Kopırkinin “Qarabağ nağılları”...

Bakı:

17 °C

88 %

4 m/s

Əlaqə

AZ RU EN

Ana səhifə / Siyasət / Kopırkinin “Qarabağ nağılları”...

Kopırkinin “Qarabağ nağılları”...

05.11.2022 [10:38]

Rusiyanın İrəvandakı səfiri erməni auditoriyasının diqqətini cəlb etməyə çalışır

Oktyabrın 31-də baş tutan Soçi görüşü Azərbaycanın qətiyyətli mövqeyini bir daha nümayiş etdirdi - Prezident İlham Əliyevin “Qarabağ münaqişəsi artıq tarixdə qalıb. O, iki il bundan əvvəl həll edilib. Buna görə də bu baxımdan burada praktiki olaraq müzakirə edilməli məsələ yoxdur” fikri qarşı tərəfi “narahat edən” bütün məqamlara aydınlıq gətirdi. Beləliklə, Ermənistan, o cümlədən problemin həllinin uzanmasını istəyən dairələr Azərbaycanın qəti mövqeyinin şahidi oldu. Amma görünən budur ki, həmin dövlətlər yeni spekulyasiyalara əl atmağa niyyətləniblər. Məsələn, Rusiyanın İrəvandakı səfiri Sergey Kopırkinin azsaylı erməni əhalisinin “statusu” məsələsinin gələcək nəsillərin öhdəsinə buraxılmalı olduğunu iddia etməsi bunu sübut edir.

Bəli, səfirin bu “iddiası” ilkin növbədə diplomatik etiketdən kənardır. Çünki bir dövlətin daxili işinə qarışmaq, onunla bağlı hansısa “fikri” söyləmək yanlışdır. Digər tərəfdən, 44 günlük müharibənin nəticələri və Azərbaycan Prezidentinin “hər hansı bir statusdan söhbət belə gedə bilməz” bəyanatı bu iddiaya ən düzgün cavabdır. Səfirin Ermənistana xoş gəlmək üçün söylədiyi bu iddianın heç bir əsası yoxdur.

Bəzi ekspertlərin fikrincə, səfirin bu açıqlamasının arxasında Rusiya prezidenti Vladimir Putinin “Valday” diskussiya klubunda etdiyi çıxışın tezisləri dayanır. Putinin ermənilərə verdiyi mesajdan “təsirlənərək” belə fikirlər səsləndirən səfir bununla Ermənistanın daxili auditoriyasına “müraciət edir”, onlara olmayan, boş ümidlər verir. Amma bu addım da uğursuzdur.

Xatırladaq ki, Rusiya Xarici İşlər Nazirliyi səfir Kopırkinə töhmət verib. Belə ki, Kreml Ermənistandakı fövqəladə və səlahiyyətli səfiri Sergey Kopırkinin işindən narazıdır. Səfir Rusiyanın Ermənistanda yürütdüyü real siyasi xətti həyata keçirə bilməməkdə, ona tapşırılan konkret tapşırıqların faktiki olaraq yerinə yetirilməməsində və nəticədə anti-Rusiya əhval-ruhiyyəsinin güclənməsində ittiham olunub. Demək ki, özünü “sığortalamağa” çalışan səfir düşdüyü çətin durumdan Azərbaycanın əleyhinə, yalan, boş fikirləri ilə çıxmaq istəyir. Amma onun bu cəhdi də fiaskoya məhkumdur.

Məsələ ilə bağlı fikirlərini bölüşən politoloq Qabil Hüseynli uğursuz adlandırdığı bu fikrin ortaya atılmasının bir neçə səbəbinin olduğunu bildirib. Politoloqun fikrincə, səfirin bu iddiası Valday Diskussiya Klubunda Rusiya prezidentinin çıxışı ilə həmahəngdir: “Rusiya Ermənistanın Qərbə tərəf meyil etməsindən ehtiyatlandığı üçün onu yenidən özünə cəlb etməyə çalışır. Səsləndirilən yersiz fikirlərin arxasında da məhz bu amil dayanır. Soçi görüşü zamanı Azərbaycan Prezidenti İlham Əliyevin “Qarabağ münaqişəsi artıq tarixdə qalıb” fikrini səsləndirməsi, eyni zamanda görüşün yekunu ilə bağlı imzalanan bəyanatda bu haqda bir sözün belə yer almaması Azərbaycanın qəti diplomatik qələbəsidir. Bu fikirlər məsələnin həll edildiyini göstərir. Səfir isə guya Qarabağ məsələsinin həll edilmədiyini, guya gələcək nəsillər tərəfindən həll edilə biləcəyini irəli sürür. Belə fikirləri qəbul etmək mümkün deyil. Hətta onun təhlükəli olduğunu da qeyd etmək lazımdır”.

Politoloqun fikrincə, Azərbaycan 44 günlük müharibədə əldə etdiyi qələbə nəticəsində regionda yeni siyasi reallıqlar yaradıb və bu reallıqlar hər kəs tərəfindən də qəbul edilib. “Rusiyanın son davranışları müəyyən mənada anlaşılandır. Brüssel sülhyaratma prosesinə mane olmaq, hətta vəziyyəti indiki halda dondurmaq üçün edilən cəhdlər boşa çıxır. Azərbaycan özünün qətiyyətini nümayiş etdirir. Artıq Rusiyanın başqa əlacı qalmayıb. Bu kimi siyasi manipulyasiyalarla Ermənistanın Qərbə üz tutmasının qarşısını almağa çalışırlar. Təbii ki, adını vasitəçi qoymuş bir ölkənin rəsmilərinin bu kimi fikirlərlə çıxış etməsi absurddur”, -deyə Q.Hüseynli əlavə edib.

P.İSMAYILOV

Paylaş:

Baxılıb: 669 dəfə