Əlisahib Hüseynov: Verilən qərarlar ölkədə vətəndaş-dövlət birliyini, milli həmrəyliyi daha da gücləndirəcək

Bakı:

28 °C

59 %

9 m/s

AZ RU EN

Ana səhifə / Siyasət / Əlisahib Hüseynov: Verilən qərarlar ölkədə vətəndaş-dövlət birliyini, milli həmrəyliyi daha da gücləndirəcək

Əlisahib Hüseynov: Verilən qərarlar ölkədə vətəndaş-dövlət birliyini, milli həmrəyliyi daha da gücləndirəcək

17.12.2020 [09:12]

“Dövlətimizin başçısı İlham Əliyevin imzaladığı sərəncamlara əsasən 27 sentyabrın Anım Günü, 8 noyabrın isə Zəfər Günü elan edilməsi 44 günlük müharibənin xalqımızın taleyindəki önəmli rolunu qabarıq şəkildə göstərir. Bu qərarları cəmiyyət olaraq hamımız gözləyirdik. Çünki xalq olaraq, cəmiyyət olaraq ölkəmizin ərazi bütövlüyü uğrunda Vətən müharibəsində canlarından keçmiş şəhidlərimizi anmaq və onların unudulmaması üçün xatirələrini əbədiləşdirmək hamımızın mənəvi borcudur. Həmçinin təqvimimizdə Zəfər Gününün olması da tamamilə təbiidir. Qarabağın incisi Şuşa şəhərinin iyirmi səkkiz illik əsarətdən sonra işğaldan azad edilməsinin tarixi əhəmiyyəti nəzərə alınaraq xalqımızın döyüş əzminin və qüdrətinin təntənəsinə çevrilən, dövlətimizin gələcək inkişafı və nüfuzu baxımından müstəsna əhəmiyyət kəsb edən bu misilsiz qələbə - Zəfər Günü hər il noyabrın 8-də qeyd ediləcək”.
Bu fikirləri “Yeni Azərbaycan” qəzetinə açıqlamasında Milli Həmrəylik Partiyasının (MHP) sədri Əlisahib Hüseynov deyib.
Ə.Hüseynov bildirib ki, Anım Günü və Zəfər Gününün hər il ümummilli səviyyədə qeyd edilməsi xalqımızın ruhunu daim yüksək saxlamağa, gənclərimizdə vətənpərvərlik hislərinin formalaşmasına və milli yaddaşın güclənməsinə yardımçı olacaq. Onun sözlərinə görə, verilən qərarlar ölkədə vətəndaş-dövlət birliyini, milli həmrəyliyi daha da gücləndirəcək: “Bu 44 gündə milli həmrəyliyimiz ən yüksək səviyyədə təzahür etdi. Vətən müharibəsində ölkəmizin fərqli siyasi mövqeyə, fərqli ideoloji yönə malik olan siyasi qüvvələri konsensus nümayiş etdirdilər, Ordumuzun və Ali Baş Komandanımızın ətrafında birləşdilər. Orduya könüllü yazılanların, ön cəbhəyə, döyüşə can atan vətəndaşlarımızın sayı son dərəcə çox idi. Azərbaycandan fərqli olaraq həmin vaxt Ermənistan ordusunda canlı qüvvə çatışmadığına görə yaşlıları və 14-15 yaşlı yeniyetmələri də məcburi səfərbərliyə cəlb edirdilər. Eyni zamanda, Ermənistan ordusunda fərarilik baş alıb gedirdi. Ali Baş Komandanımızın mətin iradəsinə güvənən və xalqdan güc alan müzəffər Azərbaycan Ordusu isə 44 günlük İkinci Qarabağ müharibəsinin gedişində qazandığı mövqelərdən bir addım da geri çəkilmədi. Ordumuzun döyüş ruhu o qədər yüksək idi ki, hətta yaralanan hərbçilərimiz də yenidən döyüşə can atırdılar. Bunu düşmən tərəfin generalları və siyasətçiləri də etiraf edirlər. Bax budur azərbaycanlının mənfur düşməndən fərqi, budur Azərbaycandakı milli birliyin gücü! Xalq-Ali Baş Komandan-Ordu birliyi, həqiqətən də, böyük xariqələr yaratdı. Cənab Prezidentin təbirincə desək, biz bu 44 gündə düşmənin başını əzən dəmir yumruğa çevrilməyi bacardıq”.
N.BAYRAMLI

Paylaş:

Baxılıb: 555 dəfə