“Azərbaycan gəncliyi 2017-2021-ci illərdə” Dövlət Proqramı gənclər siyasətində yeni mərhələ açacaq

Bakı:

19 °C

55 %

3 m/s

AZ RU EN

Ana səhifə / Sosial / “Azərbaycan gəncliyi 2017-2021-ci illərdə” Dövlət Proqramı gənclər siyasətində yeni mərhələ açacaq

“Azərbaycan gəncliyi 2017-2021-ci illərdə” Dövlət Proqramı gənclər siyasətində yeni mərhələ açacaq

19.09.2017 [10:07]

İnformasiya cəmiyyətinin sürətlə formalaşdığı hazırkı mərhələ Azərbaycan Respublikasında sosial-iqtisadi, elmi-mədəni, təhsil və digər sahələrdə gənclərin daha fəal iştirakını təmin etmək məqsədilə görülən işlərin daha mütəşəkkil formada həyata keçirilməsini və müasir çağırışlara cavab verməsini tələb edir. Məhz buna görə də gənclərin maraqlarının təmin edilməsi və iqtisadi-siyasi, sosial-ictimai proseslərdə gənclərin potensialından geniş istifadə olunmasına əlverişli zəmin yaradılması zəruridir. Bu baxımdan Prezident İlham Əliyevin Sərəncamı ilə təsdiq olunan “Azərbaycan gəncliyi 2017-2021-ci illərdə” Dövlət Proqramı mühüm əhəmiyyət kəsb edir.
Bunu “İrəli” İctimai Birliyinin sədri Mirhəsən Seyidov AZƏRTAC-a açıqlamasında deyib.
M.Seyidov qeyd edib ki, respublikamızda dövlət gənclər siyasətinin formalaşdırılması Ümummilli lider Heydər Əliyevin adı ilə bağlıdır. Ulu öndərin təşəbbüsü ilə Azərbaycan gənclər siyasətinin əsasını təşkil edən mühüm normativ hüquqi aktlar qəbul edilib, dövlət gənclər siyasətinin dəqiq icra mexanizmi yaradılıb. Ümummilli liderimizin bu sahədəki siyasətini uğurla davam və inkişaf etdirən Prezident İlham Əliyevin 2005-ci il 30 avqust tarixli Sərəncamı ilə təsdiq edilən “Azərbaycan Gəncliyi Dövlət Proqramı (2005-2009-cu illər)” dövlət gənclər siyasətinin yeni dövrün tələblərinə uyğun həyata keçirilməsi baxımından mühüm fəaliyyət sənədi olub. Həmin Proqramın icrası nəticəsində dövlət gənclər siyasətinin prioritet istiqamətləri üzrə müsbət dəyişikliklər baş verib, mühüm uğurlar əldə edilib. Daha sonrakı mərhələdə - 2011-ci ilin iyulunda dövlətimizin başçısının Sərəncamı ilə təsdiq olunan “Azərbaycan gəncliyi 2011-2015-ci illərdə” Dövlət Proqramı” bu sahədə daha böyük uğurların qazanılmasına, gənclərin şəxsi inkişafına, genişmiqyaslı tədbirlərin reallaşdırılmasına təkan verib. Gənclərimiz bu dövlət proqramları çərçivəsində onlar üçün yaradılan imkanlardan hərtərəfli yararlanıblar.
“Prezident İlham Əliyevin Sərəncamı ilə təsdiq olunan “Azərbaycan gəncliyi 2017-2021-ci illərdə” Dövlət Proqramı “Azərbaycan 2020: gələcəyə baxış” İnkişaf Konsepsiyası əsasında hazırlanıb. Bu proqramın qəbul olunması gənclərin inkişafına dəstək verməklə yanaşı, onların qarşısına bir çox mühüm vəzifələr qoyub. Dövlət Proqramı bundan öncəki illərdə həyata keçirilən gənclər siyasətinin uğurlarına hesablanıb. Bu proqramda gənclərin vətəndaşlıq və vətənpərvərlik tərbiyəsi, sağlamlığı, məşğulluğu, gənc sahibkarların fəaliyyətinin stimullaşdırılması, gənclərin yaradıcılıq və asudə vaxtlarının səmərəli dəyərləndirilməsi, gənclərin və gənclər təşkilatının fəaliyyətinin dəstəklənməsi, beynəlxalq əməkdaşlıq, gənclərin hüquq və informasiya texnologiyaları sahəsində bilik və bacarıqlarının artırılması, xüsusi qayğıya ehtiyacı olan gənclərin cəmiyyətə inteqrasiyası və s. vacib məsələlər əksini tapıb. Yeni Dövlət Proqramının təsdiq olunması Prezident İlham Əliyevin Azərbaycanda gənclərin inkişafına, bu sahədə dövlət siyasətinə verdiyi önəmin göstəricisidir. Proqramın icrasından yararlanacaq Azərbaycan gəncliyi vətənpərvər, sağlam, intellektual, beynəlxalq rəqabətə davamlı gənc kimi formalaşacaq”, - deyə M.Seyidov qeyd edib.

Paylaş:

Baxılıb: 585 dəfə