Əli Kərimli sosial şəbəkələrdə anti-Azərbaycan dairələrin təbliğatçısı kimi...

Bakı:

28 °C

53 %

6 m/s

Əlaqə

AZ RU EN

Ana səhifə / Siyasət / Əli Kərimli sosial şəbəkələrdə anti-Azərbaycan dairələrin təbliğatçısı kimi...

Əli Kərimli sosial şəbəkələrdə anti-Azərbaycan dairələrin təbliğatçısı kimi...

14.08.2021 [00:19]

2020-ci ilin noyabrın 10-da üçtərəfli Bəyanatın imzalanmasının, Azərbaycanın qələbəsinin rəsmiləşməsinin, Ermənistanın kapitulyasiyasının ardınca sosial şəbəkələrdə çirkin təbliğat apararaq qələbəmizin əhəmiyyətini azaltmağa çalışan AXCP sədri Əli Kərimli yenidən iş başındadır. Belə ki, özünü radikal düşərgənin “başbilən”i hesab edən AXCP sədri münaqişənin tarixdə qalmasını, Azərbaycanın torpaqlarını işğaldan azad edərək öz ərazi bütövlüyünü bərpa etməsini sindirə bilmir. Təbii ki, Əli Kərimlinin 44 günlük Vətən müharibəsində əldə etdiyimiz Zəfərə kölgə salmaq üçün göstərdiyi cəhdlərin anti-Azərbaycan dairələrin sifarişi ilə edildiyi gün kimi aydındır. Digər tərəfdən, indiki həssas məqamda AXCP sədrinin erməni tezislərinə əsaslanaraq belə bir çirkin təbliğat qurmaq arzusu onun anti-Azərbaycan dairələrdən qidalandığını da bir daha üzə çıxarır.

Məsələ ilə bağlı fikirlərini bölüşən Milli Məclisin deputatı Kamilə Əliyeva bildirib ki, radikal müxalifətin Azərbaycan dövlətinə qarşı apardığı cılız kampaniyalar fiaskoya məhkumdur. Millət vəkili özünü “müxalifət” adlandıran, amma “beşinci kolon” funksiyasını yerinə yetirən dağıdıcı ünsürlərin ermənipərəst mərkəzlərin sifarişi ilə Azərbaycan dövlətinə qarşı qara piar kampaniyası apardıqlarını diqqətə çatdırıb: “Radikal müxalifət sosial şəbəkələrdə erməni maraqlarını müdafiə etməklə məşğuldur. Diqqət yetirsək, görərik ki, hətta ermənilərin 44 günlük müharibə və onun nəticələri ilə bağlı aylardır sosial şəbəkələrdə yaymağa çalışdıqları dezinformasiyaların mahiyyəti onların iddiaları ilə mütləq şəkildə uzlaşır. Bu, bir daha onların dövlət, xalq maraqlarına düşmən kəsildiklərini fakt olaraq ortaya qoyur, ölkəmizə qarşı aparılan yalan, böhtan kampaniyalarında yer aldıqlarını təsdiqləyir. Belələri unudurlar ki, dövlətə, xalqa qarşı edilən xəyanətlər heç bir zaman bağışlanmır”.

Milli Məclisin deputatı Ramin Məmmədov da qeyd edib ki, radikal müxalifətin və xaricdəki uzantılarının hətta tarixi Zəfərimizə qarşı sosial şəbəkələrdə qaralama kampaniyaları aparmaq cəhdləri bir daha onların əsl simasını Azərbaycan cəmiyyətinə göstərmiş oldu. Millət vəkilinin fikrincə, 44 günlük Vətən müharibəsi dövründə də xalqla və dövlətlə bir yerdə olmağı bacarmayanlar öz korporativ maraqlarını milli maraqlardan üstün tuturlar: “Bütün hallarda Əli Kərimli və dağıdıcı düşərgənin digər təmsilçiləri zehinlərinə yeritməlidirlər ki, Azərbaycan münaqişəni həll edib, ölkəmizin ərazi bütövlüyü bərpa olunub. Hazırda işğaldan azad edilmiş regionların çiçəklənməsi, dirçəldilməsi istiqamətində genişmiqyaslı işlər görülür. Hansısa sərsəm iddialarla, yalanlarla xalqı aldatmaq olmaz”.

Pərviz SADAYOĞLU

Paylaş:

Baxılıb: 1557 dəfə