COVID-19 tənəffüs yollarına ciddi neqativ təsir göstərən xəstəlikdir

Bakı:

16 °C

88 %

5 m/s

Əlaqə

AZ RU EN

Ana səhifə / Sosial / COVID-19 tənəffüs yollarına ciddi neqativ təsir göstərən xəstəlikdir

COVID-19 tənəffüs yollarına ciddi neqativ təsir göstərən xəstəlikdir

22.12.2020 [09:37]

Son bir həftə ərzində dünyada daha 4,3 milyon nəfər koronavirus infeksiyasına yoluxub. Ümumdünya Səhiyyə Təşkilatının (ÜST) məlumatına əsasən, pandemiyanın başlanmasından bəri bu ən yüksək göstəricidir. Məlum olduğu kimi, bu virus tənəffüs yollarına ciddi neqativ təsir göstərən bir xəstəlikdir. Ağır hallarda tənəffüs çatışmazlığı və hətta ağciyər yetməzliyi ilə nəticələnir. Ölümə səbəb olan da daha çox bu hallardır. Bəlli olduğu kimi, siqaret ən çox ağciyərə mənfi təsir göstərir. Bu, insanların siqaret çəkmə müddəti və ağciyərdə nikotinin miqdarına görə dəyişir. Öz növbəsində siqaret çəkənlərin yeni növ koronavirus (COVID-19) infeksiyasına yoluxanların risk qrupuna daxil olduğunu deyən həkim-metodist Büllurə Yusifova bildirib ki, nəfəs aldığımız havanın içərisində xeyli yad molekullar var. Həmin hava tənəffüs yollarından keçərək təmizlənir və ağciyərə daxil olur. Siqaret çəkənlərdə isə bu təmizləmə prosesi pozulur: “Məlum olduğu kimi, tütün tüstüsünün tərkibində nikotin var. Nikotin tənəffüs yollarının selikli qişasını pozaraq bəlğəmin yaranmasına səbəb olur. Siqaret çəkənlərin hamısı bəlğəmli öskürəkdən əziyyət çəkir. Təmizləmə prosesi pozulduğuna görə tənəffüs yollarının yoluxucu xəstəliklərinin yaranma ehtimalı iki dəfə artır. Məhz buna görə də siqaret çəkənləri yeni növ koronavirusun risk qrupuna aid edirlər. Onlarda infeksiya daha ağır formada keçən xəstəlik zamanı aşağı tənəffüs yolları, yəni ağciyərlər zədələnir. Koronavirus infeksiyası zamanı ağciyərin həm sağ, həm sol payının zədələnməsi baş verir və ağır tənəffüs çatışmazlığı nəticəsində insanlar həyatlarını itirirlər. Ona görə də siqaret çəkənlərin bu zərərli vərdişdən imtina etməsi ən doğru çıxış yolu olardı”.
Mütəxəssis deyib ki, nikotin həm də asılılıq yaradan maddədir: “Məsələn, gündə bir qutu siqaret çəkən onu tərgidə bilər. Gün ərzində üç qutu siqaret çəkənin ondan tədricən imtina etməsi məsləhət görülür. Tütün yalnız ondan aktiv istifadə edənlər üçün zərərli deyil, həm də onun tüstüsünə məruz qalan, yəni passiv istifadəçilərin orqanizmi üçün də zərərlidir və qeyri-infeksion xəstəliklərin yaranmasına səbəb olur. Passiv siqaret çəkənlərdə də ürək- damar, onkoloji və tənəffüs sisteminin xroniki xəstəlikləri baş verir. Aparılan araşdırmaya görə, passiv siqaret çəkənlər arasında ağciyər, böyrək, gənc qadınlarda süd vəzinin xərçənginə daha çox rast gəlinir”.
MÜŞFİQƏ

Paylaş:

Baxılıb: 613 dəfə