Sülh üçün üçüncü tərəfə ehtiyac yoxdur

Bakı:

24 °C

68 %

3 m/s

Əlaqə

AZ RU EN

Ana səhifə / Siyasət / Sülh üçün üçüncü tərəfə ehtiyac yoxdur

Sülh üçün üçüncü tərəfə ehtiyac yoxdur

15.03.2022 [10:24]

Mövld Çavuşoğlunun mesajı kimə ünvanlanıb?

Nardar BAYRAMLI

Antalya Diplomatiya Forumu çərçivəsində Türkiyənin xarici işlər naziri Mövlud Çavuşoğlu ermənistanlı həmkarı Ararat Mirzoyanla görüşüb. Görüşdə iki ölkə arasında əlaqələrin normallaşması və regional məsələlər müzakirə edilib. “Biz Cənubi Qafqazda sülh üçün çalışırıq. Bu səylərimizə dəstək görürük. Azərbaycan da bundan məmnundur. Sülh hamı üçün faydalıdır”, - deyə Türkiyə XİN başçısı vurğulayıb. M.Çavuşoğlu qeyd edib ki, İkinci Qarabağ müharibəsi bitdikdən, Azərbaycan torpaqlarını işğaldan azad edəndən sonra iki ölkə olaraq gücümüzü sülh və sabitlik üçün birləşdirdik. Nazirin sözlərinə görə, Ermənistan Azərbaycanın sülh təklifinə cavab verməlidir: “Bölgənin sabitliyi üçün hər kəsin çalışması lazımdır. Bizim Azərbaycanla üç və dördlü formatda əməkdaşlıq mexanizmlərimiz var. Bir gün sülh olsa, niyə Ermənistan da bu formatlara qatılmasın? Fikrimcə, sülh sazişinə dair danışıqlarda üçüncü tərəfə ehtiyac yoxdur. Azərbaycan və Ermənistan masa arxasında oturub danışmalıdırlar. Biz isə iki tərəf arasında sülh naminə atılacaq bütün addımları dəstəkləyirik”.

Türkiyə xarici işlər nazirinin sülh sazişi ilə bağlı çağırışları, bunun üçün üçüncü tərəfə ehtiyacın olmaması barədə fikirləri nədən xəbər verir? Məsələ ilə bağlı Milli Məclisin Beynəlxalq münasibətlər və parlamentlərarası əlaqələr komitəsinin üzvü Ramin Məmmədov bildirib ki, Azərbaycan Vətən müharibəsindən sonra regionda yeni reallıqlar yaradıb və bütün dünya bu reallıqları qəbul edir. Onun sözlərinə görə, hətta 44 günlük müharibədən sonra münaqişənin guya hələ də mövcud olması ilə bağlı süni gündəm və görüntü yaratmağa çalışan, siyasi və informasiya təxribatları törədən xarici mərkəzlər də bu cəhdlərdən imtina etmək məcburiyyətində qalıblar: “İrəvanın açıqlamaları, bəyanatları, yanaşması və mövqeyi də bu baxımdan istisna deyil. Ermənistan da bu reallığı qəbul edir. Bu səbəbdən, Ermənistan hakimiyyətinin nümayəndələri Ermənistanla Azərbaycan arasında sülh müqaviləsinin gündəmdə olduğunu deyirlər. Amma bu fikir imitasiya məqsədilə səsləndirilməməlidir, erməni tərəfi bunu əməldə göstərməlidir. Bilirsiniz ki, Azərbaycanın regionda yaratdığı yeni reallıqlar bölgədə inteqrasiya və çoxtərəfli əməkdaşlıq mühitinin formalaşmasına xidmət edir. Xüsusilə də, Azərbaycanın geosiyasi iradəsi nəticəsində kommunikasiya xətlərinin bərpası, yeni nəqliyyat dəhlizinin yaradılması mühüm siyasi və iqtisadi dividendlər, yaxşı perspektivlər vəd edir. Şübhəsiz ki, postmünaqişə mərhələsində Zəngəzur dəhlizinin yaradılması Avrasiya məkanı üçün böyük əhəmiyyət kəsb edir. Sadəcə olaraq, bu imkanlardan yararlanmaq üçün konstruktiv mövqe, praqmatik davranış ortaya qoymaq lazımdır. Bu fakt İrəvanı razılığa gəlməyə məcbur edir. Bu gün Paşinyanın müxtəlif toplantılar, görüşlər zamanı səsləndirdiyi fikirlər də bu reallığı ifadə edir”.

Millət vəkili qeyd edib ki, Ermənistan hakimiyyət nümayəndələri arasında sülh müqaviləsi ilə bağlı danışıqların ATƏT-in Minsk qrupunun vasitəçiliyi əsasında aparılması təklifini verənlər də var: “Amma Azərbaycanın mövqeyi bundan ibarətdir ki, Minsk qrupunun, onun həmsədrlərinin 30 ilə yaxın müddətdə vasitəçiliyi heç bir səmərə verməyib. Əslində, həmsədrlər münaqişənin həll olunmasına maraqlı görünmürdülər. Ona görə də, Azərbaycan öz gücünə problemi həll etdi. Belə olan halda, həmsədrlərin sülh müqaviləsinin imzalanmasına vasitəçilik etməsi məsələsi də real görünmür. Yəqin ki, M.Çavuşoğlu üçüncü tərəf deyərkən əsasən bu məsələni nəzərdə tutur. Hazırda Türkiyə-Ermənistan münasibətlərinin normallaşması ilə bağlı aktiv danışıqlar gedir. Təbii ki, Türkiyə bu prosesi Azərbaycanla koordinasiya edir. Ermənistana lazımdır ki, mövcud problemlərdən xilas olmaq üçün Azərbaycan və Türkiyə ilə normal əlaqələr yaratsın. Ona görə də, burada kənar vasitəçilərə ehtiyac yoxdur. Bilirsiniz ki, Azərbaycan sülh sazişi imzalamaq üçün öz təkliflərini Ermənistana göndərib. İndi iki ölkə bu müstəvidə birbaşa danışıqlar aparıb razılığa gəlməlidir. Ən səmərəli yol məhz tərəflərin vasitəçilər olmadan birbaşa danışıqlar aparmasıdır”.

Paylaş:

Baxılıb: 778 dəfə