Öküzün altında buzov axtaran baytar “jurnalist”

Bakı:

24 °C

74 %

15 m/s

Əlaqə

AZ RU EN

Ana səhifə / Siyasət / Öküzün altında buzov axtaran baytar “jurnalist”

Öküzün altında buzov axtaran baytar “jurnalist”

29.10.2021 [09:49]

II kapitulyasiyadan niyə narahatdır?

Yalan danışmayacağam, Sevinc Osmanqızının son çıxışına bu dəfə oturub ədəb-ərkanla qulaq asmışam. Çünki mənə maraqlıydı, o, Türkiyə Prezidenti cənab Ərdoğanın Füzuli hava limanının açılışında iştirakını, Zəngilanda Azərbaycan Prezidenti ilə səsləndirilən birgə bəyanatları, Füzuli Beynəlxalq Hava Limanının açılışını hansı şəkildə, hansı rakursdan şərh edəcək. Ağ qatığa qara demək özü də bir hünərdir, həm də hər adamda olmayan hünər. Bunun üçün gərək yaradılışın fərqli ola, gərək vicdanın ruhunda deyil, cibində yerləşə.

Sevinc Osmanqızı öncə cənab Ərdoğanın növbəti dəfə Qarabağa ayaq basmasını mühüm hadisə kimi şərh eləsə də, havasını həmişəki notlarda çalmağa davam elədi - Sən demə Qarabağ əldən gedirmiş, bizimsə bundan xəbərimiz yoxdur. Sən demə Zəngəzur dəhlizinin açılması da, əslində, bir fəlakət imiş, bizimsə bundan da xəbərimiz yoxdur. Ən dəhşətlisi isə o imiş ki, biz Türkiyəni susmağa məcbur edirmişik. Aman Allah, bizimsə heç bundan da xəbərimiz yoxdur! Sevinc Osmanqızı olmasa, heç vaxt da xəbər tutmayacaqmışıq.

Sonra Osmanqızı İlham Əliyev, Vladimir Putin, Nikol Paşinyan arasında Moskvada keçirilməsi nəzərdə tutulan görüş barədə (görüşün nə zaman olacağına dair hələlik heç bir rəsmi açıqlama yoxdur) qorxulu nağıllar danışıb, bu görüşün əsla Azərbaycanın xeyrinə olmayacağını vurğuladı. Bununla da qane olmayıb, Türkiyənin bir top kimi kənara atıldığını, bu vəziyyətin Türkiyənin xoşuna gəlmədiyini, üstəlik, Ərdoğanın İlham Əliyev tərəfindən başqa şəkildə danışmağa məcbur edildiyini qeyd etdi.

Sevinc Osmanqızı Ərdoğanın çıxışı zamanı “Əgər Azərbaycan ilə bağlı səmimi iradə ortaya qoyarsa, Türkiyənin Ermənistan ilə əlaqələrinin də normallaşması üçün bir maneə qalmayacaq. Bütün bölgə üçün birlikdə qurulacaq firavan gələcəyi kiçik hesablara və daxili siyasətə qurban vermək vaxt itkisi mənasına gələcək. Dünyanın bu gözəl bölgəsində sülh içində yaşanacaq parlaq bir gələcək, əlbəttə ki, mümkündür. Türkiyənin də davamlı sülhün yaradılması istiqamətində atılacaq hər müsbət addımın qarşılığını eyni konstruktiv anlayışla verəcəyini bir daha xüsusi vurğulayıram” deməsini Qarabağın kəsilib atılması, 30 ildən bu yana davam edən ritorikanın dəyişməsi. Rusiyaya satılmaq kimi dəyərləndirdi.

“Bəs biz 3000 şəhidi ona görə vermişdik ki, bu gün Ermənistan üzərindən təyyarələrimiz uçsun, Zəngəzur dəhlizi ilə avtomobillər hərəkət etsin? İqtisadi yüksəlişlər yaşansın?”, - deyə jurnalist xanım sual verir. Ən böyük sülh böyük savaşlar hesabına qazanılır. Amma bu savaşlar əbədi davam etməli deyil. Sevinc Osmanqızı, 3000 şəhid yetmədi, sayları daha da artsınmı deyirsən?

