Ayaz Mirzəyev: Bu gün ölkəmizdə möhtəşəm həmrəylik mövcuddur

Bakı:

26 °C

62 %

9 m/s

Əlaqə

AZ RU EN

Ana səhifə / Sosial / Ayaz Mirzəyev: Bu gün ölkəmizdə möhtəşəm həmrəylik mövcuddur

Ayaz Mirzəyev: Bu gün ölkəmizdə möhtəşəm həmrəylik mövcuddur

16.10.2020 [08:53]

“İşğalçı Ermənistan Azərbaycan Ordusu qarşısında acizdir. Ona görə də, erməni hərbi birləşmələri yaşayış məntəqələrimizi, mülki insanları hədəfə alırlar. Bu baxımdan, Gəncəyə edilən raket hücumu isə miqyasına görə beynəlxalq cinayətdir”. Bu fikirləri “Azərbaycan Jurnalistlər Şəbəkəsi” İctimai Birliyinin sədri Ayaz Mirzəyev deyib.
A.Mirzəyev qeyd edib ki, Azərbaycan Ordusu hazırda ölkəmizin beynəlxalq səviyyədə tanınmış ərazilərini işğaldan azad etmək üçün hərbi əməliyyatlarını davam etdirir. Biz öz tarixi torpaqlarımız uğrunda mübarizə aparırıq. Ermənistanın humanitar atəşkəsi pozması isə onu göstərir ki, işğalçı ölkə həmişəki kimi qeyri-konstruktivdir.
İctimai Birliyin sədri bildirib ki, bu, əslində, hər bir azərbaycanlı üçün Vətən müharibəsidir. Ona görə də, Azərbaycanda insanlar arasında yüksək hərbi vətənpərvərlik əhval-ruhiyyəsi hökm sürür. Onun sözlərinə görə, Azərbaycan vətəndaşları olaraq hər birimiz vahid mövqedən çıxış edirik: “Prezident İlham Əliyev həm xalqa müraciətində, həm də xarici televiziya kanallarına müsahibəsində real vəziyyəti dolğun şəkildə cəmiyyətimizə çatdırır, eyni zamanda, düşmənə öz mesajını verir. Erməni tərəfi bu mesajlardan nəticə çıxarmalıdır. Cənab Prezident bildirib ki, heç kim Azərbaycana şərt irəli sürə bilməz. Şərti Azərbaycan irəli sürür. Ümumiyyətlə, erməni hərbi birləşmələrinin Azərbaycan torpaqlarında mövcudluğu üçün heç bir əsas yoxdur. Onlar bizim tarixi torpaqlarımızı tərk etməlidir. Bu, onların xeyrinə olar. Çünki vaxt keçdikcə daha çox itkilərə məruz qalırlar. Ordumuz tərəfindən düşmən ciddi şəkildə geri oturdulur. Bütün bunlar tariximizdə yeni şanlı səhifənin açılması deməkdir”.
Erməni hərbi birləşmələrinin mülki vətəndaşları hədəfə aldığını deyən QHT rəhbəri qeyd edib ki, bu, beynəlxalq qanunlara, xüsusilə Cenevrə konvensiyasına ziddir: “Görünən odur ki, işğalçı rejimin rəhbərliyi ilə danışıqlar aparmaq, dialoq qurmaq mümkün deyil. Çünki onların hərəkətləri bütün beynəlxalq qanunların pozulması deməkdir. Dinc insanların, bir sıra şəhər və rayonlarımızın Ermənistan ərazisindən hədəfə alınması qarşı tərəfin çirkin planıdır. Bununla da, Azərbaycanı təxribata çəkmək istəyirlər. Ermənistan üçüncü dövlətlərin münaqişəyə cəlb olunmasına çalışır. Bu, təxribatdır. Belə hərəkəti öz gücünə arxalanmayan ölkələr edə bilər ki, bunu da Ermənistan edir. Ermənilərin nə etməsindən asılı olmayaraq, vəziyyət Azərbaycan Ordusunun nəzarətindədir. Prezident İlham Əliyevin dediyi kimi, məqsədimiz ərazilərimizi işğaldan azad etməkdir. Çünki danışıqların davam etdiyi 30 il ərzində heç bir nəticə görməmişik. İndiyə qədər işğal olunmuş ərazilərimizdə qeyri-qanuni addımlar atılır, qanunsuz məskunlaşdırma siyasəti həyata keçirilir və s. Bu gün yaranmış vəziyyətə görə məsuliyyət nə qədər Ermənistanın üzərinə düşürsə, bir o qədər də ATƏT-in Minsk qrupu həmsədrlərinin üzərinə düşür. Onların fəaliyyətsizliyi vəziyyəti bu həddə çatdırıb”.
Bu gün ölkəmizdə möhtəşəm həmrəyliyin mövcud olduğunu deyən A.Mirzəyevin sözlərinə görə, hər bir vətəndaşın arzusu işğal altında olan torpaqlarımızın tezliklə azad edilməsidir: “Bu yolda Azərbaycan Ordusu şanlı yürüşünü davam etdirəcək. Ən son nəticə odur ki, Azərbaycanın beynəlxalq səviyyədə tanınan ərazi bütövlüyü bərpa edilsin. Əminəm ki, qəhrəman əsgərlərimiz Ali Baş Komandanın əmri ilə bu vəzifənin öhdəsindən gələcəklər. Ötən müddət ərzində cəbhədə əldə olunan qələbələr bunu deməyə tam əsas verir”.
N.BAYRAMLI

Paylaş:

Baxılıb: 580 dəfə