Sosial sahibkarlıqla dəyişən dünya

Bakı:

30 °C

40 %

2 m/s

Əlaqə

AZ RU EN

Ana səhifə / Sosial / Sosial sahibkarlıqla dəyişən dünya

Sosial sahibkarlıqla dəyişən dünya

21.11.2025 [08:33]

Sosial sahibkarlar yaşadığı cəmiyyətin rifahını artırmaq, mövcud sosial və ekoloji problemlərə dayanıqlı və innovativ həllər tapmaq üçün çalışırlar. Dünyada sosial sahibkarlığa diqqəti artırmaq üçün hər il noyabr ayının 3-cü cümə axşamı günü “Sosial Sahibkarlıq Günü” kimi qeyd olunur

Sosial sahibkarlıq nədir?

Sosial sahibkarlıq sosial problemləri tanımaq və sahibkarlıq prinsiplərini tətbiq etməklə sosial problemi həll etmək və sosial dəyişikliyə nail olmaqdan ibarətdir. Bu müəyyən bir sosial problemi tamamilə müəyyənləşdirmək üçün araşdırma aparmaq və sonra istənilən dəyişikliyə nail olmaq üçün sosial təşəbbüsü təşkil etmək, yaratmaq və idarə etməkdir. Dəyişiklik sosial problemin hərtərəfli aradan qaldırılmasını təmin edə bilər. Və yaxud mövcud şəraitin yaxşılaşdırılmasına yönəlmiş ömür boyu davam edən bir proses ola bilər.

Ənənəvi sahibkarlıq yeni bir iş qurmaq və ya mövcud biznesi inkişaf etdirmək üçün liderlik etmək demək olsa da, sosial sahibkarlıq mənfəət və ya investisiyanın qaytarılmasından daha çox sosial kapitalın yaradılmasına diqqət yetirir. Bu sahənin işçiləri əsasən qeyri-kommersiya təşkilatları və sektorları ilə işləyirlər. Ancaq bu o demək deyil ki, ümumiyyətlə gəlir əldə etməməlidir. Çünki sosial sahibkarlığın fəaliyyətini davam etdirməsi və cəmiyyətə davamlı fayda göstərməsi üçün müəyyən bir büdcə tələbatı var.

Sosial sahibkarlıq sosial problemlərlə yanaşı, ictimai və ekoloji problemlərə də biganə qalmır. Uşaq hüquqları fondları, qadınların səlahiyyətlərinin artırılması fondları və tullantı emalı zavodları sosial təşəbbüslərə nümunə ola bilər. Sosial sahibkarlar, həmçinin ictimai tədbirlər və fəaliyyətlər vasitəsilə vəsait toplayan qeyri-kommersiya və qeyri-hökumət təşkilatları ilə əlaqəli şəxslər ola bilərlər.

Sosial sahibkarlığın əhəmiyyəti

Dünya Sosial Sahibkarlıq Günü sosial sahibkarlıq sahəsindəki uğurları qeyd etmək və bu sahəyə marağı artırmaq məqsədini güdür. Bu günün keçirilməsi, yalnız yeni iş ideyalarının, texnologiyaların və layihələrin tanıdılmasına deyil, həm də cəmiyyətin mövcud problemlərinə qarşı davamlı həllərin tapılmasına dəstək verir. Bu tədbir həmçinin sahibkarlara və iş adamlarına sosial məsuliyyətli biznes qurmanın yollarını göstərir.

Dünyada sosial sahibkarlıq

Dünyanın müxtəlif guşələrində sosial sahibkarlıq ideyası sürətlə böyüyür. Məsələn, Hindistan və Afrikada iqtisadiyyatın ən böyük problemlərindən biri olan yoxsulluğun aradan qaldırılması üçün sosial sahibkarlıq təşəbbüsləri genişlənir. Çində isə ətraf mühitin qorunmasına yönəlmiş sosial təşəbbüslər həm dövlət, həm də özəl sektor tərəfindən dəstəklənir.

Bundan başqa, inkişaf etmiş ölkələrdə sosial sahibkarlıq daha çox təhsil və səhiyyə sahələrində irəliləyişlərə xidmət edir. Məsələn, ABŞ-da qeyri-kommersiya təşkilatları və sosial müəssisələr, əhalinin təhsil və səhiyyə xidmətlərinə çıxışını artırmaq üçün uğurlu təşəbbüslər həyata keçirirlər.

Azərbaycanda sosial sahibkarlıq

Ölkəmizdə sosial sahibkarlıq modeli xüsusilə təhsil, səhiyyə və ətraf mühit sahələrində özünü göstərir. Gənc sahibkarlar və sosial cəhətdən həssas qrupların həyat şəraitini yaxşılaşdırmaq üçün müxtəlif layihələr həyata keçirirlər. Həmçinin ekoloji təmiz texnologiyaların tətbiqi və sosial cəhətdən məsuliyyətli bizneslər qurmaq üçün təlimlər və seminarlar təşkil edilir.

Azərbaycanda sosial sahibkarlıq həm də gənclərin işsizlik probleminin həllində önəmli bir rol oynayır. Gənc təşəbbüskarlar bizneslərini yaradaraq, həm özlərinə, həm də cəmiyyətə fayda gətirirlər. Bu sahənin daha da inkişafı, ölkəmizdəki sosial problemlərin həllinə mühüm töhfələr verə bilər.

Gələcəyə baxış...

Dünya Sosial Sahibkarlıq Günü sadəcə əlamətdar gün deyil, həm də cəmiyyətin inkişafına təkan verən bir çağırışdır. Bu günün qeyd olunması sosial sahibkarlığın əhəmiyyətini daha da artırır və bu sahədəki uğurları daha geniş auditoriyaya çatdırır. Sosial sahibkarlıq həm də uzunmüddətli, davamlı həllərin axtarılmasıdır.

Gələcəkdə sosial sahibkarlığın daha da böyüməsi və güclənməsi yalnız cəmiyyətin rifahını artırmaqla qalmaz, eyni zamanda iqtisadiyyatın dayanıqlılığını və hərtərəfli inkişafını təmin edər. Çünki sosial sahibkarlıq cəmiyyətin və dünyanın daha yaxşı bir yerə çevrilməsinin açarıdır.

Yeganə BAYRAMOVA

Paylaş:

Baxılıb: 640 dəfə