşinyanın xəstəliyi ayaqda keçirmə və sağalma kimi “unikal örnək” nümayiş etdirməsi şübhə ilə qarşılanıb.
Məqalədə daha sonra qeyd olunur ki, hakimiyyət dərhal vəziyyətin pisləşməsində vətəndaşları günahlandırıb - Paşinyan insanların İrəvandakı təhlükəsizlik tədbirlərinə kütləvi şəkildə məhəl qoymadığını bildirib.
Portalın yazısında o da vurğulanır ki, əsas məsuliyyət Paşinyan hökumətinin üzərindədir. Belə ki, hakimiyyətdəkilər əvvəlcə əlaqələndirilmiş şəkildə koronavirus təhlükəsini rədd etdilər və onu zarafata çevirməyə çalışdılar. Hətta səhiyyə naziri Arsen Torosyan ÜST-ün rəsmi məlumatlarına birbaşa zidd olan açıqlamalarını davam etdirərək 14 apreldə təkrarladı ki, koronavirus xüsusi təhlükəli bir infeksiya deyil. A.Torosyan təkcə sözlə deyil, əməllə də fərqlənib. Mayın 7-də, gündüz vaxtı səhiyyə nazirinin bir kafedə maska və ya qoruyucu vasitə olmadan naməlum insanlarla görüşdüyü anın fotosu çəkilib. Baş nazirin özü də vətəndaşlara pis nümunə göstərib. Məsələn, birbaşa yayımların birində o, koronavirusa simptomsuz yoluxmanın “təbii peyvənd”ə bərabər olduğunu iddia edib və özünün də bu mərhələdən keçməyi arzuladığını söyləyib.
Materialda belə bir fikirə yer verilir ki, ölkədə sərt məhdudiyyətlər tətbiq etməyin ilk cəhdində sosial və iqtisadi vəziyyətdən narazı insanların etiraz aksiyaları başlayıb. Buna görə də erməni cəmiyyətinin və iqtisadiyyatının “ikinci dalğa”dan sağ çıxa biləcəyi böyük sual altındadır.
Yazının sonunda deyilir ki, hakimiyyət xalqı, xalq isə hakimiyyəti günahlandırır, amma bu, real mənzərəni dəyişmir. Hər iki tərəf günahkardır və hər ikisi, heç olmasa, səhvlərini etiraf etmək, düzəltməyə çalışmaq istəmir. Bununla yanaşı, hər gün aparılan koronavirus testlərinin 30-40 faizi müsbət çıxır. Bu rəqəmlər, yoluxanların əhalinin say nisbətində böyük payının olduğunu və ölkədə səhiyyə sisteminin çökməsini göstərir.
Qaşqay ZİYƏDDİNOĞLU

Paylaş:

Baxılıb: 411 dəfə