Moskva imtina etdi

Bakı:

25 °C

72 %

13 m/s

Əlaqə

AZ RU EN

Ana səhifə / Siyasət / Moskva imtina etdi

Moskva imtina etdi

10.02.2022 [22:42]

Rusiya Münhen Təhlükəsizlik Konfransına qatılmayacaq

Pərviz SADAYOĞLU

Rusiya Xarici İşlər Nazirliyinin sözçüsü Mariya Zaxarova bildirib ki, ölkəsinin rəsmiləri müxtəlif səbəblərə görə bu il fevralın 18-20-də keçiriləcək Münhen Təhlükəsizlik Siyasəti Konfransının iclasında iştirak etməyəcəklər. Onun sözlərinə görə, son illər Münhen Təhlükəsizlik Konfransı öz inklüzivliyini və obyektivliyini itirərək getdikcə daha çox “transatlantik forum”a çevrilib. Xatırladaq ki, Rusiya Prezidentinin mətbuat katibi Dmitri Peskov da bir müddət əvvəl bildirmişdi ki, Vladimir Putin bu il konfransda iştirak etməyi planlaşdırmır.

Rusiyanın siyasi rəqibi statusunda olan qütb isə budəfəki konfransda daha geniş heyətlə təmsil olunacaq. Almaniyanın Federal Kansleri Olaf Şolz, ABŞ-ın vitse-prezidenti Kamala Harris və 35-ə yaxın başqa dövlət və hökumət başçısı fevral ayında Münhendə keçiriləcək illik təhlükəsizlik konfransında iştirak edəcəklər. Kamala Harrisin konfransa gəlişi hələ rəsmi olaraq təsdiqlənməsə də, təşkilatçılar onun iştirakına ümid edirlər. Bunu konfransın sədri Volfqanq İşinger deyib. İşinger Rusiya Prezidenti Putini də videokonfrans vasitəsilə dünya liderləri ilə danışaraq öz mövqeyini bildirməyə dəvət edib. “Mən heç bir halda Rusiyanı istisna etmək istəmirəm”, - deyə İşinqer bildirib.

Münhen Konfransı Avroatlantik təhlükəsizlik məsələləri üzrə ən böyük forum hesab olunur. Keçən il tədbir koronavirus pandemiyası ilə əlaqədar onlayn keçirilib. Bu il təşkilatçılar təhlükəsizlik sahəsində siyasətçilərin şəxsi görüşlərinə böyük ehtiyac olduğunu deyərək adi rejimə qayıtmaq qərarına gəliblər. Konfrans pandemiya əleyhinə sərt tədbirlərə riayət olunmaqla fevralın 18-dən 20-dək keçiriləcək. Forumda Ukrayna prezidenti Vladimir Zelenski, NATO-nun baş katibi Yens Stoltenberq, Avropa Komissiyasının sədri Ursula fon der Leyenin iştirakı da gözlənilir. ABŞ-dan isə vitse-prezident Harrislə yanaşı, dövlət katibi Entoni Blinken, eləcə də Konqresin 30 üzvünün də iştirak edəcəyi bildirilir.

Məsələ ilə bağlı fikirlərini bölüşən siyasi şərhçi Qabil Hüseynli bildirib ki, Rusiya 2009-cu ildən Münhen Təhlükəsizlik Konfransının işində iştirak edir, orada təmsil olunur. Rusiya XİN təmsilçisinin Münhen Konfransını “transatlantik forum” adlandırması isə məlum məsələlərlə əlaqədardır. Q.Hüseynlinin fikrincə, Rusiyanın konfransın işində iştirakdan imtina etməsinin əsl səbəbləri məlumdur: “Mənzərə hər kəs üçün bəllidir. Konfransda Ukrayna məsələsinin müzakirə ediləcəyi gözlənilir. Hətta bu məsələ konfransın ana xəttini təşkil edə bilər. Adından da bəlli olduğu kimi, bu konfrans təhlükəsizlik məsələlərinə həsr olunur. Hazırda Avropa üçün ən böyük təhlükə də məhz Ukrayna məsələsidir. Rusiya tərəfi anlayır ki, konfransın gedişi onlar üçün asan olmayacaq və müzakirələrdə, hətta rəsmi Moskvanın ünvanına təhdidlər də səsləndirilə bilər. O baxımdan ki, Putin Makronla görüşündən sonra mətbuat konfransında Avropanı nüvə silahı ilə təhdid etmişdi. Həmin konfransda Rusiyaya ünvanlanacaq bir çox suallar olacaq”.

Paylaş:

Baxılıb: 776 dəfə