Azərbaycan polisi böyük fədakarlıq nümayiş etdirir

Bakı:

16 °C

94 %

5 m/s

Əlaqə

AZ RU EN

Ana səhifə / Sosial / Azərbaycan polisi böyük fədakarlıq nümayiş etdirir

Azərbaycan polisi böyük fədakarlıq nümayiş etdirir

12.06.2020 [09:19]

Ekspertlərin qeyd etdikləri kimi, pandemiyaya qarşı mübarizədə ön cəbhədə yer alan Azərbaycan polisi xidməti borcunu layiqincə yerinə yetirir
Məlum olduğu kimi, yeni növ koronavirus (COVID-19) infeksiyasının ölkəmizdə geniş yayılmasının qarşısının alınması istiqamətində görülən işlər öz müsbət nəticəsini verib. Belə ki, dünyanın bir sıra inkişaf etmiş ölkələri ilə müqayisədə Azərbaycanda daha ciddi uğurlar əldə olunub. Lakin karantin rejiminin yumşaldılması dövründə yoluxma hallarının artması müşahidə edilir ki, bu da məhdudlaşdırıcı tədbirlərin yenidən sərtləşdirilməsi zərurətini gündəmə gətirib. Nazirlər Kabinetinin xüsusi karantin rejiminin sərtləşdirilməsi ilə bağlı əlavə tədbirlər barədə qərarına əsasən, ötən həftənin şənbə və bazar günləri Bakı, Sumqayıt, Gəncə, Lənkəran şəhərləri və Abşeron rayonunda əhalinin yaşayış yerlərini və ya olduğu yerləri tərk etməsi qadağan edilib. Təbii ki, sözügedən qərarın icrasını yüksək səviyyədə təmin etmək üçün Azərbaycan polisi öz xidməti borcunu yüksək peşəkarlıqla yerinə yetirib və sərt karantin rejiminin tələblərini pozanlara qarşı müvafiq tədbirlər görülüb.
Əfsuslar olsun ki, bəzi radikal müxalifət təmsilçiləri isə karantin rejiminin sərtləşdirilməsini sabotaj etməyə uğursuz cəhdlər göstərir, sosial şəbəkələrdə təxribat xarakerli çağırışlar səsləndirirlər. Sevindirici haldır ki, Azərbaycan cəmiyyətinin müxtəlif təbəqələrinin nümayəndələri indiki şəraitdə polis əməkdaşlarının öz peşə fəaliyyətini yerinə yetirmələrinə hərtərəfli dəstək verirlər.
Məsələyə münasibət bildirən Milli Məclisin deputatı Tamam Cəfərova deyib ki, həmişə ictimai asayişi və təhlükəsizliyimizi qoruyan Azərbaycan polisi bu dəfə koronavirusun yayılmasının qarşısının alınması üçün əhalinin sağlamlığının keşiyində dayanıb: “Vətəndaşlar başa düşməlidir ki, bu risk təkcə onların həyatına deyil, bizim hamımızın sağlamlığına təhlükə törədə bilər. Buna görə də pandemiya ilə mübarizənin əsas şərtlərindən biri tətbiq edilmiş qaydalara qeyri-şərtsiz riayət etməkdir. Dövlətin tətbiq etdiyi qaydalara əməl olunmasına nəzarət isə Azərbaycan polisinin birbaşa vəzifəsidir”.
Koronavirusa qarşı mübarizədə polis əməkdaşlarının fədakarlıq nümayiş etdirdiyini vurğulayan millət vəkilinin sözlərinə görə, təəssüf ki, sərt karantin rejimi tətbiq edildiyi günlərdə xoşagəlməz hallar da baş verib: “Qaydalara riayət etməyən bəzi vətəndaşlar polis əməkdaşları tərəfindən saxlanılarkən müqavimət göstəriblər. Halbuki hər bir vətəndaş öz məsuliyyətini dərk etməli, dövlətin pandemiya ilə apardığı ciddi mübarizədə vətəndaşlıq borcunu yerinə yetirməlidir”.
Pandemiya dövründə həyata keçirilən tədbirlərin icrası sahəsində polisin olduqca mühüm funksiya yerinə yetirdiyini xatırladan deputat bildirib ki, polis əməkdaşlarının təhqir olunması, onlara qarşı qanunazidd hərəkətlər edilməsi yolverilməzdir: “Polislərimiz hər zaman vətəndaşlara əl tutublar, onlara qarşı yüksək həsasslıq, diqqət və qayğı göstəriblər. Polislərimizin bu humanist münasibətinin qarşılığında bəzi vətəndaşların polisə qarşı göstərdiyi nalayiq münasibət nəinki qanun pozuntusu,eyni zamanda, Azərbaycan xalqının mənəvi dəyərlərinə zidd hərəkətlərdir”.
Milli Məclisin Hüquq siyasəti və dövlət quruculuğu komitəsinin üzvü Kamal Cəfərov isə deyib ki, xalqımızın rifahı, sağlamlığı naminə atılan addımlara, həyata keçirilən tədbirlərə əhalinin əksəriyyəti dəstək verib: “Sonuncu iki günlük sərt karantin dövründə ümumilikdə vətəndaşlarımız qanuna böyük hörmət nümayiş etdirdilər. Həm vətəndaşlar, həm də polis əməkdaşları nümunəvi davranıblar”.
Xüsusi karantin dövründə ən çətin vəzifənin həkimlərlə yanaşı, polislərin üzərinə düşdüyünü vurğulayan K.Cəfərov bildirib ki, sosial şəbəkələrdə polisə qarşı təxribat xarakterli çağırışlar xalqın həmrəyliyinə və birliyinə təsir edə bilməyəcək: “Polis kifayət qədər peşəkar və səbrli xidmət göstərir. Elə ən çox riskə məruz qalan da polislərdir. İctimai asayişi qoruyan da Azərbaycan polisləridir. Hansısa epizodik hadisə və ya sosial şəbəkələrdəki rəylər həmrəylimizə, birliyimizə təsir edə bilməz. Əksinə, bu, cəmiyyət olaraq bizi daha da güclü edir”.
Q.ZİYƏDDİNOĞLU

Paylaş:

Baxılıb: 323 dəfə