“Google”nin zəlzələ xəbərdarlığı!

Bakı:

24 °C

78 %

3 m/s

Əlaqə

AZ RU EN

Ana səhifə / Sosial / “Google”nin zəlzələ xəbərdarlığı!

“Google”nin zəlzələ xəbərdarlığı!

25.08.2023 [10:46]

İnsanların psixologiyasına təsir edən mesajlar...

Y.BAYRAMOVA

“Google” yenidən Azərbaycan vətəndaşlarına “zəlzələ xəbərdarlığı” mesajı göndərib. Nəticədə insanların əksəriyyəti yenidən zəlzələnin baş verəcəyi ilə bağlı təşvişə düşüblər. Qeyd edək ki, bu, avqust ayında artıq 2-ci “zəlzələ xəbərdarlığı” mesajıdır.

Belə mesajlar bəzi insanların psixoloji durumuna mənfi təsir göstərir. Həssas olanlar, müxtəlif xəstəlikdən əziyyət çəkənlər xəbərdarlıq mesajlarından sözün həqiqi mənasında qorxuya düşürlər. Hətta həmin

şəxslərin həyatı zəlzələyə görə yox, məhz o mesajlara görə təhlükə altına düşür deyə bilərik.

Ekspertlərə görə, zəlzələ haqqında heç bir proqram dəqiq şəkildə məlumat verə bilməz. Çünki zəlzələ təbii fəlakət olduğu üçün onun dəqiq vaxtı və zamanı olmur. Lakin bəzi hallarda məlumat almaq mümkündür. Alimlər tərəfindən müəyyən edilmiş ərazilərdə zəlzələ ölçən cihazlar quraşdırılır. Müxtəlif məlumatlar seysmoqraf cihazlarında bir yerə toplanır. Daha sonra toplanan məlumatlar “Google” tərəfindən sürətli şəkildə hesablanır və cihazlara yönləndirilir. Zəlzələ haqqında məlumat “Google Yer” bildirimlər xidməti aktiv olduğu halda gəlir.

Xatırladaq ki, srağagün yerli vaxtla saat 01:23-də Masallı və Cəlilabad rayonlarında zəlzələ olub. Respublika Seysmoloji Xidmət Mərkəzindən verilən məlumata görə, zəlzələnin maqnitudası 5 bala yaxındır.

Xəbərdarlıq mesajının psixoloji təsirləri...

Psixoloq Elnur Rüstəmov “Yeni Azərbaycan”a açıqlamasında bildirib ki, təbii fəlakətlərdən doğan ekstremal vəziyyətlər həmin situasiyanı yaşayan və kənardan seyir edən insanların psixologiyasına böyük ölçüdə mənfi təsir göstərir. Onun sözlərinə görə, belə hadisələr psixoloji baxımdan insanlarda gərginlik yaradır və bu davranışda özünü biruzə verir: “Çünki yaranmış situasiya və ona bağlı məlumatların olması istər-istəməz insanlarda təşviş, həyəcan və qorxu kimi emosional halların yaranmasına səbəb olur. Xüsusən də, insanın ən mühüm tələbatlarından olan təhlükəsizliklə bağlı qorxuları varsa, problem yaranırsa, bu, davranışda özünü mütləq biruzə verir. Bu baxımdan son günlər “zəlzələ xəbərdarlığı” kimi mesajların mobil telefonlara ötürülməsi həssas insanların psixologiyasında mənfi izlər buraxır. Bəlkə də insanların bəzisi belə mesajlara önəm vermir və olanları soyuqqanlı şəkildə qarşılayırlar. Ancaq nəzərə almaq lazımdır ki, bir çox insan psixoloji baxımdan zəif, həssasdırlar və affekt vəziyyətinə düşə bilirlər. Bu isə onların sağlamlığında müəyyən fəsadların yaranmasına səbəb ola bilər”.

Hər kəs soyuqqanlı ola bilmir...

E.Rüstəmov qeyd edib ki, bəzən sosial şəbəkələrdə yenidən zəlzələ olması ilə bağlı fikirlər səsləndirilir: “İnsanlar bilib-bilmədən, düşünmədən bu cür addımlar atırlar. Ancaq unutmamalıyıq ki, qardaş ölkədə zəlzələ nəticəsində baş verən dəhşətli dağıntılar, ölümlər, itkilər vətəndaşlarımızın psixologiyasında dərin izlər buraxdı. Bu baxımdan da ölkəmizdə zəlzələ baş verəndə yaxud zələzələyə dair xəbərdarlıqlar olanda bəziləri istər-istəməz təşvişə düşürlər. Hər kəs soyuqqanlı ola bilmir. İnsanların düşüncəsi, psixologiyası, hadisələrə yanaşma tərzi və reaksiyası fərqlidir. Sosial şəbəkələrdə zəlzələ ilə bağlı bilib-bilmədən hansısa məlumat paylaşmaq düzgün deyil. Tez zamanda qorxu içinə düşən insanlar bilməlidir ki, zəlzələ və digər təbii fəlakətlər, ekstremal vəziyyətlərdə qəsdən və ya bilməyərəkdən müxtəlif məlumatlar yayılırsa, bunların əksəriyyəti şayiə xarakterli olur: “Ona görə belə vəziyyətlərdə yalnız rəsmi qurumların məlumatlarına inanmaq və istinad etmək lazımdır”.

Mesajların göndərilməsi normaldır

“Multimedia” İnformasiya Sistemləri Texnologiyaları Mərkəzinin direktoru Osman Gündüz bildirib ki, zəlzələ ilə bağlı xəbərdarlıq mesajı “Google”un Android platformasından göndərilib. Onun sözlərinə görə, “Google” zəlzələ xəbərdarlığı xidmətini xarici seysmik qurumların datalarından əldə edərək təqdim edir: “Bu xəbərdarlıq mesajından sonra əhali arasında xeyli çaşqınlığın, məlumatsızlığın, təşvişin, hətta dezinformasiyaların yayılması müşahidə edilib. “Google” bu dataları beynəlxalq resurslardan əldə etməklə saniyələr öncə Android istifadəçilərə yönəldir. Zəlzələ haqqında məlumat “Google Yer” bildirimlər xidməti aktiv olduğu halda gəlir. Lakin insanlar unutmamalıdırlar ki, zəlzələ haqqında heç bir proqram dəqiq şəkildə məlumat verə bilməz. Həmçinin mesaj hər kiçik zəlzələdə gəlmir. 4,5 baldan çox olarsa, telefonlara informasiyalar ötürür. Göndərilən mesajlarda zaman, məsafə və bal fərqləri olur. Çünki hər bir telefonda saat və yer fərqlidir. Elə vaxt olur ki, ölkə xaricində zəlzələ olarkən bəzi

şəxslərə bildirim gəlir. Ümumiyyətlə, bu kimi hallar normaldır. Lakin proqram heç bir halda zəlzələ anını deyə bilməz. Ancaq müəyyən müddət sonra bizə məlumat gəlir. Bu da məsafəyə görə dəyişir”.

Paylaş:

Baxılıb: 871 dəfə