“Alov Qoruyanlar”

Bakı:

29 °C

44 %

4 m/s

Əlaqə

AZ RU EN

Ana səhifə / Sosial / “Alov Qoruyanlar”

“Alov Qoruyanlar”

20.05.2015 [09:51]

İlk Avropa Oyunlarının keçirilməsinə sayılı günlər qalıb. Hazırda ölkəmizdə bu idman yarışına ciddi hazırlıq işləri sürətlə davam edir və demək olar ki, dünya idman tarixində mühüm hadisə olacaq ilk Avropa Oyunlarına Azərbaycan tam hazırdır. İlk Avropa Oyunlarının Bakıda təşkili Azərbaycanın beynəlxalq nüfuzunun daha da artmasına, idman aləmində önəmli yer tutmasına şərait yaradacaq.
Sevindirici haldır ki, dünyanın diqqətini çəkən ilk Avropa Oyunlarını hazırda bütün ictimaiyyət nümayəndələri kimi gənclər, eləcə də, “Bakı-2015”in könüllüləri də səbirsizliklə gözləyirlər.
Ənənəmizə sadiq qalaraq “Yeni Azərbaycan” qəzetinin “Alov Qoruyanlar” adlı rubrikasında ilk Avropa Oyunlarında fəaliyyət göstərəcək növbəti könüllü gənclərimizi oxucularımıza təqdim edirik.
“Bakı-2015” Avropa Oyunlarının Azərbaycanda keçirilməsi, ilk növbədə, ölkəmizin adını bir daha Avropanın idman tarixinə yazacaq”. Bunu qəzetimizə Azərbaycan Memarlıq və İnşaat Universitetinin I kurs tələbəsi, “Bakı-2015”in könüllüsü Nigar Vəliyeva deyib. Onun sözlərinə görə, Azərbaycan bu Oyunlar vasitəsilə tolerant ölkə olduğunu dünyaya nümayiş etdirəcək: “Belə bir yarışın təşkil edilməsi və ölkəmizdə baş tutması bizə olan yüksək etimaddan irəli gəlir. Necə ki, bu gün ilk Olimpiya Oyunlarının keçirildiyi ölkə kimi Yunanıstanın adı çəkilir, eləcə də, Azərbaycan yüz illər keçməsinə baxmayaraq, ilk Avropa Oyunlarının təşkil olunduğu dövlət kimi tarixdə qalacaq. Azərbaycanın adı hər zaman müxtəlif viktorinalarda, bilik yarışmalarında səslənəcək. Hətta Avropa Oyunlarının məkanı dəyişəcək, amma ilk Oyunların təşkilatçısı, həmin Oyunlara ev sahibliyi edən Azərbaycanın birinciliyi dəyişməyəcək. İstər idman tarixində, istərsə də hər kəsin dilində Azərbaycan ilk Oyunların təşkilatçısı kimi anılacaq. Ona görə də bu tarixi qərarın ölkəmiz üçün xüsusi əhəmiyyəti var. Məhz bu səbəbdən birinci Avropa Oyunları müstəqillik dövründə ölkəmizin dünyaya yaxından tanıdılması üçün daha bir əlverişli imkan kimi xarakterizə edilməlidir”.
“İlk Avropa Oyunları bizi bütün dünyaya tanıdacaq. Yarışlar zamanı Azərbaycan bir daha tolerant, bütün dünyaya açıq bir ölkə olduğunu nümayiş etdirəcək”. Bunu isə Azərbaycan Dillər Universitetinin ikinci kurs tələbəsi, “Bakı 2015”in könüllüsü Əlilə Seyfulina deyib. O vurğulayıb ki, birinci Avropa Oyunları beynəlxalq aləmdə Azərbaycanın imicinin artması baxımından əhəmiyyətlidir: “Tək Avropa Oyunları deyil, ümumiyyətlə, beynəlxalq tədbirlərə ev sahibliyi etməsi Azərbaycanın beynəlxalq ictimaiyyətə tanıdılması baxımından çox önəmli və vacibdir. İdman oyunları bir fürsətdir ki, Azərbaycan idman sahəsində olan nailiyyətlərini dünyaya nümayiş etdirsin”.
“Bakı 2015”in könüllüsü paytaxtımızda keçiriləcək ilk Avropa Oyunlarında könüllülərin görəcəyi işlərdən də danışıb: “Biz bu Oyunlarda ölkəmizi təbliğ edəcəyik. Gələn qonaqlara Azərbaycan haqqında məlumatlar verəcəyik. Bu, çox gözəl, həm də qürurverici bir işdir. Mən bununla fəxr edirəm. Ölkəmiz Oyunlara ev sahibliyi etmək üçün böyük əmək sərf edib. Bunun qarşılığında isə bütün dünya Azərbaycanın nə qədər tolerant, eyni zamanda, inkişaf etmiş bir ölkə olduğunun bir daha şahidi olacaq”.
Vüsalə CAVANŞİR

Paylaş:

Baxılıb: 964 dəfə