Akademik Kamal Abdullanın “Kitabi-Dədə Qorqud” poetikasına giriş” kitabının elmi müzakirəsi olub

Bakı:

26 °C

62 %

9 m/s

Əlaqə

AZ RU EN

Ana səhifə / Sosial / Akademik Kamal Abdullanın “Kitabi-Dədə Qorqud” poetikasına giriş” kitabının elmi müzakirəsi olub

Akademik Kamal Abdullanın “Kitabi-Dədə Qorqud” poetikasına giriş” kitabının elmi müzakirəsi olub

21.06.2017 [09:33]

İyunun 20-də Azərbaycan Milli Elmlər Akademiyasının (AMEA) Əlyazmalar İnstitutunda akademik Kamal Abdullanın “Kitabi-Dədə Qorqud” poetikasına giriş” kitabının elmi müzakirəsi olub.
AZƏRTAC xəbər verir ki, Folklor İnstitutunun direktoru, akademik Muxtar İmanov K.Abdullanın bədii, elmi və ictimai-siyasi fəaliyyəti, “Kitabi-Dədə Qorqud” dastanı ilə bağlı araşdırmaları, Azərbaycan dilçilik elminin nəzəri məsələlərinə dair tədqiqatları barədə məlumat verib. Bildirilib ki, bu monoqrafiya müəllifin “Gizli Dədə Qorqud” silsiləsindən çalışmalarının məntiqi davamıdır. Əsərdə qədim mətnlərin poetik qatı ilə bağlı orijinal və yeni yanaşma təqdim edilir. “Kitabi-Dədə Qorqud” mətnləri üçün bu yanaşma bədiilik qatının immanent təhlil açarı ola bilər. Qədim yazılı abidələrin müxtəlif poetik qatlarının bir-birindən ayrı təhlili sonrakı birgə təhlilin platformasına çevrilir. Yeni nəşr mifologiya, yazılı abidələr, poetika, üslubiyyat, semiotika və semantika istiqamətində çalışanlar üçün dəyərli mənbədir. Kitab müqəddimə, iki ayrıca hissə, ümumi nəticə, son söz və əlavələrdən ibarətdir. Müqəddimədə kitabın adı haqqında müəllifin qeydləri, anaxronik mətn, mif dövrü mətninin xüsusiyyətləri və s. haqqında elmi təhlil yer alıb.
Akademik İsa Həbibbəyli dastan janrının formalaşmasından və inkişaf mərhələlərindən, ədəbiyyatımızda “Kitabi-Dədə Qorqud”un ilk tədqiqatlarından söz açıb, kitabla bağlı təəssüratlarını bölüşüb. Azərbaycan xalq ədəbiyyatının ən qədim yazılı abidəsi olan “Kitabi-Dədə Qorqud” dastanının 1300 illik yubileyinin keçirilməsi ilə əlaqədar Ümummilli lider Heydər Əliyevin müvafiq Fərmanını xatırladan akademik bundan sonra bu qədim abidə ilə bağlı elmi-tədqiqatların daha da genişləndirildiyini diqqətə çatdırıb.
Qeyd edilib ki, akademik K.Abdullanın yaradıcılığında bu mövzu mühüm yer tutur və geniş tədqiq olunur. Bu kitabda K.Abdulla “Kitabi-Dədə Qorqud” dastanının mifoloji qatının sistemini görüb, onu özünəməxsus şəkildə təqdim edib. O, “Kitabi-Dədə Qorqud” dastanlarının dili üzrə “Sintaktik paralelizm” mövzusunda namizədlik dissertasiyası müdafiə edib. Alimin qorqudşünaslığa dair “Gizli Dədə Qorqud”, “Sirriçində dastan və yaxud Gizli Dədə Qorqud - 2”, “Mifdən Yazıya - Gizli Dədə Qorqud” kitabları nəşr edilib.
K.Abdulla kitabdakı bəzi məqamlara aydınlıq gətirib, iştirakçıların monoqrafiya ilə bağlı suallarını cavablandırıb.
Akademik Teymur Kərimli və digər çıxış edənlər kitabla bağlı fikirlərini bildirib, monoqrafiyanın tədqiqatçılar üçün dəyərli mənbə olduğunu qeyd ediblər.

Paylaş:

Baxılıb: 1530 dəfə