Baş Prokurorluq: Ermənistanın hüquq-mühafizə orqanları bu ölkə hərbçilərinin törətdikləri cinayətlərlə bağlı beynəlxalq hüquqa uyğun araşdırma aparmalıdır

Bakı:

24 °C

78 %

10 m/s

AZ RU EN

Ana səhifə / Sosial / Baş Prokurorluq: Ermənistanın hüquq-mühafizə orqanları bu ölkə hərbçilərinin törətdikləri cinayətlərlə bağlı beynəlxalq hüquqa uyğun araşdırma aparmalıdır

Baş Prokurorluq: Ermənistanın hüquq-mühafizə orqanları bu ölkə hərbçilərinin törətdikləri cinayətlərlə bağlı beynəlxalq hüquqa uyğun araşdırma aparmalıdır

29.12.2020 [09:10]

Əvvəllər məlumat verildiyi kimi, bəzi kütləvi informasiya vasitələrində və sosial media səhifələrində Azərbaycan və Ermənistan hərbi qulluqçuları tərəfindən törədilməsi güman edilən, döyüş əməliyyatları zamanı həlak olmuş hərbçilərin, mülki şəxslərin meyitləri üzərində təhqiredici hərəkətlər edilməsi, habelə əsir götürülmüş hərbçilər və mülki vətəndaşlarla qeyri-insani rəftarı əks etdirən çoxsaylı videogörüntülər yayılıb.
Baş Prokurorluğun mətbuat xidmətindən AZƏRTAC-a bildiriblər ki, Azərbaycan Respublikasının Baş Prokurorluğu və Hərbi Prokurorluq tərəfindən aparılmış təhlillər zamanı saxta videoçarxlar istisna olunaraq reallığı əks etdirməsinə ciddi şübhələr yaranan videogörüntülər, o cümlədən bəzi hallarda əsir düşmüş şəxslərin baş və boğaz nahiyəsinin kəsilməsi yolu ilə qətlə yetirilməsi faktlarının hər biri üzrə Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.
Həmin hadisələr üzrə Azərbaycan Respublikası Baş Prokurorluğu tərəfindən cinayət işlərinin başlanaraq təqsirkar şəxslərin məsuliyyətə cəlb olunması və digər şəxslərin müəyyənləşdirilməsi istiqamətində əməliyyat-istintaq tədbirlərinin davam etdirilməsi barədə iki dəfə rəsmi məlumat verilməsinə baxmayaraq, qarşı tərəfdən həmin faktlarla bağlı hər hansı açıqlamanın verilməməsi onu təsdiq edir ki, bu cinayətlər Ermənistan hüquq-mühafizə orqanları tərəfindən araşdırılmır və Ermənistan rəhbərliyinin bundan sonra da siyasi iradə nümayiş etdirməyərək cinayət törətmiş şəxslərin cəzalandırılması istiqamətində hər hansı bir addım atmaq niyyəti yoxdur.
Döyüş əməliyyatları zamanı həlak olmuş Azərbaycan hərbi qulluqçularının meyitləri üzərində təhqiredici hərəkətlər, əsir düşmüş azərbaycanlı hərbçilərlə qeyri-insanı rəftarı əks etdirən videögörüntülər, mülki Azərbaycan vətəndaşlarının öldürülməsi və onlara xəsarət yetirilməsi faktları ilə bağlı Ermənistan hüquq-mühafizə orqanları tərəfindən tədbir görülməsi, üzərinə düşən beynəlxalq öhdəliklərin yerinə yetirilməsi, cinayət faktları üzrə açıq və ədalətli araşdırma aparılması üçün Azərbaycan Respublikası Baş Prokurorluğu tərəfindən beynəlxalq təşkilatlara müraciət edilib.
Hazırda Azərbaycan hərbi qulluqçularına qarşı qanunazidd hərəkətlər, 101 mülki Azərbaycan vətəndaşının öldürülməsi, 423 nəfərə xəsarət yetirilməsi ilə bağlı bütün cinayət işləri üzrə Azərbaycan Respublikasının prokurorluq orqanları tərəfindən zəruri və intensiv istintaq hərəkətləri aparılır.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin tapşırıq və tövsiyələrinə müvafiq olaraq, işini şəffaf və açıq quran Azərbaycan Respublikası Baş Prokurorluğu bir daha bəyan edir ki, təqsirli şəxslərin müəyyən edilərək mövcud hüquqi mexanizm və beynəlxalq hüquq normaları çərçivəsində məsuliyyətə cəlb olunmasından ötrü mümkün olan bütün tədbirlər görülməklə ictimaiyyətə bundan sonra da geniş məlumat veriləcək.
Baş Prokurorluq hesab edir ki, Ermənistan hüquq-mühafizə orqanları öz ölkəsinin hərbçiləri tərəfindən törədilmiş cinayət hadisələri ilə bağlı beynəlxalq hüquq normalarının tələblərinə uyğun olaraq araşdırma aparmalı və dünya ictimaiyyətinə ətraflı məlumat verməlidir.

Paylaş:

Baxılıb: 807 dəfə