FHN-in Vətən müharibəsində xidmətdə fərqlənmiş əməkdaşları Gənclər Günü münasibətilə mükafatlandırılıb

Bakı:

24 °C

66 %

3 m/s

AZ RU EN

Ana səhifə / Sosial / FHN-in Vətən müharibəsində xidmətdə fərqlənmiş əməkdaşları Gənclər Günü münasibətilə mükafatlandırılıb

FHN-in Vətən müharibəsində xidmətdə fərqlənmiş əməkdaşları Gənclər Günü münasibətilə mükafatlandırılıb

02.02.2021 [09:51]

Fevralın 1-də Fövqəladə Hallar Nazirliyi işçilərinin həmkarlar ittifaqının təşkilatçılığı ilə nazirliyin Xətai rayonunda yerləşən inzibati binasında Vətən müharibəsi zamanı xidmətdə fərqlənmiş əməkdaşlarla 2 fevral - Azərbaycan Gəncləri Günü münasibətilə tədbir keçirilib.
AZƏRTAC xəbər verir ki, Dövlət Himninin səsləndirilməsindən sonra Azərbaycanın azadlığı və ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad olunub.
FHN işçilərinin həmkarlar ittifaqının sədri Mehman İsmayılov tədbirdə çıxış edərək 44 günlük Vətən müharibəsində Azərbaycan Respublikasının Prezidenti, Müzəffər Ali Baş Komandan İlham Əliyevin böyük siyasi iradəsi və Azərbaycan Ordusunun rəşadəti və qəhrəmanlığı sayəsində qazanılmış Zəfər münasibətilə toplantı iştirakçılarını təbrik edib.
Erməni terrorçularının zaman-zaman Azərbaycan xalqının başına gətirdiyi faciələrdən, həyata keçirdikləri soyqırımı aktlarından, torpaqlarımızın 20 faizinin Ermənistan silahlı qüvvələri tərəfindən işğalından, tarixi ərazilərimizdə törədilən vandalizmdən, vəhşiliklərdən söz açan Mehman İsmayılov deyib: “Ermənistan ordusunun genişmiqyaslı təxribatlarına cavab olaraq rəşadətli Azərbaycan Ordusunun Prezident, Müzəffər Ali Baş Komandan İlham Əliyevin rəhbərliyi ilə “Dəmir yumruq” adı altında başladığı 44 günlük əks-həmlə əməliyyatı nəticəsində tarixi torpaqlarımız otuz illik işğaldan sonra azad edildi. Bu şanlı Qələbə ilə Ermənistan silahlı qüvvələrinin “məğlubedilməzlik mifi” darmadağın edildi, Azərbaycan əsgərinin sarsılmaz qələbə əzmi və milli ordumuzun hərbi qüdrəti, potensialı bütün dünyaya nümayiş etdirildi”.
Mehman İsmayılov Vətən müharibəsi dövründə düşmənin Azərbaycanın mülki əhalisini və yaşayış məntəqələrini, infrastruktur obyektlərini ağır artilleriya və raket qurğularından intensiv atəşə tutulması nəticəsində baş verən yanğın və fəsadların aradan qaldırılmasında, mühəndis-istehkam qurğularının yaradılmasında FHN əməkdaşlarının xüsusi fədakarlıqlarından söz açıb. O, nazirlik əməkdaşlarının Vətən müharibəsi dövründə könüllü olaraq və ya səfərbərlik üzrə döyüşlərdə iştirak edərək, rəşadətlə vuruşduqlarını vurğulayıb. FHN həmkarlar ittifaqının sədri hazırda nazirliyin əməkdaşlarının işğaldan azad olunmuş ərazilərimizin minalardan təmizlənməsi işlərində yaxında iştirak etdiklərini diqqətə çatdırıb.
Sonra nazirliyin Vətən müharibəsində könüllü olaraq və səfərbərlik əsasında iştirak etmiş, eləcə də xidmətdə fərqlənən əməkdaşları FHN işçilərinin həmkarlar ittifaqı tərəfindən mükafatlandırılıblar.

Paylaş:

Baxılıb: 699 dəfə