Qriqoryan kimə hansı yolu göstərir?

Bakı:

18 °C

82 %

5 m/s

Əlaqə

AZ RU EN

Ana səhifə / Siyasət / Qriqoryan kimə hansı yolu göstərir?

Qriqoryan kimə hansı yolu göstərir?

13.11.2021 [09:00]

Ermənistanın cəmi bir yolu var - bütün kommunikasiyalar açılmalıdır

Zəngəzur dəhlizi bir neçə kommunikasiyadan ibarət şəbəkədir. Bu kommunikasiyaların bir qismi Meğri şəhərinin ətrafından keçir. Buraya həm dəmir yolu, həm də avtomobil yolu aiddir

Davamlı sülhü təmin edəcək sənədin gecikməsi Ermənistanın özünün dövlət maraqlarına zidd və zərbədir

Dalana dirənmiş Ermənistan 2020-ci il 10 noyabr üçtərəfli Bəyanatının icrasını gecikdirmək üçün fərqli yollara əl atır. Qeyd edək ki, Ermənistanın siyasi rəhbərliyinin ziddiyyətli açıqlamaları bir daha onu deməyə əsas verir ki, rəsmi İrəvanda siyasi böhran hələ bitməyib. Məsələn, bu ölkənin baş naziri Nikol Paşinyan Azərbaycanla bütün yolların, kommunikasiyaların açılacağını bildirsə də, Təhlükəsizlik Şurasının katibi Armen Qriqoryan onu “təkzib” edir. Belə ki, Qriqoryan daha çox sərsəmləməyə bənzəyən açıqlamasında bildirib ki, Azərbaycan yalnız Naxçıvana yol istəyirsə, o zaman Xndzoresk-Biçənək (Naxçıvan şəhəri - müəllif) hissəsindən istifadə etmək məqsədəuyğundur. Qriqoryan vurğulayıb ki, söhbət dəhlizdən yox, “yolla təmin olunmaqdan gedir.

Göründüyü kimi, yenə də erməni xisləti öz sözünü deməkdədir. 10 noyabr üçtərəfli Bəyanatının müvafiq bəndində “bölgədəki bütün iqtisadi və nəqliyyat əlaqələri blokdan çıxarılır” qeyd edilsə də, Qriqoryanın hansı sənədə istinadən “yol göstərməsi” bəlli deyil.

Məsələ ilə bağlı “Yeni Azərbaycan”qəzetinə açıqlamasında politoloq İlqar Vəlizadə bildirib ki, Azərbaycan dövlətini Qriqoryanın açıqlaması deyil, 2020-ci ilin noyabrın 10-da imzalanmış üçtərəfli Bəyanatın icrası maraqlandırır. Politoloq qeyd edib ki, Qriqoryan çox şey deyə bilər və deyir: “Yeri gəlmişkən, üçtərəfli Bəyanata istinad etsək, orada qeyd olunur ki, bütün kommunikasiyalar açılmalıdır. Bəli, Zəngəzur dəhlizi bir neçə kommunikasiyadan ibarət şəbəkədir. Bu kommunikasiyaların bir qismi Meğri şəhərinin ətrafından keçir. Bura həm dəmir yolu, həm də avtomobil yolu aiddir. Qriqoryanın “göstərdiyi yol” isə Naxçıvan Muxtar Respublikasının Şahbuz rayonunu Laçınla birləşdirən və Biçənək dağ aşırımından keçən yoldur. Naxçıvan şəhərindən başlayaraq, Laçın rayonundan keçərək Ağdam, Bərdə rayonuna qədər uzanan bu yol Sovetlər dönəmində tikilib və istifadə də olunub. Qriqoryan həmin yolun açılmasını təklif edir. Amma bizə onların hər hansı bir təklifi lazım deyil”.

İ.Vəlizadə vurğulayıb ki, Ermənistan imza atdığı bəyanatı icra etməli və bütün yolar açılmalıdır. “Bunu üçtərəfli Bəyanat tələb edir. Qriqoryan sadəcə diqqəti yayındırır və dedikləri də boş şeylərdir. Onun dediklərini özündən başqa da heç kim eşitmir. Üçtərəfli Bəyanatın icrası ilə bağlı yaradılan üçtərəfli komissiya çərçivəsində başqa müzakirələr gedir. Orada bütün kommunikasiyaların açılması ilə bağlı müzakirələr aparılır”, - deyə İ.Vəlizadə əlavə edib.

Bakı Politoloqlar Klubunun rəhbəri Zaur Məmmədov da Ermənistanın milli təhlükəsizliyinə cavabdeh olan Armen Qriqoryanın son zamanlar absurd açıqlamalar verdiyini diqqətə çatdırıb. Onun sözlərinə görə, Ermənistanın hakim siyasi sistemində başda ombudsman Totayan olmaqla bəzi şəxslər siyasi proseslərdən uzaq olduqlarını nümayiş etdirməkdədirlər: “Bu siyahıya Ermənistanın təhlükəsizlik siyasətinə cavab verən nazir və eyni zamanda müdafiə naziri də daxildir. Ermənistanın siyasi rəhbərliyinin bu cür açıqlamaları yalnız vaxt uzatmağa xidmət edir. Söhbət nəqliyyat dəhlizlərinin açılmasından gedir və bu açılacaq. Ermənistan bu məsələdə soyuqqanlılıq nümayiş etdirməlidir. İmzalanması nəzərdə tutulan və davamlı sülhü təmin edəcək sənədin gecikməsi bu gün Ermənistanın özünün dövlət maraqlarına zidd və zərbədir. Yaxşı olar ki, ermənilər dinc yolla Azərbaycanın ultimatumlarını və xəbərdarlıqlarını qəbul etsinlər. Unutmasınlar ki, üçtərəfli ?əyanat onların kapitulyasiyasıdır. Azərbaycan bundan sonra da istəsə, erməniləri diz çökdürə bilər”.

P.İsmayılov

Paylaş:

Baxılıb: 805 dəfə