Bakı Ali Neft Məktəbi yeni tədris ilinə uğurla başlayır

Bakı:

28 °C

43 %

3 m/s

Əlaqə

AZ RU EN

Ana səhifə / Sosial / Bakı Ali Neft Məktəbi yeni tədris ilinə uğurla başlayır

Bakı Ali Neft Məktəbi yeni tədris ilinə uğurla başlayır

17.09.2019 [09:26]

Bakı Ali Neft Məktəbində (BANM) 2019/2020-ci tədris ilinin başlanması münasibətilə “Bilik günü”nə həsr olunmuş təntənəli tədbir keçirilib.
AZƏRTAC xəbər verir ki, Azərbaycan Respublikasının dövlət himni səsləndirildikdən sonra Bakı Ali Neft Məktəbinin rektoru Elmar Qasımov 2019/2020-ci tədris ilində yüksək balla tələbə adını qazanmış gəncləri və onların valideynlərini yeni tədris ili münasibətilə təbrik edib. Ali məktəbin qısa zamanda əldə etdiyi uğurlardan, görülən işlər və perspektivlərdən danışan Elmar Qasımov bildirib ki, Prezident İlham Əliyevin “2019/2020-ci tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi” haqqında Sərəncamına əsasən, Bakı Ali Neft Məktəbinin 23 tələbəsi Prezident təqaüdünə layiq görülüb. Rektor qeyd edib ki, ali məktəbin yarandığı ildən bu günə qədər Prezident təqaüdçülərinin sayı 150 nəfərə çatıb. O, yarandığı ildən indiyədək BANM-in 26 tələbəsinin 700 bal toplayaraq ölkə üzrə rekorda imza atdığını vurğulayıb.
Rektor, həmçinin qeyd edib ki, bu il ali təhsil müəssisələrinə keçirilmiş qəbul imtahanlarının ixtisas seçimi nəticəsində Bakı Ali Neft Məktəbinin 2 ixtisası - informasiya təhlükəsizliyi - 673,5 bal, proseslərin avtomatlaşdırılması mühəndisliyi - 657,8 bal olmaqla, növbəti dəfə ölkə universitetləri arasında ən yüksək keçid balı olan ixtisaslardır.
Elmar Qasımov I qrup üzrə keçirilmiş test imtahanlarında ən yüksək bal toplayan tələbələrin BANM-i seçməsinin ənənə halını almasını xüsusi vurğulayıb.
“Bizim ali məktəbi bitirən bütün məzunlar işlə təmin olunur. Onlar SOCAR-ın bir çox müəssisələrində, o cümlədən Türkiyədə “PETKİM” və “STAR” zavodlarında, BP, “Maire Technimont Group”, “Halliburton” və digər transmilli şirkətlərdə çalışırlar. Eyni zamanda, dünyanın bir çox inkişaf etmiş ölkələrinin nüfuzlu ali məktəblərinin magistratura və doktorantura proqramlarına qəbul olunublar”, - deyə Elmar Qasımov bildirib.
Tədbirdə çıxış edən SOCAR-ın prezidenti Rövnəq Abdullayev BANM-in kollektivini, tələbələri və valideynləri yeni tədris ilinin başlanması münasibətilə təbrik edib. O deyib: “Bakı Ali Neft Məktəbi cəmi 7 ildir fəaliyyət göstərir. Bu qısa müddətdə dinamik inkişafı və uğurları ilə layiqli yer tutmuş, ölkə gənclərinin dərin rəğbətini qazanmışdır. Təsadüfi deyil ki, builki qəbul imtahanlarında 1-ci qrup üzrə ən yüksək nəticə göstərmiş və Prezident təqaüdünə layiq görülmüş 23 tələbə üstünlüyü Bakı Ali Neft Məktəbinə verib. Bu məktəb, Prezident İlham Əliyevin iştirakı ilə açılışını etdiyimiz bu möhtəşəm kampus Azərbaycan tarixinin yeni dövrünün nailiyyətlərini təzahür etdirir. Azərbaycan Respublikasının Prezidenti İlham Əliyevin yüksək texnoloji biliklərə sahib ingilisdilli neftçi mütəxəssislərin hazırlanması istiqamətində qarşıya qoyduğu hədəflərə uyğun olaraq bu gün Bakı Ali Neft Məktəbində beynəlxalq təhsil konsepsiyasına uyğun tədris və təhsil mühiti formalaşdırılıb”.
