Kreditlə istirahət

Bakı:

25 °C

69 %

8 m/s

Əlaqə

AZ RU EN

Ana səhifə / İqtisadiyyat / Kreditlə istirahət

Kreditlə istirahət

21.07.2026 [11:55]

Səyahət kreditlərinin üstünlükləri və riskləri...

Son illər insanların istirahət və turizm planlarını reallaşdırmaq üçün istifadə etdiyi maliyyə alətlərindən biri səyahət kreditləridir. Xüsusilə, yay mövsümünün gəlişi ilə birlikdə ölkə daxilində və xaricdə istirahət etmək istəyənlərin sayının artması bank sektorunda da yeni maliyyə məhsullarına tələbat yaradıb. Səyahət krediti ayrıca hüquqi kredit növü olmasa da, bir çox bank tərəfindən istehlak krediti və turizm şirkətləri ilə əməkdaşlıq çərçivəsində təqdim edilən maliyyə həlli kimi müştərilərə təklif olunur. Bu imkan sayəsində vətəndaşlar aviabiletlərin alınması, otel xərclərinin ödənilməsi, turpaketlərin əldə edilməsi, viza, sığorta və digər səyahət xərclərini hissə-hissə ödəmək imkanı qazanırlar.

Fürsətlə risk arasında incə xətt

İqtisadçı Fuad İbrahimovun “Yeni Azərbaycan”a açıqlamasına görə, səyahət kreditlərinin əsas üstünlüklərindən biri ondan ibarətdir ki, insanlar xüsusilə mövsümi endirimlər, erkən rezervasiya kampaniyaları və sərfəli tur paketləri təqdim olunan dövrlərdə maliyyə çatışmazlığı səbəbindən bu imkanlardan imtina etmək məcburiyyətində qalmırlar: “Lakin unutmaq olmaz ki, hər bir kredit öhdəlik deməkdir. Səyahət krediti götürməzdən əvvəl aylıq gəlirlər, ödəniş qabiliyyəti, faiz dərəcələri, kreditin ümumi dəyəri, komissiyalar və geri ödəmə müddəti diqqətlə hesablanmalıdır, çünki istirahətdən əldə olunan xoş təəssüratlar sonradan uzunmüddətli maliyyə çətinlikləri ilə əvəzlənməməli, qəbul edilən qərar ailə büdcəsinə uyğun şəkildə verilməlidir”.

Bu səhvləri etməyin...

Ekspert qeyd edib ki, səyahət kreditindən istifadə edərkən emosional qərarlardan uzaq durmaq, yalnız reklam kampaniyalarına əsaslanmamaq, müxtəlif bankların təkliflərini müqayisə etmək, kredit müqaviləsinin bütün şərtlərini diqqətlə oxumaq və ödəniş cədvəlini əvvəlcədən qiymətləndirmək olduqca vacibdir: “Çünki kiçik görünən faiz fərqləri və əlavə xidmət haqları uzunmüddətli perspektivdə kreditin ümumi məbləğinin əhəmiyyətli dərəcədə artmasına səbəb ola bilər. Bu gün səyahət kreditləri yalnız xarici ölkələrə istirahət etmək istəyənlər üçün deyil, Azərbaycanın turizm potensialından yararlanmaq, bölgələrdə yerləşən istirahət mərkəzlərinə, sanatoriyalara və kurort zonalarına səfər planlaşdıran insanlar üçün də əlverişli maliyyə aləti hesab olunur. Ölkə daxilində də turizm xidmətlərinin keyfiyyətinin yüksəlməsi və müxtəlif istirahət paketlərinin təqdim olunması bu istiqamətdə marağı artırır.

Nəticə etibarilə, səyahət krediti düzgün planlaşdırıldığı və maliyyə imkanlarına uyğun şəkildə seçildiyi təqdirdə insanların arzularını daha tez reallaşdırmasına kömək edən faydalı maliyyə mexanizmlərindən biri kimi qiymətləndirilə bilər. Ancaq unudulmamalıdır ki, ən uğurlu səyahət yalnız gözəl mənzərələr, maraqlı xatirələr və yeni təcrübələrlə deyil, eyni zamanda qayıdışdan sonra maliyyə sabitliyinin qorunması ilə tamamlanır. Məhz buna görə də hər bir kredit qərarı məsuliyyətli yanaşma əsasında verilməlidir”.

İqtisadçı bildirib ki, Azərbaycanda fəaliyyət göstərən bir sıra banklar təqdim etdikləri istehlak kreditləri və tərəfdaşlıq proqramları vasitəsilə səyahət məqsədli maliyyələşdirmə imkanı yaradır: “Son illər banklarla turizm şirkətləri arasında əməkdaşlığın genişlənməsi nəticəsində bəzi hallarda müştərilərə xüsusi kampaniyalar, faiz endirimləri, komissiyasız hissəli ödəniş imkanları təqdim edilir. Eyni zamanda bəzi bank kartları vasitəsilə əldə olunan keşbek, mil proqramları və səyahət sığortası kimi əlavə xidmətlər də ümumi xərclərin optimallaşdırılmasına kömək edir”.

Yeganə BAYRAMOVA

Paylaş:

Baxılıb: 441 dəfə