Koronavirusa qalib gəlmək üçün həmrəylik nümayiş etdirmək lazımdır

Bakı:

20 °C

94 %

0 m/s

Əlaqə

AZ RU EN

Ana səhifə / Sosial / Koronavirusa qalib gəlmək üçün həmrəylik nümayiş etdirmək lazımdır

Koronavirusa qalib gəlmək üçün həmrəylik nümayiş etdirmək lazımdır

04.07.2020 [10:00]

Ekspertlərin qənaətinə əsasən, pandemiyadan qurtulmağın əsas şərtlərindən biri vətəndaşların məsuliyyətli davranış sərgiləmələridir

Azərbaycan yeni növ koronavirus (COVİD-19) infeksiyasının geniş yayılmasına qarşı effektiv mübarizə aparan dövlətlərdəndir. Lakin mayın əvvəlindən həyata keçirilən yumşalma tədbirləri bir çox ölkələrdə olduğu kimi, Azərbaycanda da xəstəliyin yayılma sürətini artırdı, gündəlik təsdiq edilmiş halların sayı 500-ü ötdü. Bu səbəbdəndir ki, bəzi regionlarımızda tətbiq edilən ciddi karantin rejimi iyulun 20-nə kimi uzadılıb. Bundan başqa, sərtləşdirilmiş karantin rejiminin tətbiq edildiyi bölgələrin sayı da artırılaraq 16-ya çatdırılıb. Təbii ki. bu sərtləşdirmə epidemioloji vəziyyətin qənaətbəxş olmamasından irəli gəlir. Vurğulanmalıdır ki, gündəlik yeni yoluxan xəstələrin sayının sağalanların sayından artıq olması bu cür sərt qadağaların tətbiqini zəruri edir.

Məsələ ilə bağlı fikirlərini bölüşən Milli Məclisin deputatı Nəsib Məhəməliyev ölkəmizdə pandemiyanın yayılmasına və təsirlərinin azaldılmasına qarşı dövlətimiz tərəfindən yüksək səviyyədə tədbirlər həyata keçirildiyini diqqətə çatdırıb. Millət vəkili bildirib ki, bir sıra bölgələrimizdə ciddi karantin rejiminin uzadılması zərurətdən irəli gəlir: "Pandemiyanın təsirlərinin tam aradan qaldırılmasının vacib şərti vətəndaşların məsuliyyətli davranışlarıdır. Bu faktdır ki, bəzi insanlar karantin qaydalarına riayət etmir, tiibbi maskalardan istifadə olunmur, sosial məsafə qorunur. Bu isə pandemiyaya qarşı mübarizədə tam effektiv nəticənin əldə olunmasına maneə yaradır. Hər kəs bilməlidir ki, üzləşdiyimiz vəziyyət kifayət qədər mürəkkəbdir və bu problemin qısa müddətli, asan həlli yoxdur. Yeganə çıxış yolu qaydalara riayət etmək və davranış və həyat tərzimizi yaranmış vəziyyətə uyğunlaşdırmaqdır. Bu gün qaydaların pozulmasına qarşı inzibati tədbirlər görülür, cərimə və digər sanksiyaların tətbiqi gücləndirilir. Amma vətəndaşlar bilməlidilər ki, virusa qalib gəlməyin yeganə yolu məsuliyyətli davranmaq, karantin qaydalarına riayət etməkdir. Biz nə qədər həmrəy olub həm özümüz, həm də ətrafda olan insanlar, yaxınlarımız tərəfindən sadə qaydalara əməl etməyi təmin edə bilsək, bir o qədər tez bu vəziyyətdən çıxa biləcəyik və həyat öz adi axarına qayıdacaq".

Beynəlxalq Muğam Mərkəzinin direktoru, Xalq artisti Murad Hüseynov da bildirib ki, infeksiyanın yayıldığı ilk günlərdən ölkəmizdə bu virusla mübarizənin yüksək səviyyədə təşkili üçün lazımi qərarlar qəbul olunub. Onun sözlərinə görə, bəzi insanların qaydaları pozması, karantin rejiminə əməl etməməsi çox ciddi narahatlıq yaradır. Hamı və hər kəs bu işdə nümunə göstərməlidir: "Biz bu gün Prezident İlham Əliyevin irəli sürdüyü "Biz birlikdə güclüyük" şüarına əsaslanaraq milli birlik, vətəndaş həmrəyliyi və sosial məsuliyyət hissi nümayiş etdirməliyik. Bu sahədə hər kəsin vətəndaş məsuliyyəti xüsusi əhəmiyyət daşıyır. Bütün dünyanın mübarizə apardığı koronavirusdan qorunmaqda, onun yayılmasının qarşısını almaqda təsirli vasitələrdən biri olan tibbi maskadan istifadə bu gün çox vacibdir. İndi hər kəs qaydalara riayət etməli, öz sağlamlığını nəzarətdə saxlamalı, gigiyena qaydalarına əməl edərək qoruyucu maskadan istifadə etməlidir. Vətəndaşlarımız bilməlidir ki, virusa qalib gəlməyin yeganə yolu məsuliyyətli davranmaq, karantin qaydalarına riayət etməkdir. Cəmiyyət olaraq sona qədər həmrəylik nümayiş etdirəcəyimiz halda bu mürəkkəb vəziyyətdən çıxa biləcəyik".

Pərviz SADAYOĞLU

Paylaş:

Baxılıb: 615 dəfə