Azərbaycanda koronavirus pandemiyasına qarşı sistemli mübarizə aparılır

Bakı:

24 °C

64 %

6 m/s

Əlaqə

AZ RU EN

Ana səhifə / Sosial / Azərbaycanda koronavirus pandemiyasına qarşı sistemli mübarizə aparılır

Azərbaycanda koronavirus pandemiyasına qarşı sistemli mübarizə aparılır

02.04.2021 [22:36]

Məlum olduğu kimi, bu gün dünya ölkələri koronavirus pandemiyası ilə mübarizəyə səfərbər olunub. Azərbaycan da bu baxımdan istisna deyil. Qeyd edək ki, ötən ilin əvvəllərindən başlayaraq ölkəmizdə yeni növ koronavirus (COVID-19) infeksiyası ilə mübarizə çərçivəsində həyata keçirilən sistemli tədbirlər sayəsində müsbət nəticələr əldə edilib.

Məsələ ilə bağlı Milli Məclisin Səhiyyə komitəsinin sədr müavini, tibb elmləri doktoru Rəşad Mahmudov bildirib ki, koronavirusla mübarizədə “qızıl açar” rolunu oynayan vaksinlərin ölkəyə vaxtında gətirilməsi təqdirəlayiqdir: “Ölkəmizdə peyvəndləmə işinə Avropanın qabaqcıl ölkələri ilə birlikdə start verildi. Azərbaycan həm də Cənubi Qafqazda xəstəliklə mübarizədə peyvənd prosesinə ilk başlayan ölkədir. Təsadüfi deyil ki, Azərbaycan peyvənd olunmuş əhalinin faizinə görə MDB regionunda liderdir”.

Millət vəkilinin sözlərinə görə, əhalinin xeyli hissəsi artıq peyvənd olunub və insanlar bunun faydasını anlayırlar: “Vaksinasiya işi davam edir və Azərbaycan qalan əhalinin də peyvənd olunması üçün bütün mümkün tədbirlərdən istifadə edir. Yaxın bir il ərzində əhalinin 70 faizinin peyvənd olunması qarşıda duran vacib məsələdir. Bu, bizim sağlam və təhlükəsiz həyatımızın təmin olunması deməkdir”.

Tibb elmləri doktoru vaksinasiyanın faydasından da danışıb: “Vaksin olunan insanlar ay yarımdan sonra orqanizmdə yaranan immunitet və anticisimlər səbəbindən özünü gələcəkdə baş verəcək ağırlaşma halına qarşı hazırlayır. Yəni həm tibbi nöqteyi-nəzərdən, həm də psixoloji cəhətdən insan buna hazır olur. Peyvənd olunan insanların sayının artması, təbii ki, xəstəliklə mübarizədə təhlükəsizliyin təminatıdır”.

“Azərbaycan dövləti Prezident İlham Əliyevin rəhbərliyi ilə COVID-19-un ölkəmizdə yayıldığı ilk günlərdən vəziyyəti nəzarətə götürüb, genişmiqyaslı tədbirlər həyata keçirməyə başlayıb, istər insanların sağlamlığının və təhlükəsizliyinin təmin edilməsi, istərsə də koronavirus xəstələrinin müalicəsi, səhiyyə infrastrukturunun təkmilləşdirilməsi, yeni xəstəxanaların açılması və tibb müəssisələrinin texniki təchizatı baxımından bütün məsələləri uğurla həll edib”. Bu fikirləri isə Milli Məclisin deputatı Kamilə Əliyeva deyib.

Millət vəkilinin sözlərinə görə, dövlət orqanlarının fəaliyyətinin əlaqələndirilməsi, ümumi strategiyanın həyata keçirilməsi məqsədilə Nazirlər Kabineti yanında Operativ Qərargah yaradılıb, ölkədə karantin rejimi tətbiq olunub, səhiyyə sisteminin restruktizasiyası, tibbi sənayenin inkişafı fonunda COVID-19 virusunun diaqnostikası, habelə bu xəstəliyin müalicəsi üçün zəruri olan Avropa istehsalı laborator testlər Azərbaycana gətirilib, paytaxt və regionlarda xüsusi rejimli xəstəxanalar, karantin zonaları yaradılıb, eləcə də modul tipli xəstəxanalar qurulub. Deputat qeyd edib ki, Ümumdünya Səhiyyə Təşkilatı (ÜST) ölkəmizdə koronavirusla mübarizədə görülən tədbirləri çox yüksək qiymətləndirərək digər ölkələri də Azərbaycanın təcrübəsindən yararlanmağa çağırıb: “Bütövlükdə, Azərbaycan dövləti pandemiya ilə mübarizədə bir sıra qlobal təşəbbüslərlə çıxış edib. Bu təşəbbüslər beynəlxalq təşkilatlar tərəfindən təqdir olunub”.

Nardar BAYRAMLI

Paylaş:

Baxılıb: 814 dəfə