Türkiyənin vasitəçiliyi münaqişənin həllinə necə təsir edə bilər?

Bakı:

21 °C

64 %

3 m/s

Əlaqə

AZ RU EN

Ana səhifə / Siyasət / Türkiyənin vasitəçiliyi münaqişənin həllinə necə təsir edə bilər?

Türkiyənin vasitəçiliyi münaqişənin həllinə necə təsir edə bilər?

01.12.2021 [10:27]

Və ya Ankaranın təşəbbüsü Kiyev-Moskva xəttində böhranı aradan qaldıracaqmı?

Nardar BAYRAMLI

Müasir dünya siyasətində güclü, nüfuzlu dövlət və etibarlı tərəfdaş kimi tanınan Türkiyə regional və beynəlxalq təhlükəsizliyə, əməkdaşlığa mühüm töhfələr verir. Qardaş ölkənin, həmçinin Avrasiyada sülh, sabitlik, rifah və işbirliyinin təmin olunmasında əhəmiyyətli addımlar atır, vacib təşəbbüslər irəli sürür. Türkiyənin regionda sülh naminə Rusiya və Ukrayna arasında vasitəçiliyə hazır olduğunu bəyan etməsi də bu baxımdan xüsusi vurğulanmalıdır. Yeri gəlmişkən, Prezident Rəcəb Tayyib Ərdoğan Türkmənistandan qayıdarkən jurnalistlərə verdiyi açıqlamada bu məsələyə toxunaraq “Regionda sülhün tərəfdarıyıq. Biz dəfələrlə bu mövzunu dost Rusiya və xüsusilə cənab Putinlə müzakirə etmişik. Vasitəçi olaraq Ukrayna və Putinlə danışıqlar aparmağa hazırıq. Tərəflər istərsə, bu problemin həllində iştirak etmək istəyərdik”, - deyə bildirib.

Artıq Ukrayna tərəfi Türkiyə Prezidentinin vasitəçilik təklifinə müsbət reaksiya verib. Xarici işlər naziri Dmitri Kuleba deyib ki, rəsmi Kiyev Donbassdakı münaqişənin həllinə yönəlmiş istənilən səyləri alqışlayacaq. “Ukrayna Normandiya formatının işinə sadiqdir, lakin biz heç vaxt digər tərəfdaşlar və dostlar tərəfindən təklif edilən yaxşı təşəbbüsləri geri çevirməmişik. Biz bu müharibəni dayandırmağa, geri qayıtmağa kömək edə biləcək hər hansı səyi alqışlayacağıq”, - deyə Dmitri Kuleba qeyd edib.

Ekspertlər də Türkiyənin bəhs olunan məsələnin həllində və regionda dayanıqlı sabitliyin təmin olunmasında vacib rol oynaya biləcəyini vurğulayırlar.

Rusiya güc balansını bölüşdürəcəyi tərəfin Qərb yox, Türkiyə olmasında maraqlıdır

Mövzu ilə bağlı qəzetimizə açıqlama verən siyasi şərhçi Asif Nərimanlı bildirib ki, Ukrayna üçün münaqişənin həllində irəliləyişin yeganə yolu Türkiyə-Rusiya masası görünür. Onun sözlərinə görə, Qərb problemin həlli üçün dəfələrlə vasitəçilik təklif edib, bu istiqamətdə danışıqlar aparılıb: “Amma Qərbin prosesdə iştirakı indiyə qədər heç bir nəticə verməyib, əksinə, Rusiyanın aqressiyasının artması ilə nəticələnib. Çünki Avropa və ABŞ Rusiyaya qarşı kəskin mövqe sərgiləyir, hətta müəyyən sanksiyalar tətbiq edir. Bütün bunların fonunda Rusiya güc balansını bölüşdürəcəyi tərəfin Qərb yox, Türkiyə olmasında maraqlıdır. Yəni Cənubi Qafqaz və Mərkəzi Asiyada olduğu kimi, Şərqi Avropada da Ankara-Moskva tandemi effektli ola bilər. Kiyevin son dövrlər Türkiyə ilə yaxınlaşmaq siyasətində də münaqişəni bu formatda həll edə bilmək gözləntisi var”.

Ukrayna Türk Dövlətləri Təşkilatına cəlb oluna bilər?

Həmsöhbətimizin sözlərinə görə, rəsmi Ankaranın hədəflərindən biri Ukraynanı Türk Dövlətləri Təşkilatına gətirmək, Şərqi Avropadan Mərkəzi Asiyaya qədər uzanan coğrafiyada güclənmək və bu prosesdə Moskva ilə üz-üzə gəlməməkdir: “Qarabağ məsələsi də göstərdi ki, postsovet məkanındakı münaqişələrin həllində irəliləyişə nail olmaq üçün Qərb-Rusiya qarşıdurmasından yox, Türkiyə-Rusiya əməkdaşlığından yararlanmaq olar. Dünyadakı bəzi güclər münaqişələrin həllində səmimi deyil, əksinə, problemin uzanmasına maraqlı olurlar, ya da konkret olaraq bir tərəfin mövqeyini dəstəkləyirlər. Bu yanaşma Qərbin siyasətində də özünü göstərir. Amma Türkiyə dünyada, o cümlədən regionda sülhün, təhlükəsizliyin və beynəlxalq hüququn təmin edilməsində maraqlıdır. Ötən dövr ərzində Rəcəb Tayyib Ərdoğan hakimiyyətinin yürütdüyü siyasət bunu təsdiqləyir. Ona görə də Rusiya-Ukrayna böhranının həllində Türkiyənin vasitəçiliyi daha düzgün və məntiqli yanaşmadır”.

Paylaş:

Baxılıb: 884 dəfə