Müəllimlərin sertifikasiyası

Bakı:

25 °C

41 %

6 m/s

Əlaqə

AZ RU EN

Ana səhifə / Sosial / Müəllimlərin sertifikasiyası

Müəllimlərin sertifikasiyası

07.07.2023 [11:10]

Məqsəd kadrların sayını azaltmaq deyil...

Yeganə BAYRAMOVA

İnformasiya Kommunikasiya Texnologiyalarının (İKT) inkişaf etdiyi zamanda cəmiyyətin daha çox diqqət yetirdiyi təhsil sistemi də yeniləşmə tələb edir. Ölkəmizdə təhsil sahəsində islahatların aparılması istiqamətində az işlər görülməyib. Yeni milli kurikulum proqramlarının qəbulu təhsilalanların yalnız mükəmməl biliyə deyil, həm də müvafiq olaraq bacarıq və vərdişlərə yiyələnmələri ilə xarakterizə olunur. Təhsilalanlarda bilik, bacarıq və vərdişləri stimullaşdıran təfəkkürün formalaşması onlarda müstəqil yaradıcılıq və tədqiqatçılıq qabiliyyətlərini inkişaf etdirir. Sirr deyil ki, bu problemin həllində müstəsna yük müəllimlərin üzərinə düşür. Bundan ötrü müasir müəllim özünü və tədris prosesinə yanaşma formasını dəyişməlidir.

2014-cü ildən başlanan və mərhələli şəkildə davam edən müəllimlərin diaqnostik qiymətləndirilməsi bu problemin həllinə doğru ilk addım kimi əhəmiyyətli idi. Belə ki, imtahana cəlb edilmiş müəllimlərin ixtisas fənlərindən və kurikulumdan hansı bilik və bacarıqlara malik olduqları üzə çıxdı. Nəticələr göstərdi ki, müəllimlərin vaxtaşırı özünüyoxlama imtahanlarına təhrik edilməsi onların zəif nöqtələrinin aşkarlanmasına səbəb olur. Beləliklə, təhsilverənlərin daha çox keyfiyyətli və səmərəli işləmələri üçün istiqamətlərin müəyyənləşməsi asanlaşır.

2020-ci ildən isə ölkə ümumtəhsil məktəblərində çalışan müəllimlərin sertifikatlaşdırılması məsələsi gündəmə gəldi. Beş ildən bir keçirilməsi nəzərdə tutulan sertifikatlaşdırmanın reallaşdırılması, şübhəsiz ??, təhsilin keyfiyyətinə təsir etmək baxımından növbəti və daha güclü təkan idi. Əlbəttə, əvvəlki imtahandan fərqli olaraq, burada qoyulan sualların sınaq xarakteri daşımayacağını və çətinlik dərəcələrinə görə kifayət qədər ağır olacağını ehtimal etmək olar.

Elm və təhsil naziri Emin Əmrullayev sertifikatlaşdırma prosesinin birinci mərhələsinin 2022-2027-ci illəri əhatə edəcəyini deyib. Nazir bu barədə “Sertifikatlaşdırma: Peşəkar müəllim-keyfiyyətli təhsil” tədbirində açıqlama verib.

10 faiz yüksək nəticə göstərib

Nazirin sözlərinə görə, prosesin əsas məqsədi təhsildə keyfiyyəti artırmaq, həmçinin keçmiş səhvlərdən nəticə çıxarmaqdır: “İbtidai siniflər üzrə 30 min müəllim sertifikatlaşdırma prosesinə cəlb edilib. 2023-cü il üzrə ibtidai sinif müəllimləri üçün statistik nəticələrə görə, yüksək nəticə göstərənlər 10 faiz, qənaətbəxş hesab edilən 53 faiz, təkmilləşdirilməyə ehtiyacı olanlar isə 30 faiz təşkil edib”.

223 nəfər 0-9 bal toplayıb

E.Əmrullayev qeyd edib ki, sertifikasiya prosesində iştirak edən 30 min ibtidai sinif müəlliminin 0,7 faizi, yəni 223 nəfəri 0-9 bal toplayıb. Nazir qeyd edib ki, müəllimlərdən 10 faizi isə 10-19 bal yığıb: “51 bal həddini keçən müəllimlərin faiz göstəricisi isə 17 faiz təşkil edib”.

Kənar ixtisas sahibləri sıradan çıxacaq

Təhsil üzrə ekspert Elçin Əfəndi “Yeni Azərbaycan”a açıqlamasında bildirib ki, müəllimlərin sertifikasiya imtahanı məhz qarşıya qoyulan məqsəd üzrə həyata keçirilərsə, kifayət qədər müsbət nəticələr əldə edə bilərik: “Ən başlıcası övladlarımıza təhsil verən müəllimlər arasında tanışlıqla işə düzələn, kənar ixtisas sahibləri sıradan çıxacaq. Eyni zamanda, müasir təhsil standartlarından xəbəri olmayan və yaxud 2008-ci ildən etibarən ölkəmizdə tətbiq olunmağa başlayan kurikulum sistemindən məlumatsız olan, ümumi təhsil vermək imkanları aşağı olan şəxslər prosesdən tədricən uzaqlaşacaq”.

Müəllim o qədər savadlı olmalıdır ki...

Ekspert qeyd edib ki, hazırda ölkəmizdə orta ümumtəhsil müəssisələrində 160 mindən çox müəllim çalışır: “Həmin müəllimlər 4440-a yaxın orta ümumtəhsil müəssisələrində təhsilverən statusundadır. Bu zaman 1 milyon 900 mindən çox şagirdin təhsilində birbaşa məsuliyyət onların üzərinə düşür. Təhsil verənlər o qədər təcrübəli və savadlı olmalıdır ki, gələcəkdə daha ixtisaslı kadrlar yetişdirə bilək”.

Bu, düzgün yanaşma deyil

E.Əfəndi vurğulayıb ki, imtahanlar müəllimlərin sayının azaldılması məqsədilə keçirilmir: “Bəzən düşünürlər ki, müəllimlərin sertifikasiyası onların sayının azaldılması üçündür. Ancaq bu, düzgün yanaşma deyil. Məqsəd müəllimlərin sayını azaltmaq yox, prosesdən savadsız “müəllimləri” uzaqlaşdırmaqdır. Bu, övladlarımızın gələcəyi baxımından doğru addımdır. Hesab edirəm ki, gənc kadrlar arasından da müsabiqədən keçə bilməyənlər var”.

Paylaş:

Baxılıb: 727 dəfə