Şəmkirdə aztəminatlı ailələr üçün meyvə bağları salınıb

Bakı:

12 °C

87 %

1 m/s

Əlaqə

AZ RU EN

Ana səhifə / Sosial / Şəmkirdə aztəminatlı ailələr üçün meyvə bağları salınıb

Şəmkirdə aztəminatlı ailələr üçün meyvə bağları salınıb

14.10.2017 [09:40]

Oktyabrın 13-də Leyla Əliyevanın təsisçisi və rəhbəri olduğu IDEA İctimai Birliyi, həmçinin Ekologiya və Təbii Sərvətlər Nazirliyi, BMT-nin Ərzaq və Kənd Təsərrüfatı Təşkilatı, Heydər Əliyev Fondunun “Regional İnkişaf” İctimai Birliyi və “Cavan” Gənclər Hərəkatı İctimai Birliyinin birgə təşəbbüsü ilə Şəmkirdə aztəminatlı ailələr üçün meyvə bağları salınıb.
AZƏRTAC xəbər verir ki, bu münasibətlə keçirilən tədbirdə çıxış edən Şəmkir rayon İcra Hakimiyyətinin başçısı Alimpaşa Məmmədov və İcra Hakimiyyəti başçısının müavini Aynur Abdullayeva Azərbaycana rəhbərlik etdiyi illərdə Ulu öndər Heydər Əliyevin ekoloji problemlərin həllini daim diqqətdə saxladığını bildiriblər. Qeyd olunub ki, müəllifi Ulu öndər olan konstitusiyamızda da ölkə ərazisində mövcud ekoloji problemlərin həlli, təbiətin mühafizəsi, təbii sərvətlərdən xalqımızın rifahının yaxşılaşdırılması naminə səmərəli istifadə olunması öz əksini tapıb.
Diqqətə çatdırılıb ki, Prezident İlham Əliyevin imzaladığı fərmanlarda, təsdiq etdiyi Dövlət proqramlarında da ekoloji problemlərin həlli üçün zəruri olan bütün vəzifələr elmi əsaslarla müəyyənləşdirilib.
Çıxışlarda Birinci vitse-prezident Mehriban xanım Əliyevanın və IDEA İctimai Birliyinin rəhbəri Leyla Əliyevanın bu istiqamətdə xidmətlərindən danışılıb.
Sonra ağacəkmə aksiyası keçirilib, Şəmkir rayon İcra Hakimiyyəti tərəfindən ayrılmış 2,5 hektarda 1200 meyvə ağacı əkilib. Salınan meyvə bağı Şəmkir rayonunda yaşayan aztəminatlı ailələr, o cümlədən Qarabağ müharibəsi veteranı və şəhid ailələri arasında bölünərək onların təmənnasız istifadəsinə verilib. Aztəminatlı ailələr meyvə bağlarına qulluq göstərəcək, yetişdirilən məhsuldan maddi rifahlarını yaxşılaşdırmaq üçün istifadə edəcəklər. Aksiyaya Şəmkir rayon İcra Hakimiyyətinin nümayəndələri də qoşulublar.
Qeyd edək ki, aztəminatlı ailələr üçün meyvə bağlarının salınması oktyabr-noyabr ayları ərzində Qax, Sabirabad, Beyləqan, Lənkəran, Ağdaş, Tovuz və Ağstafa rayonlarında, gələcəkdə isə ölkənin digər rayonlarında təşkil ediləcək. Layihənin ilkin mərhələsində fındıq, nar, ərik, feyxoa, xurma növlərindən olmaqla, ümumilikdə, 9000-ə yaxın meyvə ağacının əkilməsi nəzərdə tutulub.
Layihənin sosial-iqtisadi əhəmiyyəti ondan ibarətdir ki, bu cür bağların salınması əhalinin rifahının yaxşılaşdırılması ilə yanaşı, ölkəmizin kənd təsərrüfatı mallarının idxalından asılılığının azaldılmasına da töhfə verəcək.
Meyvə ağaclarının əkilməsi üzrə pilot layihəyə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri, BMT-nin Ərzaq və Kənd Təsərrüfatı Təşkilatının xoşməramlı səfiri Leyla Əliyevanın təşəbbüsü ilə 2017-ci ilin aprel ayında başlanılıb. Layihə çərçivəsində ilk meyvə bağı İsmayıllı rayonunda salınıb və 3 aztəminatlı ailənin təmənnasız istifadəsinə verilib.

Paylaş:

Baxılıb: 455 dəfə