“Miatsum” kitabı bağlandı!

Bakı:

10 °C

93 %

1 m/s

Əlaqə

AZ RU EN

Ana səhifə / Siyasət / “Miatsum” kitabı bağlandı!

“Miatsum” kitabı bağlandı!

05.10.2023 [10:16]

3 “prezident”, 1 “spiker”, 1 “dövlət naziri”, 1 “müdafiə naziri və müavini”...

Azərbaycana qarşı cinayət törədənlər qanun qarşısında cavab verirlər

Antiterror tədbirlərinin bitməsi ilə xunta rəhbərlərinin ədalət məhkəməsi önündə dayanması mərhələsinə start verildi. Ruben Vardanyan, ardından Manukyan, Mnatsakanyan, daha sonra Saakyan, Qukasyan, Arutyunyan və İşxanyan Bakıya gətirildilər. Bu, Azərbaycanın qələbəsi olmaqla yanaşı, beynəlxalq hüququn öz yerini tapmasıdır. Ölkə qanunlarını pozaraq separatçılıq meyllərinə rəvac verənlər, 30 ilə yaxın müddətdə azərbaycanlılara qarşı kütləvi soyqırımları təşkil edənlər, təxribatlar nəticəsində insanlarımızı qətlə yetirən cinayətkarlar bu gün mühakimə olunurlar. Onların cinayətləri isə bəşəri cinayətlərdir və bütün insanlığa qarşı yönəlib.

Azərbaycanın qətiyyəti...

Son proseslər bir sıra həqiqətlərin üzərinə yenidən işıq saldı - hüququn aliliyinin təmin olunmasını özünün prioriteti elan etmiş Azərbaycan dövləti hər zaman bəyan etdiyi prinsiplərə sadiqdir. Hələ II Qarabağ müharibəsi öncəsi Azərbaycan dövləti məsələlərin sülh ilə həll edilməsinin tərəfdarı kimi çıxış edir, işğala və təcavüzə məruz qalmasına baxmayaraq danışıqlar yoluna sadiqlik nümayiş etdirirdi. Bizim hüquq, beynəlxalq konvensiyalara əsaslanan haqlı mövqeyimizin qarşılığında Ermənistanın siyasi hakimiyyəti, qondarma rejimin rəhbərləri daha böyük “iştaha düşür”, yaratdıqları nağıllara inanırdılar. Nəhayət 2020-ci ildə Azərbaycan öz gücü ilə bu haqsızlığa son qoydu. Vətən müharibəsi Ermənistanın kapitulyasiya imzalaması ilə nəticələndi. Kapitulyasiyadan ötən 3 ilə yaxın dövr ərzində isə dövlətimiz daim qondarma rejimə xitabən bildirib ki, onların təslim olmaqdan başqa, Qarabağda yaşayan erməni sakinlərin rahat reinteqrasiyasına imkan verməkdən savayı yolu yoxdur. Ölkəmizə qarşı törədilən təxribatçı hərəkətlərə verilən layiqli cavablar isə terrorizmə əsaslanan qondarma rejim üçün son xəbərdarlıqlar idi. Bu il mayın 28-də Prezident İlham Əliyev Laçın şəhərində, Azərbaycan Xalq Cümhuriyyətinin yaranmasının 105-ci ildönümündə bildirmişdi ki, onların kitabı bağlanıb: “ Buradan - uzun illər istismar etdikləri, qanunsuz məskunlaşdıqları Laçın diyarından onlara bir daha deyirəm ki, sizin kitabınız bağlandı. “Miatsum” kitabı bağlandı, separatizmin kitabı bağlandı. Müstəqillik xülyası statusun dalınca getdi. Statusu isə biz hələ İkinci Qarabağ müharibəsi zamanı göndərmişik lazım olan yerə. Ona görə, yeganə yol qalıb - Azərbaycan qanunlarına tabe olmaq, Azərbaycanın loyal normal vətəndaşı olmaq, öz dı?naqarası saxta dövlət atributlarını zibil yeşiyinə atmaq, “parlament”i buraxmaq. Guya orada “parlament” fəaliyyət göstərir, guya orada prezident var, guya nazir var, bunlar hamısı gülməlidir. Biz, sadəcə olaraq, dözüm göstəririk. Halbuki hər kəs yaxşı bilir ki, bu gün o bölgədə istənilən əməliyyatı keçirmək üçün hər bir imkanımız var. Ona görə “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər. Ancaq o təqdirdə hər hansı bir amnistiyadan söhbət gedə bilər”.

Qolubağlı ədalət mühakiməsində

Bu gün Azərbaycan Prezidentinin fikirləri, sözləri yenidən reallıqda özünü əks etdirir. Qondarma rejimin “3 prezidenti”, “1 parlament sədri”, “1 dövlət naziri”, “1 müdafiə naziri və müavini” Bakıda ədalət mühakiməsinə cavab verir. Hələ aylar öncə Azərbaycana qarşı hədə-qorxu ritorikası ilə danışan Araik Artyunyan indi Azərbaycan hüquq “mühafizə orqanlarının başlatdığı istintaq prosesində dindirilir. Vaxtilə Azərbaycana qarşı təxribatlar törədən Ruben Vardanyan bu gün məhkəmə qarşısına çıxarılır. Eyni zamanda, antiterror tədbirləri başlamamışdan öncə Xankəndidə “müqavimət” yaratmaq üçün cəm olan Qukasyan və Saakyan qolubağlı Bakıya gətirilib. Bu fakt dünya üçün çox mühüm əhəmiyyət kəsb edir - Azərbaycan bir daha bütün bəşəriyyətə hüququn aliliyininin təmin olunmasının mexanizmini nümayiş etdirdi. Azərbaycan növbəti dəfə haqqın - ədalətin qazandığı zəfərin təntənəsini ortaya qoydu...

Terrora açıq dəstək

Bəli, bu faktdır ki, Azərbaycan İsraildən sonra ikinci ölkədir ki xalqına qarşı hərbi cinayətlər və terror törətmiş şəxsləri tapır və həbs edir. Bunun mexanizmini özü tərtib edir. Antiterror tədbirləri Azərbaycan üçün olduqca mühüm idi - çünki Vətən müharibəsindən ötən 3 il ərzində dünya ictimaiyyəti, beynəlxalq aləm haqq səsimizə qarşı lazımi dəstəyi göstərmirdi. Bəzən beynəlxalq oyunçular içindən Fransa kimi ölkələr tapılırdı ki, separatizmə haqq qazandırır, onların müdafiəsini təşkil etməyə çalışırdı. Aylarla davam edən “humanitar tır” şousu buna bariz misaldır. Nəticədə Azərbaycan son addımı da atdı - cinayətkarları özü cəzalandırmalı oldu. Çünki bu hərbi cinayətkarları cəzalandırmaq üçün beynəlxalq tribunal yaratmaq istəmirlər, əksinə indi də onların müdafiəsinə çıxırlar, bəyanatlar səsləndirirlər. Hər zaman haqq-ədalətdən, demokratiyadan və insan hüquqlarından danışan bu ölkələr və güclər bilməlidirlər ki, bu, terrora açıq dəstəkdir...

P.İSMAYILOV

Paylaş:

Baxılıb: 536 dəfə