Milli Məclis sədrinin müavini Bahar Muradova Ümummilli Lider Heydər Əliyevin təhsilə xüsusi önəm verdiyini xatırladıb, Prezident İlham Əliyev və birinci xanım Mehriban Əliyevanın bu sahəyə böyük diqqət göstərdiklərini deyib.
Bahar Muradova bildirib ki, son illər ölkəmizdə təhsil sistemində əldə edilən uğurlar təhsilverənlərin peşəkarlığı ilə yanaşı, Azərbaycan dövlətinin iqtisadi imkanlarının artmasının, regionda və dünyada mövqeyinin möhkəmlənməsinin nəticəsidir.
Sosial Tədqiqatlar Mərkəzinin İdarə Heyətinin sədri, Milli Məclisin deputatı Zahid Oruc təhsil sistemində tətbiq edilən innovasiyalar sayəsində bu gün BANM kimi yüksək infrastruktura malik və keyfiyyətli tədris metodu ilə seçilən ali təhsil müəssisəsinin fəaliyyət göstərdiyini qeyd edib: “Ölkə Prezidentinin tapşırığı ilə yaradılan BANM beynəlxalq proqramlar əsasında, eləcə də Avropada mühəndis hazırlığına dair laborator və digər təcrübi avadanlıqlarla təchiz olunan komplektləşmiş bir elm təhsil ocağı kimi uğurla fəaliyyət göstərir”.
Dövlət İmtahan Mərkəzinin (DİM) 2019/2020-ci tədris ili üzrə keçirilən qəbul imtahanında I qrup üzrə ən yüksək bal (690.5 bal) toplayaraq BANM-in informasiya təhlükəsizliyi ixtisasını seçən Əsmər Hacızadə bildirib ki, əsas məqsədi ixtisası üzrə peşəkar mütəxəssis kimi ölkəmizə faydalı olmaqdır. O, hədəfinə çatmaq üçün bu ali məktəbin düzgün ünvan olduğunu vurğulayıb.
Bakı Ali Neft Məktəbi ilə BMT-nin Təlim və Tədqiqatlar İnstitutunun proqramı əsasında həyata keçirilən “Nigeriyanın neft və qaz sənayesində kadr potensialının gücləndirilməsi” layihəsi çərçivəsində BANM-ə qəbul olmuş nigeriyalı tələbə Somtoçukvu Çidinma tədbir iştirakçılarını Azərbaycan dilində salamlayıb, bu ali məktəbdə təhsilə başlamasından qürur duyduğunu qeyd edib.
Bu il əkiz övladları Bakı Ali Neft Məktəbinin neft-qaz mühəndisliyi ixtisasına qəbul olan Namiq Azadlı çıxış edərək, oğlanları Rəşad və Rəşidlə yanaşı, yüksək bal toplamış bütün gənclərə göstərilən diqqət və qayğıya görə ölkə rəhbərliyinə təşəkkür edib. Namiq Azadlı övladlarının da onun yolunu davam etdirərək, neft-qaz sahəsinə maraq göstərməsindən və BANM-i seçməsindən məmnunluğunu ifadə edib.
Qeyd edək ki, Azərbaycan Respublikasının Prezidenti İlham Əliyev tərəfindən imzalanmış Sərəncama əsasən, Rəşad Azadlı Prezident təqaüdünə layiq görülüb.
Hazırda SOCAR Türkiyədə istehsalat mühəndisi vəzifəsində çalışan Orxan Əlizadə məzunlar adından sevimli müəllimlərinə minnətdarlıq edərək, BANM-in tələbələrin layiqli kadrlar kimi yetişməsində əvəzsiz rolundan danışıb.
Sonra 2019/2020-ci tədris ilində BANM-ə qəbul olunmuş tələbələrin hər birinə tələbə vəsiqələri təqdim edilib.