Ermənistan iş qabiliyyətli əhalisini tamamilə itirə bilər

Bakı:

12 °C

54 %

12 m/s

Əlaqə

AZ RU EN

Ana səhifə / Siyasət / Ermənistan iş qabiliyyətli əhalisini tamamilə itirə bilər

Ermənistan iş qabiliyyətli əhalisini tamamilə itirə bilər

07.08.2010 [12:39]

“Gallup” təşkilatının apardığı sosioloji sorğunun nəticəsi bunu deməyə əsas verir
Bu günlərdə nüfuzlu “Gallup” təşkilatının MDB dövlətlərində respondentlər arasında apardığı sorğunun nəticələrinə görə, Ermənistanda əhalinin 44 faizi xaricdə işləmək istəyir. Sorğunun keçirildiyi ölkələr arasında xaricdə işləmək istəyənlərin faiz göstəricisinə görə Ermənistan birinci yerdədir. Xatırladaq ki, “Gallup” təşkilatı MDB məkanında dəfələrlə bu cür sorğular gerçəkləşdirib. Sonuncu belə sorğulardan birinin nəticələrinə əsasən əhalinin ölkə rəhbərliyinə göstərdiyi etimadın səviyyəsinə görə 77 faizlə Azərbaycan liderlik edir. Qeyd edək ki, 1958-ci ildən etibarən fəaliyyət göstərən “Gallup” təşkilatı 140-dan çox ölkədə mütəmadi olaraq sosioloji sorğular həyata keçirir. Yarandığı vaxtdan bu günə qədər tərəfsizliyini qoruyub saxlayan təşkilatın keçirdiyi sorğuların nəticələri beynəlxalq miqyasda maraqla izlənilir. Bu gün bütün dünyada “Gallup” təşkilatı ictimai rəyi obyektiv əks etdirən etibarlı mənbə kimi tanınır. Bu baxımdan, təşkilatın keçirdiyi son sorğunun nəticələri kifayət qədər ciddi qəbul olunur.
İşğalçı Ermənistana gəlincə, əslində bu ölkədə işsizliyin ən yüksək həddə çatması, insanların iş tapmaq məqsədilə kütləvi surətdə xarici ölkələrə üz tutması faktı bundan öncə də məlum idi. Lakin “Gallup” təşkilatının keçirdiyi sorğu qonşu ölkədə vəziyyətin nə qədər acınacaqlı olduğunu bir daha ortaya qoymuş oldu. Ermənistan əhalisinin yarısının ölkədən getmək istəyinə əsas yaradan amillərdən xəbərdar olmaq üçün isə sadəcə ölkənin bugünkü siyasi, iqtisadi durumuna nəzər salmaq kifayətdir. Belə ki, Ermənistan iqtisadiyyatında illərdir geriləmə müşahidə olunur, müəssisələr fəaliyyətini dayandırır, banklar sıradan çıxır, əhalinin güzəranı gündən-günə pisləşir. Digər tərəfdən, iqtisadiyyatın bütün sahələrində monopoliya, özbaşınalıq baş alıb gedir. İldən-ilə artmaqda olan xarici borclar üzündən ölkənin gələcəyi də ciddi təhlükə altına düşüb.
Büdcənin boşalmasının qarşısını almaq məqsədilə hökumət son bir neçə ildə kommunal xidmətlərin qiymətlərini dəfələrlə artırıb. Bütün bunlarla bərabər inflyasiya və bahalaşma da Ermənistan əhalisinin maddi vəziyyətini xeyli ağırlaşdırıb. Nəticədə, insanlar yeganə çıxış yolunu yaşayışlarını təmin etmək üçün xaricə getməkdə görürlər. Hazırda Ermənistanda yaşayan ailələrin böyük əksəriyyətinin yeganə dolanışıq mənbəyi xaricdə işləyən qohumlarının göndərdikləri vəsaitdir. Lakin son illərdə dünyada gedən iqtisadi proseslər bu vəsaitlərin həcmində azalmaya, deməli Ermənistanın əsas gəlirlərin bir hissəsindən məhrum olmasına gətirib çıxarıb. Belə vəziyyətdə isə Ermənistan rəhbərliyinin səriştəsizliyi özünü daha aydın şəkildə göstərir. Sarkisyan hakimiyyəti isə yaranmış vəziyyətin səbəblərini aradan qaldırmaq əvəzinə gülünc qərarlarla əhalinin ölkəni tərk etməsinin qarşısını almağa çalışır. Belə ki, ermənilərin kinayə ilə “hava vergisi” adlandırdığı, hökumətin ötən il təyyarə reyslərinə biletlərin qiymətini 10 000 dram artırması qərarı da Ermənistanı tərk edənlərin sayını azalda bilməyib. Son illər ərzində təkcə kütləvi miqrasiya üzündən ölkə əhalisinin yarısını itirən Ermənistanın ciddi demoqrafik böhranla üzləşdiyi şübhəsizdir. Qeyd edək ki, Ermənistan əhalisinin sürətlə azalmasının səbəbi təkcə miqrasiya ilə bağlı deyil. Beynəlxalq təşkilatların və Ermənistan Səhiyyə Nazirliyinin ölkədə apardığı araşdırmalara əsasən əhalinin azalmasının səbəblərindən biri də getdikcə artan xəstəliklərdir. Eyni zamanda ölkənin nəinki ucqar bölgələrində, hətta əsas şəhərlərində də uşaq ölümü hallarında yüksək artım müşahidə olunur.
Ağır sosial-iqtisadi durumun yaratdığı problemlər, əhalinin kütləvi miqrasiyası, Sarkisyan rejimindən narazılıq Ermənistan daxilində siyasi gərginliyi də artırıb. Beləliklə, rəsmi Yerevan anlamalıdır ki, regional əməkdaşlıqdan kənarda qalan Ermənistanın bir dövlət kimi məhvə doğru irəliləyir və işğalçı siyasətə son qoymadan dövləti bu fəlakətlərdən qurtarmaq mümkün deyil.
Hülya MƏMMƏDLİ

Paylaş:

Baxılıb: 1067 dəfə