Azərbaycanlı doktorant Rusiyada qalib oldu

Bakı:

29 °C

53 %

3 m/s

Əlaqə

AZ RU EN

Ana səhifə / Sosial / Azərbaycanlı doktorant Rusiyada qalib oldu

Azərbaycanlı doktorant Rusiyada qalib oldu

28.11.2018 [09:49]

İlyas Hüseynov beynəlxalq elm-təhsil forumunda “Ən yaxşı natiq” nominasiyası üzrə birinci yerə layiq görülüb
Son dövrlərdə Azərbaycanda digər sahələrdə olduğu kimi, gənclər siyasəti istiqamətində də çox mühüm nailiyyətlər əldə edilib. Məhz görülən işlərin nəticəsidir ki, bu gün Azərbaycan gəncləri böyük uğurlara imza atır, cəmiyyət həyatında mühüm rol oynayırlar.
Belə gənclərimizdən biri də Bakı Slavyan Universitetinin beynəlxalq münasibətlər ixtisası üzrə doktorantı İlyas Hüseynovdur. O, 9-14 oktyabr tarixlərində Rusiya Federasiyası Qaraçay-Çərkəz Respublikasında keçirilən PROnatiqlik “Multikultural mühitdə ictimai çıxışların, danışıqların, debatların aparılması sənəti” adlı beynəlxalq elm-təhsil forumunda Azərbaycanı təmsil edib. İ.Hüseynov “Ən yaxşı natiq” nominasiyası üzrə birinci yerə layiq görülərək müvafiq fəxri fərmanla və kubokla təltif olunub.
Qəzetimizin qonağı olan İlyas Hüseynov oxucularımızla öz hisslərini bölüşüb: “Belə nüfuzlu elm-təhsil forumunda Azərbaycan təmsilçisinin qalib gəlməsi son dərəcə qürurvericidir. Qalib gələrkən Azərbaycanın və keçmiş SSRİ-nin Xalq artisti Müslüm Maqomayevin “Azərbaycan” mahnısının sədaları altında təqdim olundum. Qələbəmiz Rusiya Federasiyasının mətbuat orqanlarında da geniş işıqlandırıldı. Ən böyük arzum Vətənimi beynəlxalq arenada layiqincə təmsil etmək olub”.
Həmyerlimizin sözlərinə görə, layihə Rusiyanın Qorçakov adına Fondunun və Prezident Qrantları Fondunun maliyyə dəstəyi ilə həyata keçirilib. Bu beynəlxalq forumda Azərbaycan da daxil olmaqla, Rusiya Federasiyasının müxtəlif subyektlərindən, Amerika Birləşmiş Ştatlarından, Zambiyadan, Bolqarıstandan, Sloveniyadan, Tacikistandan, Serbiyadan, Ukraynadan və Ermənistandan 50 nümayəndə iştirak edib.
İ.Hüseynov bildirib ki, sözügedən layihə bir neçə mərhələdə reallaşıb - əvvəlcə iştirakçılar özündə müxtəlif formatlı (testlər, video materiallar, audio dərslər) nəzəri və praktiki tapşırıqları birləşdirən distant təlim kursu keçiblər. Daha sonra qiyabi təhsili uğurla başa vuran seçilmiş iştirakçılar yeni biliklər qazanmaqla yanaşı, növbəti mərhələyə keçid alıblar. Rusiya Federasiyası Qaraçay-Çərkəz Respublikasının Arxız qəsəbəsində isə layihənin əyani mərhələsi keçirilib.
Həmçinin iştirakçılar təhsil proqramlarının mənimsənilməsi üçün nəzərdə tutulmuş 4 günlük gücləndirilmiş kurs və praktiki məşğələlər (müzakirələr, danışıqlar, ictimai çıxışlar, interaktiv oyunlar və müxtəlif tapşırıqlar) keçiblər. PROnatiqlik forumunda ekspertlər qismində çıxış edən təlimçilər arasında Rusiyada natiqliklə bağlı yüzlərlə seminar təşkil edən, böyük diplomatik staja malik olan, dünyanın müxtəlif universitetlərində mühazirələr oxuyan beynəlxalq səviyyəli natiqlər iştirak ediblər. Parlament debatları formatında təşkil olunan “Qafqaz debatları” mərhələsində iştirakçılar iki mərhələdə keçirilən nəzəri təlimlərdə qazandıqları bilikləri əyani şəkildə nümayiş etdirmək şansı əldə ediblər: “Debatlarda “Pensiya islahatı - dövlətin məcburi tədbiridir”, “ABŞ hökuməti “Stand your ground” qanununun geniş yayılmasından təəssüflənir”, “İnkişaf etməkdə olan ölkələr Qərb inkişaf yolunu seçməlidirlər” kimi aktual mövzular müzakirə olundu. Deyə bilərəm ki, PROnatiqlik forumunun nəticəsində natiqlik sənətinin bir sıra sirlərinə yiyələnmiş olduq. Eyni zamanda, konstruktiv dialoq meydançalarında öz məharətimizi nümayiş etdirmək, o cümlədən debatlar və ictimai çıxışların peşəkarları ilə ünsiyyətdə olmaq imkanı əldə etdik”.
Qeyd edək ki, auditoriyanın tərkibinin müxtəlif mədəni, milli, dini və digər xüsusiyyətləri nəzərə alınmaqla təşkil olunması forumun əhəmiyyətini xüsusilə artıran amillər sırasına daxil olub. Layihənin sonunda Natiqlərin Beynəlxalq İttifaqının əsasnaməsi yekdilliklə qəbul edilib.
MÜŞFİQƏ

Paylaş:

Baxılıb: 579 dəfə