Azərbaycan yalnız qlobal əməkdaşlıq və həmrəylik sayəsində pandemiyaya qalib gəlməyin mümkünlüyünü dünyaya nümayiş etdirdi

Bakı:

16 °C

88 %

4 m/s

AZ RU EN

Ana səhifə / Sosial / Azərbaycan yalnız qlobal əməkdaşlıq və həmrəylik sayəsində pandemiyaya qalib gəlməyin mümkünlüyünü dünyaya nümayiş etdirdi

Azərbaycan yalnız qlobal əməkdaşlıq və həmrəylik sayəsində pandemiyaya qalib gəlməyin mümkünlüyünü dünyaya nümayiş etdirdi

19.05.2020 [17:46]

Ağadur Müslümov: Ölkəmizdə həyata keçirilən sistemli islahatların ən mühüm istiqamətlərindən biri məhz korrupsiyaya qarşı qətiyyətli mübarizədir

Məlum olduğu kimi, Azərbaycanda Prezident İlham Əliyevin rəhbərliyi ilə həyata keçirilən dərin islahatlar kursu ölkəmizin hərtərəfli inkişafına xidmət edir. Ölkədə sosial-iqtisadi və siyasi sahələrlə yanaşı, hüquqi və kadr islahatlarının aparılması isə qarşıya qoyulan strateji hədəflərə çatmağa geniş imkanlar yaradır. Bununla yanaşı, hakimiyyət tərəfindən müxtəlif siyasi partiyalarla dialoq prosesinə start verilməsi, həmçinin bir neçə siyasi partiyanın qeydiyyata alınması cəmiyyət tərəfindən müsbət qiymətləndirilir. Bu baxımdan, yeni siyasi münasibətlərin, siyasi dialoqun qurulması ölkəmizin siyasi sistemində yeni keyfiyyət dəyişikliyi yaratmaqdadır.

Kompleks xarakterli islahatlar dövlətimizin inkişafına və xalqımızın rifahına xidmət edir

“Azərbaycan Mübarizləri” Partiyasının sədri Ağadur Müslümov “Yeni Azərbaycan” qəzetinə açıqlamasında deyib ki, həyata keçirilən islahatların fonunda siyasi sistemin yeni konfiqurasiyasının yaranması müşahidə edilir: “Ölkəmizdə cənab Prezidentin rəhbərliyi ilə həyata keçirilən islahatlar siyasi sistemi də əhatə edir. Hazırda fərqli siyasi baxışlara, mövqelərə malik olmalarına baxmayaraq, milli dövlətçilik mənafeyindən çıxış edən siyasi qüvvələrlə dialoq daha da genişləndirilir”.

Bu yaxıınlarda bir neçə siyasi partiyanın Ədliyyə Nazirliyi tərəfindən qeydiyyata alınmasına toxunan A.Müslümovun sözlərinə görə,ölkəmizdə siyasi partiyaların qeydə alınması yeni siyasi münasibətlərin formalaşdığını göstərir: “Bir neçə partiyanın Ədliyyə Nazirliyində qeydiyyatdan keçirilməsi çox müsbət haldır, ölkəmizdə mövcud olan yeni siyasi münasibətlərin təzahürüdür”.

Müstəqilliyimizin qorunması, ərazi bütövlüyümüzün bərpası və xalqımızın rifahı naminə bütün siyasi qüvvələri milli maraqlar əsasında fəaliyyət göstərməyə çağıran partiya sədri ölkədə bütün sahələrdə aparılan islahatların mühüm əhəmiyyətə malik olduğunu diqqətə çatdırıb: “İqtisadi, sosial, hüquqi, siyasi, kadr və digər sahələrdə həyata keçirilən islahatar dövlətimizin inkişafına, xalqımızın sağlamlığına və rifahına xidmət edir”.

Azərbaycanda koronavirusa qarşı aparılan mübarizə beynəlxalq səviyyədə təqdir olunur

Son dövrlər Azərbaycanın pandemiyaya qarşı görülmüş tədbirlərə görə nümunəvi ölkə kimi dəyərləndirilməsinə də toxunan A.Müslümov deyib ki, dövlət başçısı tərəfindən təkcə ölkə səviyyəsində deyil, beynəlxalq müstəvidə də diqqətin bu problemə cəlb edilməsi sahəsində atılan addımlar müsbət nəticə verib: “Məlumdur ki, Qoşulmama Hərəkatının sədri cənab İlham Əliyevin təşəbbüsü ilə 2020-ci il mayın 4-də Qoşulmama Hərəkatının koronavirusa qarşı mübarizə üzrə Təmas Qrupunun videokonfrans formatında Zirvə görüşü keçirilib. Zirvə görüşündə çoxsaylı ölkənin iştirakı Azərbaycan Prezidentinin yüksək nüfuzunun, uğurlu siyasətinin nəticəsidir”.

