Baş Prokurorluğun nümayəndə heyəti MDB dövlətləri Baş Prokurorlarının Əlaqələndirmə Şurasının iclasında iştirak edib

Bakı:

29 °C

42 %

5 m/s

AZ RU EN

Ana səhifə / Sosial / Baş Prokurorluğun nümayəndə heyəti MDB dövlətləri Baş Prokurorlarının Əlaqələndirmə Şurasının iclasında iştirak edib

Baş Prokurorluğun nümayəndə heyəti MDB dövlətləri Baş Prokurorlarının Əlaqələndirmə Şurasının iclasında iştirak edib

03.10.2019 [09:40]

Qırğız Respublikasının paytaxtı Bişkekdə Müstəqil Dövlətlər Birliyi (MDB) iştirakçı dövlətlərinin Baş Prokurorlarının Əlaqələndirmə Şurasının 29-cu iclası işə başlayıb.
Baş Prokurorluğun mətbuat xidmətindən AZƏRTAC-a bildiriblər ki, MDB prokurorluq orqanları əməkdaşlarının iştirak etdikləri tədbirdə ölkəmizi Azərbaycan Respublikası Baş prokurorunun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevin rəhbərliyi ilə nümayəndə heyəti təmsil edib.
Tədbirdə Qırğız Respublikasının Prezidenti Sooronbay Jeenbekovun iclas iştirakçılarına müraciəti oxunub.
İclasa sədrlik edən Qırğızıstanın Baş prokuroru Okturbek Camşitov və Rusiya Baş prokurorunun birinci müavini Aleksandr Buksman Azərbaycan nümayəndə heyətini 1 oktyabr - prokurorluq işçilərinin peşə bayramı münasibətilə təbrik ediblər.
Şuranın iclasında K.Əliyev Azərbaycan Respublikasının Prezidenti İlham Əliyevin rəhbərliyi ilə ölkəmizdə həyata keçirilən məhkəmə-hüquq islahatları çərçivəsində prokurorluq orqanlarının fəaliyyətinin və strukturunun təkmilləşdirilməsi istiqamətində görülmüş hərtərəfli və institusional tədbirlər, kadr potensialının gücləndirilməsi, yeni nəsil prokurorların formalaşdırılması və peşəkarlığının artırılması, habelə prokurorluğun maddi-texniki bazasının möhkəmləndirilməsi və işçilərinin sosial müdafiəsinin yaxşılaşdırılması istiqamətində əldə olunmuş uğurlu nəticələr barədə ətraflı məlumat verib. K.Əliyev “Cinayət işləri üzrə hüquqi yardım və ekstradisiya sahəsində beynəlxalq öhdəliklərin yerinə yetirilməsi üzrə Azərbaycan Respublikası Baş Prokurorluğunun təcrübəsi” mövzusunda çıxış edib.
Tədbirdə “İcra sənədlərinin icrası zamanı qanunlara riayət olunmasına prokuror nəzarəti” (Belarus), “Hüquq-mühafizə fəaliyyətinin prosessual əsaslarının modernləşdirilməsi və cinayət qanunvericiliyinin humanistləşdirilməsi” (Qazaxıstan), “Talan edilmiş aktivlərin bərpası” (Qırğızıstan), “Rusiya Federasiyası Baş Prokurorluğunun unun korrupsiyaya qarşı mübarizə üzrə fəaliyyəti: profilaktika, korrupsiya hüquq pozuntularının nəticələrinin aradan qaldırılması” (Rusiya), “Narkotiklərin qanunsuz dövriyyəsi ilə əlaqədar cinayətlərin aşkar kar edilməsi və araşdırılması sahəsində beynəlxalq əməkdaşlıq” (Tacikistan) və sair mövzularda məruzələr dinlənilib, təqdimatlar nümayiş etdirilib və faydalı fikir mübadiləsi aparılıb.
Yekunda Rusiya Federasiyasının Baş prokuroru Yuri Çayka növbəti bir müddətinə yenidən Şuranın sədri seçilib. Təşkilatın 2020-ci ildəki iclasının Özbəkistanın paytaxtı Daşkənddə keçirilməsi qərara alınıb.
Tədbirdə nümayəndə heyəti Qırğızıstanın Baş prokuroru Okturbek Camşitov ilə ikitərəfli görüş keçirilib. Görüşdə son illər dövlətlər və qurumlararası münasibətlərin inkişafının intensiv xarakter almasının gələcək əməkdaşlıq üçün əlverişli zəmin yaratdığını qeyd edən K.Əliyev Ermənistan-Azərbaycan Dağlıq Qarabağ münaqişəsinə toxunaraq, erməni təcavüzünün türk dünyasının ortaq problemi olduğunu ifadə edib.
Nümayəndə heyətimiz tədbirdə, eləcə də Bişkekdə eyni vaxtda keçirilən Şanxay Əməkdaşlıq Təşkilatına üzv dövlətlərin Baş Prokurorlarının 17-ci iclasında iştirak edən ölkələrin, o cümlədən Türkiyə, Rusiya, İran, Çin, Pakistan, Belarus, Qazaxıstan, Qırğızıstan, Özbəkistan, Monqolustan, Tacikistanın nümayəndə heyətlərinin rəhbərləri, həmçinin Beynəlxalq Prokurorlar Assosiasiyasının Prezidenti Çol Kyu-Hvan ilə görüşlər keçirib, ikitərəfli əməkdaşlığın inkişafı ilə bağlı faydalı fikir mübadiləsi aparılıb.

Paylaş:

Baxılıb: 504 dəfə