Nazirlərin Paris görüşü...

Bakı:

18 °C

82 %

5 m/s

Əlaqə

AZ RU EN

Ana səhifə / Siyasət / Nazirlərin Paris görüşü...

Nazirlərin Paris görüşü...

12.11.2021 [10:10]

Ermənistan və Fransa Cənubi Qafqazda iqtisadi əməkdaşlığın bərpasına hesablanmış təşəbbüslərdə səmimidirmi?

UNESCO-nun Baş Konfransında iştirak məqsədi ilə Parisə səfəri çərçivəsində Azərbaycan Respublikası xarici işlər naziri Ceyhun Bayramovun noyabrın 10-da ATƏT-in Minsk qrupunun həmsədrləri - ABŞ-dan Endryu Şafer, Fransadan Bris Rökföy və Rusiyadan İqor Xovayev ilə, habelə həmsədrlərin iştirakı ilə Ermənistan xarici işlər naziri Ararat Mirzoyan ilə görüşləri olub. Görüşlərdə, həmçinin ATƏT-in fəaliyyətdə olan sədrinin şəxsi nümayəndəsi Anjey Kaspşik iştirak edib.

Xarici İşlər Nazirliyinin Mətbuat xidməti idarəsindən verilən məlumata görə, görüşlərdə bölgədə yaranmış yeni reallıqları nəzərə alaraq, Azərbaycan və Ermənistan arasında münasibətlərin normallaşdırılması prosesi ilə bağlı məsələlər ətrafında fikir mübadiləsi aparılıb. Nazir Ceyhun Bayramov Azərbaycanın münaqişə sonrası vəziyyətlə bağlı mövqeyini qarşı tərəfin diqqətinə çatdırıb.

Bəs bu görüşdə aparılan müzakirələr Ermənistan tərəfindən üçtərəfli bəyanatın müddəalarının yerinə yetirilməsinə nə dərəcədə təsir göstərə bilər? Çünki həm kommunikasiyaların açılmasına, həm sülh sazişinin imzalanması üçün Azərbaycanın çağırışlarına qarşı tərəf müsbət reaksiya verməyib. Məsələ ilə bağlı Milli Məclisin deputatı Şahin İsmayılov “Yeni Azərbaycan” qəzetinə açıqlamasında bildirib ki, Azərbaycan Vətən müharibəsində qələbə qazandıqdan sonra qarşıda dayanan əsas vəzifə regionda dayanıqlı sülhü təmin etməkdən ibarətdir: “30 ilə yaxın müddətdə ATƏT-in Minsk qrupu Ermənistanın işğalçılıq siyasətinə son qoyulması istiqamətində əməli addım atmayıb, əksinə, davranışları, sərgilədiyi mövqe ilə erməniləri daha aqressiv olmağa həvəsləndirib. Ona görə də, ötən il Azərbaycan öz gücünə BMT Təhlükəsizlik Şurasının müvafiq qətnamələrini yerinə yetirərək ərazilərini işğaldan azad etdi. Azərbaycan qalib dövlətdir və bununla hamı, o cümlədən həmsədrlər hesablaşmalıdırlar. 44 günlük Vətən müharibəsindən sonra cəmiyyətdə belə bir sual yaranıb ki, biz torpaqlarımızı işğaldan azad etmişiksə, Minsk qrupuna ehtiyac varmı? Azərbaycan Prezidenti İlham Əliyev də Minsk qrupunun fəaliyyəti ilə bağlı dövlətimizin mövqeyini aydın şəkildə ifadə edib. Yəni, həmsədrlər iki dövlət arasında sülh sazişinin imzalanması üçün töhfə verəcəklərsə, buyursunlar. Azərbaycanın mövqeyi bundan ibarətdir ki, Dağlıq Qarabağ münaqişəsi başa çatıb və həmsədrlər əvvəllər olduğu kimi yenə də köhnə məsələlərə qayıtmamalıdırlar. Şübhəsiz ki, Fransada baş tutmuş görüşlərdə də nazir Ceyhun Bayramov dövlətimizin mövqeyini ifadə edib”.

Millət vəkilinin fikrincə, ölkəmiz diplomatik müstəvidə qələbəmizin möhkəmlənməsi istiqamətində mühüm addımlar atır. Bu baxımdan, keçirilən bu görüş də önəmlidir.

Politoloq Yeganə Hacıyeva isə bildirib ki, həmsədrlərlə görüşdən öncə Fransanın xarici işlər nazirinin Azərbaycan və Ermənistan xarici işlər nazirləri ilə ayrı-ayrılıqda görüşləri olub: “Ardınca üç nazir arasında birgə görüş keçirilib. Fransa XİN-i görüşü Cənubi Qafqazda sülh və stabilliyin bərqərar olması üçün ölkələr arasında dialoqun intensivləşdirilməsinin məramı kimi dəyərləndirib. Amma məsələ ondadır ki, Ermənistanın, ATƏT-in Minsk qrupunun həmsədrlərinin, ATƏT-in fəaliyyətdə olan sədrinin şəxsi nümayəndəsinin yeni reallıqlar haqqında təsəvvürləri yeni reallıqların müəllifi olan Azərbaycanın mövqeyindən fərqlənir. O üzdən Azərbaycanın xarici işlər naziri Ceyhun Bayramov istər Fransanın xarici işlər naziri ilə, istərsə də ATƏT-in Minsk qrupunun həmsədrləri, ATƏT-in fəaliyyətdə olan sədrinin şəxsi nümayəndəsi ilə görüşlərində Azərbaycanın mövqeyini qarşı tərəfin diqqətinə çatdırıb. Müzakirələr bir neçə istiqamət üzrə davam edib və ümumi razılaşmalar humanitar layihələr və kommunikasiyaların açılması prosesini əhatə edən məqamlardır. Məsələn, fransalı nazir işğaldan azad etdiyimiz ərazilərin minalardan təmizlənməsi prosesində öz ölkəsinin Azərbaycana yardım etməyə hazır olduğunu bildirib. Həmçinin, Birinci Qarabağ müharibəsi zamanı itkin düşənlərin axtarışının Fransa üçün vacib olduğunu qeyd edərək bu istiqamətdə Fransanın Azərbaycan və Ermənistan arasında mediasiya xidmətləri təklif etdiyini bildirib”.

Ekspert qeyd edib ki, Azərbaycan üçün bu gün əsas məsələlərdən biri işğaldan azad edilmiş ərazilərin yenidən qurulması və bərpasıdır: “Bu baxımdan, minaların təmizlənməsi olduqca vacibdir. Görüşdə müzakirə olunmuş məsələlərdən digəri isə Azərbaycanla Ermənistan arasında sərhədlərin demarkasiyası və delimitasiyası prosesidir. Bu görüşü Cənubi Qafqazda sülh və stabillik üçün, quruculuq və münaqişədən sonrakı yenidənqurma işlərində fəal iştirak üçün, Cənubi Qafqazda qarşılıqlı fəaliyyəti və iqtisadi əməkdaşlığın bərpasının təşviqi üçün təkliflərin ətrafında baş tutan görüş kimi dəyərləndirə bilərik. İstər Ermənistanın, istərsə də Fransanın bu təşəbbüslərdə nə qədər səmimi olmasını daha sonra atacaqları real addımlar sübut edəcək”.

Nardar BAYRAMLI

Paylaş:

Baxılıb: 887 dəfə