Milli mətbuatın davamlı inkişafının təmin edilməsi dövlət siyasətinin prioritet istiqamətlərindəndir

Bakı:

20 °C

77 %

3 m/s

AZ RU EN

Ana səhifə / Sosial / Milli mətbuatın davamlı inkişafının təmin edilməsi dövlət siyasətinin prioritet istiqamətlərindəndir

Milli mətbuatın davamlı inkişafının təmin edilməsi dövlət siyasətinin prioritet istiqamətlərindəndir

23.07.2021 [09:16]

İsmayıllı Regional Mədəniyyət İdarəsinin tabeliyində fəaliyyət göstərən Şamaxı rayon Heydər Əliyev Mərkəzinin və Yeni Azərbaycan Partiyası Şamaxı rayon təşkilatı gənclər birliyinin birgə təşkilatçılığı ilə 22 iyul - Milli Mətbuat Günü münasibətilə “Ümummilli Lider Heydər Əliyevin müasir Azərbaycan mətbuatının inkişafındakı rolu” mövzusunda onlayn konfrans keçirilib.
İsmayıllı Regional Mədəniyyət İdarəsindən AZƏRTAC-ın bölgə müxbirinə verilən məlumatda bildirilib ki, onlayn konfransı YAP Şamaxı rayon təşkilatı gənclər birliyinin sədri Nuranə Məmmədova açaraq Milli Mətbuat Günü münasibətilə media işçilərini təbrik edib.
Şamaxı rayon Heydər Əliyev Mərkəzinin direktoru Könül Eyvazova çıxış edərək milli mətbuatın yaranma tarixi barədə danışıb. Qeyd edib ki, 1875-ci il iyulun 22-də Həsən bəy Zərdabinin redaktorluğu ilə nəşr olunan “Əkinçi” qəzetinin fəaliyyətə başlaması ilə Azərbaycanda milli mətbuat tarixinin əsası qoyulub. Vurğulayıb ki, cəmi 56 sayı işıq üzü görən “Əkinçi” qəzetinin xalqımızın milli birliyinin möhkəmlənməsində, milli oyanışında əvəzsiz xidmətləri olub. “Əkinçi” qəzetinin ardınca “Ziya”, “Kəşkül”, “Kaspi” kimi qəzetlər də milli mətbuatın inkişafına öz töhfələrini veriblər. Könül Eyvazova Azərbaycanda milli mətbuatın inkişafında Ulu Öndər Heydər Əliyevin xidmətlərinin xüsusi olaraq qeyd edib. Ümummilli Liderin 1998-ci il 6 avqust tarixli “Azərbaycan Respublikasında söz, fikir və mətbuat azadlığının təmin edilməsi sahəsində əlavə tədbirlər haqqında” Fərmanının bu sahədə xüsusi əhəmiyyətini vurğulayıb.
Milli Məclisin deputatı Hikmət Babaoğlu çıxışında vurğulayıb ki, mətbuat cəmiyyətin aparıcı ictimai institutlarından biridir. “Ölkəmizdə milli mətbuatın davamlı inkişafının təmin edilməsi dövlət siyasətinin prioritet istiqamətlərindəndir. Ulu Öndər Heydər Əliyevin bütün siyasi və dövlətçilik fəaliyyəti milli dövlətçiliyin inkişafı və möhkəmlənməsi ilə bağlı idi. Məhz Ümummilli Lider Heydər Əliyevin sayəsində Azərbaycan milli mətbuatı qabaqcıl ideyaların carçısı, dövrün ictimai-siyasi həyatının güzgüsü olmuşdur. Azərbaycanda demokratik, plüralist mətbuatın formalaşmasından danışarkən azad mətbuatın inkişafına əngəl yaradan süni məhdudiyyətlərin aradan qaldırılması, qanunvericiliyin təkmilləşdirilməsi və müasir dünya standartlarına uyğunlaşdırılması istiqamətində görülən işlər Ulu Öndər Heydər Əliyevin azad sözə verdiyi qiymətin təzahürüdür”, - deyə Hikmət Babaoğlu qeyd edib.
Konfransda çıxış edənlər bu gün qalib ölkəni təmsil edən Azərbaycan mediasının üzərinə çox böyük məsuliyyətin düşdüyünü bildiriblər. Vurğulanıb ki, informasiya müharibəsinin aparıldığı bir zamanda qabaqcıl texnologiyaların istifadəsi, media məkanında sürətli qloballaşma prosesinin getməsi jurnalistlərin məsuliyyətini daha da artırıb. Belə ki, artıq cəmiyyəti daha peşəkar şəkildə məlumatlandırmaq, obyektiv məlumatlar vermək prioritet vəzifələrdəndir.
Sonda konfrans iştirakçıları Həsən bəy Zərdabinin məzarına virtual səyahət ediblər.

Paylaş:

Baxılıb: 710 dəfə