Azərbaycan Mətbuat Şurası ilə İranın dövlət qurumu arasında əməkdaşlıq memorandumu imzalanıb

Bakı:

30 °C

49 %

2 m/s

Əlaqə

AZ RU EN

Ana səhifə / Sosial / Azərbaycan Mətbuat Şurası ilə İranın dövlət qurumu arasında əməkdaşlıq memorandumu imzalanıb

Azərbaycan Mətbuat Şurası ilə İranın dövlət qurumu arasında əməkdaşlıq memorandumu imzalanıb

11.11.2016 [10:12]

Azərbaycan Mətbuat Şurası ilə İranın Mədəniyyət və İslam İrşadı Nazirliyinin mətbuat və informasiya departamenti arasında əməkdaşlıq haqqında memorandum imzalanıb.
Mətbuat Şurasından AZƏRTAC-a bildirilib ki, 10 maddədən ibarət olan sənədi Tehranda səfərdə olan Şuranın sədri, Milli Məclisin deputatı Əflatun Amaşov və İranın mədəniyyət və islam irşadı nazirinin müavini Hossein Entezami imzalayıblar. Tərəflər razılığa gəliblər ki, onlar ölkələrində fəaliyyət göstərən media orqanlarını əməkdaşlıq qurmağa və onu möhkəmləndirməyə, xəbərlər, şəkillər, hesabatlar və s. daxil olmaqla, öz məhsullarının qarşılıqlı mübadiləsini həyata keçirməyə təşviq edəcəklər. Sənəddə informasiya nümayəndəliklərinin fəaliyyətə başlamasına və idarə edilməsinə dəstək göstərilməsi, bunun üçün ən yüksək səviyyəli hüquqi və texniki əməkdaşlıq məsələlərinin reallaşdırılması, kütləvi informasiya vasitələrinin proqramlar, xəbərlər, müsahibələr kimi birgə media layihələrinin gerçəkləşməsi üçün nəzərdə tutulan tədbir və təşəbbüslərinə kömək edilməsi, qarşılıqlı jurnalist səfərlərinin təşkili və digər məsələlər əksini tapıb.
Mədəniyyət və İslam İrşadı Nazirliyinin dəvəti ilə Tehranda səfərdə olan Əflatun Amaşov İran mətbuatı və xəbər agentlikləri məhsullarının 22-ci beynəlxalq sərgisi çərçivəsində keçirilmiş mərasimdə çıxış edib. O bildirib ki, Azərbaycan ilə İran arasında münasibətlər yüksək səviyyədədir. Bu münasibətlər qədim tarixə, xalqlarımız arasındakı mədəni yaxınlığa, adət-ənənə birliyinə söykənir. Azərbaycan və İran prezidentlərinin görüşlərində də bu məqam xüsusi vurğulanır. “Azərbaycanın və İranın kütləvi informasiya vasitələri arasında əlaqələr hər zaman olub. İran və Azərbaycan jurnalistlərinin çoxsaylı qarşılıqlı səfərləri reallaşıb. Lakin biz daha geniş müstəvidə əməkdaşlıq qurmağı düşünürük. Bunun üçün kifayət qədər münbit zəmin, ən əsası möhkəm iradə var. İranın Azərbaycandakı səfirliyi və Azərbaycan Mətbuat Şurası mövcud istiqamətdə birgə layihə reallaşdırmaqdadır. Layihə çərçivəsində İrandan Azərbaycana, Azərbaycandan isə İrana jurnalist səfərləri daha müntəzəm xarakter daşıyacaq. Eyni zamanda, birgə konfrans və seminarların, sərhədyanı bölgələrdə görüşlərin, jurnalistlər arasında müxtəlif idman yarışlarının təşkilini nəzərdə tuturuq”, - deyə Ə.Amaşov vurğulayıb.
Mətbuat Şurasının sədri çıxışında dünyada baş verən proseslərin regiona təsiri üzərində də dayanıb. O bildirib ki, mövcud şəraitdə bölgə, xüsusən də İran və Azərbaycan jurnalistləri yalnız təcrübə mübadiləsi aparmamalı, habelə regionumuzun bu gününü və sabahını nəzərdən keçirməlidirlər. Ə.Amaşov deyib: “Beynəlxalq miqyasda nəhəng media korporasiyaları var. Onlar dünya düzəninə böyük təsir göstərir, bir çox hallarda birtərəfli münasibət formalaşdırırlar. İran da, Azərbaycan da bu münasibətlə üzləşib. Ümumən İslam dünyasına münasibətdə ənənəvi mənfi baxış mövcuddur, islamofobiya var. Düşünürəm ki, media olaraq biz bu baxışa qarşı öz düşüncəmizi, haqq səsimizi ortaya qoymalıyıq. Zaman-zaman bunu edə bilməmişik. Əlbəttə, media prinsip etibarilə siyasətdən uzaqdır. Ancaq nəhəng media korporasiyaları da siyasətdən uzaq olduqlarını bəyan edərək dünyanın siyasi gündəminə təsir göstərirlər. Azərbaycan ərazisinin 20 faizi Ermənistan tərəfindən işğal olunub. Ümumən İslam coğrafiyasında münaqişəli bölgələr az deyil və bu bölgələrdə ədalət prinsipinə etinasız yanaşılır. Buna görə də ədaləti təbliğ edəcəyimiz platformaya ehtiyacımız var. Mövcud istiqamətdə fikir mübadiləsi aparmalıyıq, konkret nəticələr əldə etməliyik”.
Mətbuat Şurasının sədri Bakıda İslam Əməkdaşlıq Təşkilatına üzv Dövlətlərin Jurnalistləri Assosiasiyasının yaradılması ilə bağlı məqamlara toxunaraq fikirlərini əsaslandırıb.

Paylaş:

Baxılıb: 589 dəfə