Xüsusi karantin rejiminin tələblərini pozaraq qanunsuz sərnişindaşıma fəaliyyəti ilə məşğul olan şəxslərin əməlləri ifşa edilib

Bakı:

18 °C

82 %

5 m/s

AZ RU EN

Ana səhifə / Sosial / Xüsusi karantin rejiminin tələblərini pozaraq qanunsuz sərnişindaşıma fəaliyyəti ilə məşğul olan şəxslərin əməlləri ifşa edilib

Xüsusi karantin rejiminin tələblərini pozaraq qanunsuz sərnişindaşıma fəaliyyəti ilə məşğul olan şəxslərin əməlləri ifşa edilib

24.06.2020 [08:26]

Azərbaycanda dövlət strukturlarının əhalinin sağlamlığının qorunması, digər sahələr üzrə xidməti fəaliyyətin təşkili istiqamətində səfərbər olunduğu vaxtda mövcud vəziyyətdən öz maraqları naminə istifadə edərək, vətəndaşların və dövlətin qanunla qorunan mənafelərinə zərər vuran, hakimiyyət orqanlarının işinə maneə törədən hüquqazidd əməllərə qarşı prokurorluq orqanları tərəfindən mübarizə tədbirləri davam etdirilir.
Baş Prokurorluğun mətbuat xidmətindən AZƏRTAC-a bildiriblər ki, Bakıdan Gəncə və Şəki şəhərlərinə qanunsuz sərnişin daşınaraq ölkə ərazindəki karantin qaydalarının pozulması ilə bağlı daxil olmuş məlumat Baş Prokuror yanında Korrupsiyaya Qarşı Mübarizə Baş İdarəsində araşdırılıb.
Araşdırma zamanı Eldəniz Daşdəmirovun və Hafiz İsgəndərovun sanitariya-gigiyena və karantin qaydalarını pozaraq istifadələrində olan avtomobillərlə ayrı-ayrı şəxslərdən müxtəlif məbləğlərdə pul vəsaiti almaqla onları Gəncə və Şəki şəhərlərinə apararaq qanunsuz sərnişindaşıma fəaliyyəti ilə məşğul olmalarına əsaslı şübhələr müəyyənləşdirilib.
Keçirilmiş əməliyyat tədbirləri nəticəsində E.Daşdəmirovun və H.İsgəndərovun üzərlərindən nömrələnmiş pul əsginasları aşkarlanaraq götürülüb. Onların hər ikisi törətmiş olduqları qanunsuz əməlləri etiraf ediblər və bu audio-video çəkilişlərlə qeydə alınıb.
Faktla bağlı toplanmış material üzrə Baş Prokurorluğun Cinayət təqibindən kənar icraatlar idarəsində araşdırma davam etdirilməklə İnzibati Xətalar Məcəlləsinin 211.1-ci (epidemiya əleyhinə rejimin, sanitariya-gigiyena və karantin rejimlərinin pozulması) maddəsi ilə inzibati xəta haqqında iş üzrə icraat başlanıb və qanunvericiliyin tələblərinə əsasən qərar qəbul edilməsi üçün aidiyyəti üzrə Binəqədi və Qaradağ Rayon məhkəmələrinə göndərilib.
Məhkəmələrin müvafiq qərarlarına əsasən E.Daşdəmirov və H.İsgəndərov inzibati məsuliyyətə cəlb olunaraq barələrində 20 gün müddətinə inzibati həbs seçilib.
Azərbaycan Respublikası Baş Prokurorluğu vətəndaşlara müraciət edərək xüsusi karantin rejiminin tələblərinə riayət olunmasına, o cümlədən hər hansı qanunsuz fəaliyyətlə məşğul olmamağa çağırır. Bildirilir ki, xüsusi karantin rejiminin tələblərinə əməl etməyərək qanun pozuntularına yol vermiş şəxslər daha ciddi məsuliyyət tədbirlərinə cəlb olunacaqlar.

Paylaş:

Baxılıb: 307 dəfə