BANM-in tələbələri “Neft Daşları”nda təcrübədə

Bakı:

12 °C

82 %

2 m/s

Əlaqə

AZ RU EN

Ana səhifə / Sosial / BANM-in tələbələri “Neft Daşları”nda təcrübədə

BANM-in tələbələri “Neft Daşları”nda təcrübədə

21.07.2016 [09:28]

Bakı Ali Neft Məktəbinin (BANM) neft-qaz mühəndisliyi üzrə ikinci, üçüncü və dördüncü kurslarda təhsil alan 25 tələbəsi tədris ilində əldə etdikləri nəzəri biliklərinin zənginləşdirilməsi məqsədilə “Azneft” İstehsalat Birliyinin “Neft Daşları” neft və qazçıxarma idarəsində (“Neft Daşları” NQÇİ) tanışlıq və istehsalat təcrübəsi keçirlər.
BANM-dən AZƏRTAC-a bildiriblər ki, təcrübə proqramı çərçivəsində “Neft Daşları” NQÇİ-nin rəisi Qoçalı Mahmudov, idarə rəisinin sosial işlər üzrə müavini Zeynal Abdullayev, təcrübə proqramının rəhbəri, “Neft Daşları” NQÇİ-nin neftin, qazın hasilatı və nəqli üzrə istehsalat şöbəsinin rəisi Zabit Əhmədov və idarənin digər əməkdaşları tələbələrlə görüşərək onlar üçün yaradılmış şəraitdən danışıb, gənclərə müvafiq təlimatlar veriblər. Görüşdə, həmçinin BANM-in tələbələri üçün yaradılan imkanların, verilən praktik biliklərin onların gələcək karyeralarında əhəmiyyəti qeyd edilib. Tələbələrə platformadakı quyular və təhlükəsizlik qaydaları barədə ətraflı məlumat verilib.
Proqramın şərtlərinə əsasən, idarənin mühəndisləri tərəfindən təcrübə keçən ikinci kurs tələbələri üçün “Neft Daşları” NQÇİ-də gedən dəniz qazma işləri, neft yataqlarının təyin olunması prosesindən neftin tam istehsal və ixrac olunmasınadək gedən əməliyyatlarla, həmçinin neftçıxarma texnikası və müasir hasilat texnologiyası ilə əyani tanışlıq təşkil edilir. Gənclərə “Neft Daşları” NQÇİ-də gedən əməliyyatlar haqqında ətraflı məlumat verilir.
BANM-in yuxarı kurs tələbələri isə istehsalat təcrübələrini Azərbaycanın ən böyük platformalarından biri olan “Neft Daşları” NQÇİ-nin 1887 nömrəli neft və qazçıxarma üzrə stasionar dəniz özülündə keçirlər. Proqramın şərtlərinə əsasən hər bir istehsalat təcrübəsi keçən tələbə ilə müvəqqəti əmək müqaviləsi bağlanır və o, mühəndis və yaxud operator vəzifəsinə işə qəbul olunur. Təcrübənin yekununda tələbəyə işlədiyi vaxta və vəzifəsinə müvafiq olaraq əməkhaqqı ödənilir. Beləliklə, “Neft Daşları” NQÇİ-də təcrübə keçən tələbə işçi kimi fəaliyyət göstərərək staj qazanmış mütəxəssisə çevrilir. Tələbələr mədəndəki quyulara nəzarət edərək təyin olunduqları mühəndis və operator vəzifələrini təcrübəli işçilərin rəhbərliyi altında icra etməyə çalışırlar.
Qeyd edək ki, təcrübə müddətində BANM-in tələbələri “Neft Daşları” NQÇİ-nin yataqxanasında onlar üçün ayrılmış otaqlarda qalırlar. Tələbələr iş vaxtından sonra və istirahət günləri asudə vaxtlarını voleybol, futbol meydançalarında, qapalı idman zallarında, stolüstü tennis, bilyard və digər oyunlar oynamaqla keçirirlər. Beləliklə, BANM tələbələri keçdikləri təcrübə proqramı çərçivəsində praktik biliklər qazanmaqla yanaşı, həm də asudə vaxtlarını səmərəli keçirirlər.
Xatırladaq ki, BANM-in öz tələbələri üçün yaratdığı təcrübə imkanları onların nəzəri biliklərinin möhkəmləndirilməsinə dəstək olur, yüksək ixtisaslı, təcrübəli, dünya əmək bazarında rəqabətqabiliyyətli mütəxəssis kimi yetişmələrinə şərait yaradır.

Paylaş:

Baxılıb: 581 dəfə