Kim kimdir?

Bakı:

24 °C

66 %

3 m/s

Əlaqə

AZ RU EN

Ana səhifə / Siyasət / Kim kimdir?

Kim kimdir?

29.03.2022 [10:37]

Yaxud müharibənin bitməsi kimlərə sərf etmir?

Nardar BAYRAMLI

Artıq bir aydan çoxdur ki, Rusiya-Ukrayna müharibəsi davam edir. Bəzi xarici ekspertlər müharibənin qısa müddətdə başa çatacağını proqnozlaşdırsalar da, mövcud vəziyyət əksini göstərir. Müharibənin dayandırılması üçün edilən cəhdlər də hələ ki, heç bir nəticə verməyib. Bəs müharibənin davam etməsi kimlərin marağındadır?

Məsələ ilə bağlı qəzetimizə açıqlama verən siyasi şərhçi Asif Nərimanlı bildirib ki, bu müharibə bir sıra məsələləri aydınlaşdırır. Onun sözlərinə görə, hazırki durum günü-gündən “Qərbə güvənmək olar?” sualının aktuallığını daha da artırır: “Ukrayna Qərbə inteqrasiyaya üstünlük verən dövlətdir. Bu ölkədə son 8 ildə baş verənlər də bu istəklə bağlıdır. Həmin müddət ərzində Rusiya Krımı ilhaq etdi, eləcə də Donbas və Luqansk separatçılarının elan etdiyi müstəqilliyi tanıyıb. Fevralın 24-dən isə Rusiya Ukraynanın müəyyən hissəsini ələ keçirib. Ukrayna dövlətinin indiyədək atdığı addımlar qarşılığında Qərb bloku Rusiyanın hərbi əməliyyatlarına adekvat cavab verə bilibmi? Başqa sözlə, Qərb bütövlükdə Rusiyaya qarşı sanksiyalar tətbiq edib, Kremli tənqid edən bəyanatlar verməklə kifayətlənir. Müharibə isə daha da şiddətlənir və döyüşlərin dayanması üçün nikbinlik yoxdur. NATO-ya üzv dövlətlər Ukraynaya həm humanitar, həm də silah yardımı göstərir: “Alyansa daxil olan bir sıra ölkələr Ukraynaya hərbi dəstəyini artırır, bu ölkəyə müasir silahlar verir. Buraya hava hücumundan müdafiə sistemləri, tank əleyhinə silahlar da daxildir. O cümlədən, Ukrayna ilə sərhəd ərazilərdə NATO-nun hərbi qüvvələrinin sayı artırılır. Doğrudur, NATO açıq şəkildə müharibəyə qoşulmayıb, amma üzv dövlətlər Ukrayna ilə ikitərəfli əməkdaşlıq çərçivəsində hərbi dəstək göstərirlər. Bu günlərdə yenə də ABŞ Ukraynaya daha 100 milyon dollar dəyərində hərbi yardım göstərmək haqqında qərar verdi. NATO təşkilat olaraq Ukraynanın ərazi bütövlüyünü dəstəklədiyini, işğalı pislədiyini birmənalı şəkildə bəyan edib. Alyansa üzv olan bir sıra ölkələrdə hərbi qüvvələr yerləşdirilib. ABŞ Rumıniyaya bölmələr yerləşdirib, Almaniya Litvaya əlavə qüvvələr göndərib, Böyük Britaniya isə Estoniyadakı hərbi mövcudluğunu xeyli artırıb. Amma Ukrayna hakimiyyəti göstərilən hərbi yadımın kifayət etmədiyini bildirir. Prezident Zelenski NATO-nu Ukrayna hava məkanını bağlamağa, hərbi təyyarələr və digər dəstək verməyə çağırır. Amma bu dəstək göstərilmir. Görünən odur ki, kimlərəsə bu müharibənin bitməsi sərf etmir. Burada ABŞ öndə gedir. Amerika Rusiyanı dünyada özünə başlıca rəqiblərdən biri kimi görür və Ukrayna problemindən istifadə edərək Rusiyanı çökdürməyə çalışır. Artıq sanksiyalar Rusiya iqtisadiyyatına ciddi təsir etməkdədir. Müharibənin uzanması Rusiyanın hərbi cəhətdən də itkilərini artırır. Müharibənin dayanmaması ilə bağlı ABŞ-ın mövqeyinə Avropadakı tərəfdaşları da dəstək verir. Amma Böyük Britaniya bu prosesdə fərqli görünür”.

A.Nərimanlı qeyd edib ki, bu müharibənin bitməsi üçün ən çox səy göstərən ölkələr Azərbaycan və Türkiyədir: “Müharibənin ilk günlərindən iki qardaş ölkə tərəflər arasında razılığın əldə olunması üçün böyük səylər göstərir. Azərbaycan Prezidenti İlham Əliyev rusiyalı həmkarı Vladimir Putinlə bir neçə dəfə telefonla danışıb, o cümlədən diplomatlarımız çərçivəsində də fəal təmaslar olub. Biz müharibədən əziyyət çəkmiş ölkəyik, ona görə də onun ağrılı nəticələrini yaxşı bilirik. Bu səbəbdən də, müharibənin tezliklə bitməsini arzulayırıq. Eyni zamanda, qardaş Türkiyə dövləti də çox böyük işlər aparır. Həm Prezident Rəcəb Tayyib Ərdoğan, həm də Mövlud Çavuşoğlu ukraynalı və rusiyalı həmkarları ilə fəal təmasdadırlar. Antalya Diplomatiya Forumu çərçivəsində Ukrayna və Rusiya xarici işlər nazirlərinin görüşünün təşkil edilməsi Türkiyənin uğuru idi. Türkiyə və Rusiya prezidentlərinin əldə etdiyi razılaşmaya görə, Ukrayna və Rusiya nümayəndə heyətlərinin növbəti görüşü İstanbulda keçirilir. Bütün bunlar həqiqətən sülhün əldə olunması üçün real addımlardır”.

Paylaş:

Baxılıb: 597 dəfə