Azərbaycan dövləti hər zaman öz vətəndaşının yanındadır

Bakı:

26 °C

53 %

3 m/s

Əlaqə

AZ RU EN

Ana səhifə / Sosial / Azərbaycan dövləti hər zaman öz vətəndaşının yanındadır

Azərbaycan dövləti hər zaman öz vətəndaşının yanındadır

11.04.2020 [14:17]

Ekspertlər hesab edirlər ki, Prezident İlham Əliyevin əfv Sərəncamı dövlətimizin insanpərvər siyasətini və humanizm prinsiplərinə böyük önəm verdiyini əks etdirən mühüm faktlardandır

Məlum olduğu kimi, Prezident İlham Əliyev aprelin 6-da “Məhkum edilmiş bir sıra şəxslərin əfv olunması haqqında” Sərəncam imzalayıb. Sərəncama əsasən 176 məhkum, o cümlədən 165 kişi və 11 qadın cəzanın çəkilməmiş hissəsindən azad edilib. Dövlət başçısının bu humanist qərarı cəmiyyətimizdə çox yüksək dəyərləndirilir.

Məsələyə münasibət bildirən Milli Məclisin deputatı Sevinc Hüseynova deyib ki, Azərbaycan Prezidenti İlham Əliyevin müvafiq Sərəncamı ilə yaşına və səhhətinə görə xüsusi qayğıya ehtiyac duyan yaşı 65-dən yuxarı olan 176 məhkumun əfv edilməsi böyük humanizm nümunəsidir. Onun sözlərinə görə, dövlətimizin başçısı məhkumların və onların ailə üzvlərinin müraciəti əsasında bu addımı atıb: "Cənab Prezidentin imzaladığı əfv Sərəncamı bir daha sübut edir ki, dövlət humanizm prinsiplərinə və dəyərlərinə böyük önəm verir".

“Təbii ki, ölkə başçısı bu humanist addımı ilə bir çox ailəyə sevinc bəxş edib. Qeyd etmək istəyirəm ki, əfv Sərəncamı böyük sosial mahiyyət daşıyır. Bu qərar yaşı 65-i keçmiş məhkumların sağlamlığının qorunması üçün verilib. Yəni Prezident İlham Əliyev əfv olunan məhkumların sağlamlığını qorumaq, onları koronovirusa yoluxmaqdan uzaq tutmaq, onlara ev şəraitində xidmətlərin göstərilməsini təmin etmək üçün belə bir addım atdı. Bu, təkcə cinayət törətmiş şəxslərə qarşı humanizm addımı deyil, həm də insanlığa verilən dəyərdi. Əfv Sərəncamının imzalanması bir daha göstərir ki, Prezident İlham Əliyevin həyata keçirdiyi siyasətin mərkəzində vətəndaş amili dayanır”,-deyə millət vəkili vurğulayıb.

Milli Məclisin deputatı Müşfiq Cəfərov isə bəşəriyyətin yeni növ koronavirus infeksiyası kabusu ilə qarşı-qarşıya qaldığı bir vaxtda risk qrupuna daxil olan, yaşı 65-dən yuxarı olan insanların sağlamlıqlarının qorunmasının aktual məsələ olduğunu deyib. O, Azərbaycan ailəsinin ən ali və müqəddəs dəyərlərindən birinin ağsaqqala, ağbirçəyə hörmət, dərin ehtiram olduğunu, hər zaman ahıl vətəndaşların sosial müdafiəsinin gücləndirilməsinin ölkəmizdə həyata keçirilən siyasətin prioritet istiqamətlərindən biri kimi çıxış etdiyini bildirib.

“Bu Sərəncamın imzalanması ilə yaşına və səhhətinə görə xüsusi qayğıya ehtiyacı olan, yaşı 65-dən yuxarı məhkumlara da xüsusi diqqət və qayğı göstərildi. Başqa sözlə, hər zaman humanist addımları, qərarları ilə dövlətin hər bir vətəndaşının yanında olduğunu təsdiq edən Azərbaycan Prezidenti İlham Əliyevin imzaladığı əfv Sərəncamı böyük önəm kəsb edir. Dövlətimizin başçısının ölkəmizdə həyata keçirilən insanpərvər siyasətin növbəti təzahürü kimi 176 məhkumun əfv olunmasına dair Sərəncam imzalaması mühüm əhəmiyyətə malikdir. Bu, dövlətin hər bir vətəndaşının sağlamlığını, təhlükəsizliyini təmin etməsinin daha bir nümunəsidir",-deyə M.Cəfərov qeyd edib.

Nardar BAYRAMLI

Paylaş:

Baxılıb: 658 dəfə