A.Müslümovun sözlərinə görə, Azərbaycan pandemiyaya yalnız qlobal əməkdaşlıq və həmrəylik sayəsində qalib gəlməyin mümkünlüyünü dünyaya nümayiş etdirib: “Dünya birliyinin məsuliyyətli və etibarlı üzvü kimi Azərbaycan koronavirus təhlükəsinin ilk günlərindən həmrəylik çağırışlarına dəstək verib, koronavirusa qarşı qlobal mübarizə üçün maliyyə yardımı ayırıb. Pandemiya əleyhinə görülmüş tədbirlərə görə nümunəvi ölkə kimi dəyərləndirilən Azərbaycanda koronavirusa qarşı aparılan mübarizə beynəlxalq səviyyədə təqdir olunur”.

Bir neçə nüfuzlu beynəlxalq qurumun rəhbər şəxslərini eyni tədbir çərçivəsində bir araya gətirmək baxımından da keçirilmiş Zirvə görüşünün önəmindən bəhs edən partiya sədri bunun Prezidentin bəşəriyyət üçün aktual olan COVID-19 pandemiyasının doğurduğu qlobal fəsadlarla bağlı məsələləri vaxtında beynəlxalq ictimaiyyətin diqqətinə təqdim etməsi olduğunu deyib. “Bu təşəbbüslər beynəlxalq müstəvidə olduqca yüksək qiymətləndirilir. Eyni zamanda, cənab İlham Əliyevin dünyanın problemlərinə, Qoşulmama Hərəkatının üzvlərini narahat edən məsələlərə vaxtında və həm də adekvat reaksiya verməsi, pandemiyaya qarşı mübarizə səylərini effektiv şəkildə əlaqələndirməsi Azərbaycan Prezidentinin dünya miqyaslı lider olmasının sübutudur”, – deyə A.Müslümov bildirib.

Ölkəmizdə korrupsiyaya qarşı mübarizənin növbəti mərhələsi başlanıb

A.Müslümov ölkəmizdə aparılan genişmiqyaslı islahatların tərkib hisəsi kimi məhkəmə-hüquq sistemində də ardıcıl islahatların həyata keçirilməsi, eyni zamanda, korrupsiya və rüşvətxorluq hallarına qarşı cəza tədbirlərinin davam etdirilməsinə də münasibət bildirib: “Azərbaycan Prezidentinin rəhbərliyi ilə pandemiya ilə mübarizə çərçivəsində məqsədyönlü tədbirlər həyata keçirildiyi bir vaxtda, təəssüflər olsun ki, bəzi məmurlar ciddi qanunsuzluqlara yol verir, vətəndaşların haqqını qəsb edirlər. Müharibə şəraitinə bərabər tutulan bugünkü çətin durumda vəzifəli şəxslərin bu hərəkətləri dövlətimizə və xalqımıza xəyanətdir”.

Partiya sədrinin fikrincə, Prezidentin qətiyyətli mövqeyi onu göstərir ki, rüşvətxorluq, korrupsiya kimi neqativ hallara yol verən məmurlara qarşı görülən tədbirlər davamlı olacaq: “Son dövrlər korrupsiyaya və rüşvətxorluğa qarşı mübarizə sahəsində ciddi addmlar atılması və aparılan son əməliyyatlar dövlətin və xalqın vəsaitini talayanların, öz şəxsi maraqlarını dövlətin ali mənafeyindən üstün tutanların cəzadan kənar qalmayacaqlarını bir daha təsdiqləyir. Bu addımlar, eyni zamanda, ölkəmizdə keçirilən sistemli islahatların ən mühüm istiqamətlərindən birinin məhz korrupsiyaya qarşı qətiyyətli mübarizə olduğunu göstərir”.

Azərbaycanda aparılan kadr islahatlarının davamı kimi, bu yaxınlarda Kamran Əliyevin Baş prokuror təyin edilməsini mühüm hadisə kimi qiymətləndirən A.Müslümov deyib ki, bu vəzifəyə Korrupsiyaya Qarşı Mübarizə Baş İdarəsinin keçmiş rəisinin təyin olunmasını ölkəmizin korrupsiya və rüşvətxorluğa qarşı aparılan mübarizənin növbəti mərhələsinə qədəm qoyması kimi dəyərləndirmək olar: “İnanırıq ki, bu təyinat Azərbaycanda təkcə korrupsiya və rüşvətxorluq hallarına deyil, digər bütün sahələrdə də cinayətkarlığa, dövlət əmlakının mənimsənilməsinə qarşı prokurorluq orqanlarının qəti mövqedən çıxış etməsi vacib rol oynayacaq”.

Qaşqay ZİYƏDDİNOĞLU

Paylaş:

Baxılıb: 300 dəfə