Sevinc Osmanqızı Zəngəzur dəhlizinin açılması kimi mühüm bir hadisəni saqqal darağı adlandıraraq, “başımız Qarabağdır, Qarabağ problemi isə həll olunmayıb” deyir. Bizim başımız yerindədir, Sevinc Osmanqızı, bu qədər gözəllikləri görə bilmirsinizsə, sizin başınızın dərdi həqiqətən böyükdür.

Dərdi başından böyük Sevinc Osmanqızı öz fikirlərini bu və ya digər şəkildə təkzib edərək, gah deyir ki, üç ölkənin rəhbərlərinin görüşü barədə xəbərlər verilmir, bu barədə o Ermənistan mətbuatında yazılanları analiz edərək belə qənaətə gəlir, gah deyir, bu xəbər ictimaiyyətdən qəsdən gizlədilir, görüş keçiriləcək, həm də bizm xeyrimizə olmayacaq, gah da deyir belə xəbərlər qəsdən sızdırılır ki, cəmiyyətin hadisələrə reaksiyasını öyrənmək mümkün olsun. O deyir ki, hazırda Ermənistan cəmiyyəti bu kimi xəbərlər içərisində çalxalanır. Hətta bu görüş xəbərindən sonra ermənilər arasında Paşinyanın II kapitulyasiya sənədini imzalayacağını deyənlərin olduğunu da Sevinc deyir. (Özlüyündə bir təzad. Ermənilər bu görüşün öz xeyirlərinə olmayacağını bildirirlərsə, deməli bizim xeyrimizədir).

“Bizdə isə sakitlikdir. Bircə nəfər də etiraz edən yoxdur”. Az qalır desin ki, “Niyə o əjdahadan bizdə yoxdur?” Belə çıxır ki, Osmanqızına xaos, etiraz, müharibə lazımdır. Deyir, ermənilər daha aktiv cəmiyyət olaraq hər kəlməni, hər məqamı müzakirəyə çıxarırlar, biz isə susmuşuq. Narahat deyilik, çünki ermənilər məğlub, biz qalibik. Onlar Paşinyana etimad etmirlər, biz sona qədər prezident İlham Əliyevə güvənirik. Üstəlik, qələbədən sonra bu güvən, sevgi, etimad birə min artıb. Səbəb bu qədər bəsit. Bizdə niyə qarışıqlıq olmalıdır? Niyə olsun axı? Hər kəs başını salıb aşağı, öz işiylə məşğuldur. Heç kim sizin kimi öküzün altında buzov axtarmır.

Türkiyə hansısa layihədən kənarlaşdırılacaq, hər sözü ilə dünyaya meydan oxuyan Ərdoğan da buna susacaq? Sevinc Osmanqızı prezidentlərin media qarşısında çıxışları zamanı demək olar ki, hər cümlənin “qardaşım” kəlməsiylə başladığını eşitmədimi?

Sevinc Osmanqızı Azərbaycan hakimiyyətini gah Rusiyaya, gah İrana işləməkdə ittiham elədi. Bununla da yetmədi, gah dedi, indiki hakimiyyət gücünü itirib, gah dedi Azərbaycan Türkiyə modelinə keçəcək, hakim partiya hansısa müxalifət partiyası ilə blok yaradıb, hakimiyyətdə qalmağa can atacaq. Qısası, Sevinc Osmanqızının uzun cəfəngiyyatının qısa xülasəsi bunlardan ibarət oldu.

Yenə qulaq asardım, amma nə başım, nə də qulaqlarım bu sərsəmləmələri daha artıq qəbul edə bilmədi. Onun “moizələrinin” daimi izləyicilərinə şəfa diləyirəm.

İ.Rəsul

Paylaş:

Baxılıb: 711 dəfə