İmişli Rayon Məhkəməsinin yeni müasir inzibati binası istifadəyə verilib

Bakı:

26 °C

69 %

2 m/s

Əlaqə

AZ RU EN

Ana səhifə / Sosial / İmişli Rayon Məhkəməsinin yeni müasir inzibati binası istifadəyə verilib

İmişli Rayon Məhkəməsinin yeni müasir inzibati binası istifadəyə verilib

30.03.2017 [09:41]

Azərbaycan Prezidenti İlham Əliyevin tapşırıqlarına əsasən, ədalət mühakiməsinin səmərəliliyinin artırılması üzrə aparılan islahatlar nəticəsində məhkəmə sistemi təkmilləşdirilib, yeni məhkəmələr təsis olunub, hakimlərin Avropada ən şəffaf seçim qaydaları müəyyən edilib, məhkəmə hakimiyyətinin yüksək statusuna uyğun infrastrukturunun müasirləşdirilməsi üzrə xeyli iş görülüb.
Bununla bağlı dövlət büdcəsi hesabına, habelə Dünya Bankı ilə birgə həyata keçirilən layihələr çərçivəsində paytaxtda və bölgələrdə 11 məhkəmə üçün yeni, müasir binalar və komplekslər tikilərək istifadəyə verilib. Hazırda isə 8 məhkəmə üçün bina və komplekslərin intensiv inşası aparılır. Dövlətimizin başçısının Bakının Yasamal, Sabunçu, habelə Şəki və Oğuz rayon məhkəmələri üçün yeni bina və komplekslərin açılışlarında şəxsən iştirak etməsi məhkəmə hakimiyyətinə verdiyi böyük önəmin bariz nümunəsidir.
Ədliyyə Nazirliyinin mətbuat xidmətindən AZƏRTAC-a bildiriblər ki, bu sahədə həyata keçirilən tədbirlərin davamı olaraq, martın 29-da İmişli rayonunda dövlət büdcəsi hesabına müasir tələblərə uyğun inşa edilən yeni məhkəmə binasının açılışı olub.
Mərasimdən əvvəl Ümummilli lider Heydər Əliyevin İmişli rayonunda abidəsi ziyarət olunaraq, xatirəsi dərin ehtiramla yad edilib.
Tədbirdə ədliyyə naziri, Məhkəmə-Hüquq Şurasının sədri Fikrət Məmmədov, İmişli rayon İcra Hakimiyyətinin başçısı Vilyam Hacıyev, Milli Məclisin deputatı, Demokratiya və İnsan Hüquqları Komitəsinin sədri Çingiz Qənizadə, bölgənin hakimləri, ədliyyə, prokurorluq, digər hüquq-mühafizə orqanlarının işçiləri, ictimaiyyət və KİV nümayəndələri iştirak ediblər.
Bina ilə tanışlıq zamanı bildirilib ki, ümumi sahəsi 2300 kvadratmetr olan, iki mərtəbədən və zirzəmi qatından ibarət məhkəmə binası digər yeni tikilmiş məhkəmə binalarında olduğu kimi, ictimai və inzibati zonalara bölünməklə müasir İKT ilə təchiz olunub. Azərbaycan Prezidentinin tapşırığına uyğun olaraq, burada elektron məhkəmə sisteminin tətbiqi ilə bağlı zəruri infrastruktur yaradılıb, o cümlədən videokonfransların, elektron sənəd dövriyyəsi və məhkəmə işlərinin idarə olunmasına xidmət edən və audio-video yazılışları aparan “Femida” sistemi və digər avadanlıq quraşdırılıb. Burada, həmçinin konfrans və iclas zalları, təlim otağı, kitabxana, arxiv, təqsirləndirilən şəxslərin saxlanması üçün kameralar, konvoy maşını üçün dayanacaq və digər sahələr mövcuddur.
BMT-nin Əlillərin Hüquqları Haqqında Konvensiyasına uyğun olaraq, İmişli Rayon Məhkəməsinin binasında əlillərin sərbəst hərəkəti üçün də bütün şərait yaradılıb.
Mərasimdə çıxış edən ədliyyə naziri Ulu öndər Heydər Əliyevin müəyyən etdiyi inkişaf strategiyasına uyğun olaraq dövlətimizin başçısı İlham Əliyevin rəhbərliyi ilə respublikamızın sosial-iqtisadi tərəqqisinin təmin olunduğunu vurğulayıb, ədliyyə və məhkəmə sahəsində aparılan islahatlar və yeniliklər barədə məlumat verib.
Prezident İlham Əliyevin ötən ay imzaladığı cəza siyasətinin humanistləşdirilməsinə dair Sərəncamın müstəsna əhəmiyyəti qeyd olunaraq, bununla bağlı məhkəmələrin üzərinə mühüm vəzifələrin düşdüyü bildirilib. İnsan haqlarının, xüsusilə azadlıq hüququnun qorunmasında hakimlərin yüksək məsuliyyəti diqqətə çatdırılaraq, bu mənada həbs qətimkan tədbirinin seçilməsinə həssas yanaşılmanın vacibliyi vurğulanıb. Eyni zamanda, məhkəmə fəaliyyətində şəffaflığın artırılması, qərarların ədalətliliyinin təmin edilməsi, vətəndaşlara layiqli xidmət göstərilməsi, qərəzli yanaşmanın, korrupsiyanın yolverilməzliyi qeyd edilib.
Nazir İmişli Rayon Məhkəməsinin müasir inzibati binasının istifadəyə verilməsinin məhkəmə sistemində aparılan islahatlara əlavə töhfə olmaqla məhkəmənin fəaliyyətinin yüksək səviyyədə təmin olunmasına, vətəndaşların müraciət imkanlarının asanlaşdırılmasına və insan hüquqlarının etibarlı təminatına xidmət edəcəyini bildirib.
Mərasimdə çıxış edən V.Hacıyev, Ç.Qənizadə və hakimlər regionların hərtərəfli tərəqqisinə, xüsusilə ədalət mühakiməsinin səmərəliliyinə və məhkəmə sisteminin inkişafına göstərdiyi xüsusi qayğıya görə dövlətimizin başçısı İlham Əliyevə dərin minnətdarlıqlarını ifadə ediblər.

Paylaş:

Baxılıb: 583 dəfə