Görülən işlərin hədəfi Azərbaycan vətəndaşının sağlamlığının qorunması, rifahının yaxşılaşdırılmasıdır

Bakı:

16 °C

88 %

4 m/s

AZ RU EN

Ana səhifə / Sosial / Görülən işlərin hədəfi Azərbaycan vətəndaşının sağlamlığının qorunması, rifahının yaxşılaşdırılmasıdır

Görülən işlərin hədəfi Azərbaycan vətəndaşının sağlamlığının qorunması, rifahının yaxşılaşdırılmasıdır

21.05.2020 [11:02]

Müstəqil daxili və xarici siyasət yürüdən Azərbaycan bu gün dünya miqyasında çox böyük nüfuza malik ölkələr sırasındadır. Ölkəmiz təmsil olunduğu bütün beynəlxalq təşkilatların işində fəal iştirakı ilə seçilir. Bir sözlə, Azərbaycan dünya birliyinin fəal üzvlərindən biri kimi hadisələrə adekvat reaksiya verərək qlobal təşəbbüslərlə çıxış edir, problemlərin həllinə töhfə verir.

Bu sözləri AZƏRTAC-a açıqlamasında Milli Məclisin Əmək və sosial siyasət komitəsinin sədr müavini Məlahət İbrahimqızı deyib.

Deputat diqqətə çatdırıb ki, Azərbaycan sədrlik etdiyi Türk Şurasının və Qoşulmama Hərəkatının koronavirus pandemiyasına həsr olunan Zirvə toplantılarını ən yüksək səviyyədə təşkil etməklə daha bir ilkə imza atdı. Prezident İlham Əliyev böyük təşəbbüskarlıq göstərərək üzv ölkələrin rəhbərlərini çətin məqamda bir olmağa çağırdı. Azərbaycan koronavirus pandemiyasına qarşı mübarizədə təşəbbüskarlığını özünün mənəvi borcu kimi qəbul edərək dünyaya öz töhfəsini verdi. Təkcə onu demək kifayətdir ki, Azərbaycan bu günə qədər 13 ölkəyə və 3 beynəlxalq təşkilata yardım göstərib. Təsadüfi deyil ki, Qoşulmama Hərəkatının və Türk Şurasının yekun bəyannaməsində Azərbaycanın xüsusi rolu qeyd olunur. Zirvə görüşləri ölkəmizin necə böyük gücə malik olduğunu bir daha nümayiş etdirdi. Prezident İlham Əliyevin xarici siyasətinin nəticədir ki, Azərbaycan hər bir təşkilatda etibarlı tərəfdaş rolunda çıxış edir. Biz o nüfuzu qazanmışıq. Xüsusilə qeyd etmək lazımdır ki, bu gün dünyanın böhranla üzləşdiyi bir vaxtda Azərbaycanın müsbət rolu daha çox görünür.

Məlahət İbrahimqızı bildirib ki, virusla mübarizədə qabaqlayıcı tədbirlərin görülməsi xalqımızı böyük bəladan xilas etdi. Bu dövrdə həm insanların sağlamlığının qorunması, həm də həssas təbəqələrin sosial təminatı məsələləri həll olunub. Prezident İlham Əliyevin və Birinci vitse-prezident Mehriban Əliyevanın tapşırıq və tövsiyələrinə uyğun olaraq qısa müddətdə ehtiyaclara uyğun olaraq səhiyyə sistemi yenidən quruldu, karantin rejimində saxlanılanların təminatı təşkil edildi. Məhz görülən sistemli işlərin nəticəsində bu gün yumşalma tədbirləri ilə əlaqədar yoluxanların sayında müəyyən artım olsa da, vəziyyət tam nəzarətdədir. Hazırda 20-dən çox xəstəxanada ancaq koronavirus xəstələri müalicə olunur. Ölkə üzrə qısa müddətdə beynəlxalq standartlara uyğun COVID-19 testlərinin aparılması üçün 20-dən çox laboratoriyanın açılması ÜST və digər beynəlxalq təşkilatlar tərəfindən yüksək qiymətləndirilir. Modul tipli 10 xəstəxananın inşasına başlanılıb, artıq birinci xəstəxana istifadəyə verilib. O cümlədən ötən dövr ərzində Azərbaycanda tibbi maska, kombinezon, dezinfeksiya vasitələrinin istehsalına başlanılması son zamanlarda əldə etdiyimiz ən böyük uğurlardandır. Görülən işlərin hədəfi Azərbaycan vətəndaşının sağlamlığının qorunması və rifahının təmin edilməsidir.

Sosial sahənin, xüsusilə həssas qrupdan olan vətəndaşların problemlərinin daim diqqət mərkəzində saxlandığını diqqətə çatdıran deputat ölkəmizdə müharibədən əziyyət çəkmiş, öz yaxınlarını itirmiş ailələrə dövlət tərəfindən dəstək göstərilməsini də qeyd edib. Bildirib ki, bu günə qədər 7600 şəhid ailəsi dövlət tərəfindən evlərlə, mənzillərlə təmin edilib. Dövlət başçısının 3 saylı DOST mərkəzinin açılışından sonra Azərbaycan Televiziyasına verdiyi müsahibədə qeyd etdiyi kimi, maksimum iki il ərzində bütün şəhid ailələri dövlət tərəfindən evlərlə təmin ediləcək. Prezident hər zaman çıxışlarında dəfələrlə dövlət siyasətinin mərkəzində Azərbaycan vətəndaşının dayandığını qeyd edib. 2019-cu ildə müstəqillik dövrünün ən geniş sosial paket təqdim olunub və bu layihə uğurla icra edilib. Bu sosial paket 4 milyon 200 min insanı əhatə edib. Cari ildə sosial sahədə görülən işlər ötən il həyata keçirilən tədbirlərin məntiqi davamıdır. Vətəndaşların məmnunluğunun təmin edilməsi üçün mütəmadi tədbirlər həyata keçirilir, layihələr reallaşdırılır. Belə layihələrdən biri də DOST mərkəzləridir. DOST mərkəzlərinin fəaliyyətə başlaması sosial sahədə görülən işlərin və aparılan islahatların əyani təzahürüdür. Bu mərkəzlərdə göstərilən xidmətlər sosial təminat sahəsində böyük yenilikdir və burada 130-dan çox xidmətin göstərilməsi sosial sahənin bütün xidmətlərini ehtiva edir. Ölkəmizdə 30-dan çox DOST mərkəzinin fəaliyyətə başlaması nəzərdə tutulur və bu, sosial sahənin daha da inkişaf etdirilməsinə, vətəndaş məmnunluğunun daha da artırılmasına, eləcə də innovativ inkişafa öz töhfəsini verəcək.

Paylaş:

Baxılıb: 301 dəfə