Keçid var, piyada yox

Bakı:

24 °C

88 %

2 m/s

Əlaqə

AZ RU EN

Ana səhifə / Sosial / Keçid var, piyada yox

Keçid var, piyada yox

14.07.2023 [12:01]

Piyadalar niyə keçid və zolaqlardan keçmirlər?

M.BAYRAMLI

Bakıda avtomobil piyadanı vurub. Daxili İşlər Nazirliyinin Nəqliyyatı İntellektual İdarəetmə Mərkəzindən (NİİM) verilən xəbərə görə, yolun hər iki tərəfində piyada keçidi olmasına baxmayaraq, keçiddən istifadə etməyən piyadanı avtomobil vurub. Yol-nəqliyyat hadisəsi dünən səhər saatlarında Səbail rayonu, Bülbül prospektində, ”Sahil” metro stansiyasının yaxınlığında baş verib.

"Təəssüf ki, dəfələrlə xəbərdarlıq edilməsinə baxmayaraq, vətəndaşların bəziləri hələ də piyada keçidlərindən istifadə etmirlər. Nəticədə də həyatlarını təhlükəyə atırlar", - deyə məlumatda qeyd edilib.

Bakıda piyadaların iştirakı ilə baş verən yol qəzalarının sayı açıqlanıb

NİİM müşahidə kameralarının görüntüləri əsasında paytaxt yollarında piyadaların iştirakı ilə baş verən yol-nəqliyyat hadisələrini təhlil edib. Ötən ilin statistikasına nəzər salsaq görərik ki, piyadaların avtomobillə vurulması Bakı şəhəri üzrə ümumi qəza hadisələrinin təxminən 49 faizini təşkil edib. Piyada vurulması ilə nəticələnən 269 yol-nəqliyyat hadisəsində 134 nəfər ölüb, 153 nəfər isə yaralanıb. Ən faciəvi hal isə bəzi piyadaların uşaqlarla birlikdə qaydalara əmək etməyərək yolu keçmələridir. Belə ki, 2022-ci ildə piyadaların vurulması ilə nəticələnən qəzalarda 7 uşaq dünyasını dəyişib, 15-i isə xəsarət alıb.

Məhz bu kimi hadisələrin qarşısını almaq üçün mütəmadi tədbirlərin həyata keçirilməsinə baxmayaraq, piyadalar özlərinin və sürücülərin həyatlarını təhlükəyə atırlar. Yeraltı və yerüstü piyada keçidləri, işıqforlar olduğu halda, əksər piyadalar yol hərəkəti qaydalarına riayət etmirlər. Görəsən, piyada mədəniyyətinin formalaşması üçün nə etmək olar?

“Yol hərəkəti haqqında qanunu və bu qanundan irəli gələn tələbləri bilməliyik. Piyadaların qayda pozuntusunun qarşısını almaq üçün piyada mədəniyyəti evdə valideynlər, məktəblərdə müəllimlər, küçə və yollarda isə polislərin sayəsində formalaşmalıdır”.

Bunu yeniazerbaycan.com-a açıqlamasında nəqliyyat üzrə ekspert Talıb Ağayev bildirib. Onun sözlərinə görə, yol nəqliyyat hadisələrinin baş verməsinə əsas səbəb sürücü səhlənkarlığı və piyada diqqətsizliyidir: “Piyada keçidləri ola-ola avtomobillərin intensiv keçdiyi yollardan keçirlər. Piyada keçidini zaman itkisi kimi görürlər, sağa-sola baxmadan yolu keçərlər. Bu azmış kimi qulaqlıq, telefon və diqqət yayındıran digər vasitələrdən də istifadə edirlər. Nəticədə keçidlərdən düzgün istifadə edilməməsi şəhərdə sıxlıq yaradır. Ona görə də məsuliyyətsiz piyadalara qarşı sərt tədbirlər görülməlidir”.

Paylaş:

Baxılıb: 759 dəfə