III Şuşa Qlobal Media Forumu Azərbaycanın informasiya mübarizəsində söz sahibinə çevrildiyini təsdiqlədi

Bakı:

16°C

88%

0m/s

AZ RU EN

Ana səhifə / YAP xəbərləri / III Şuşa Qlobal Media Forumu Azərbaycanın informasiya mübarizəsində söz sahibinə çevrildiyini təsdiqlədi

III Şuşa Qlobal Media Forumu Azərbaycanın informasiya mübarizəsində söz sahibinə çevrildiyini təsdiqlədi

22.07.2025 [16:47]

Xankəndidə keçirilən III Şuşa Qlobal Media Forumu təkcə beynəlxalq jurnalistlərin iştirakı ilə keçirilən yüksək səviyyəli tədbir deyil, həm də Azərbaycanın beynəlxalq mövqeyini, informasiya dayanıqlılığını və müasir çağırışlara verdiyi cavabları ortaya qoyan mühüm platforma oldu. Forumun builki mövzusu – “Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” – təkcə texnologiya ilə bağlı deyil, həm də qlobal informasiya müharibəsinin fonunda medianın məsuliyyətinə dair çağırış idi.

Prezident İlham Əliyevin Forumda iştirakı tədbirin siyasi və strateji çəkisini bir neçə dəfə artırdı. Onun müxtəlif istiqamətləri əhatə edən cavabları yalnız iştirakçılar üçün deyil, həm də qlobal siyasi analitiklər üçün mühüm siqnallar idi. Forum iştirakçılarına təqdim edilən cavablar Azərbaycanın 30 illik mübarizə yolu, müstəqillik uğrunda çəkilən zəhmət, regionda yeni geosiyasi düzənin konturları və ölkənin prinsipial mövqeyinin dərin təhlili kimi dəyərləndirilə bilər.

Dövlət başçısı bir daha göstərdi ki, Azərbaycan informasiya açıqlığını, medianın azad və peşəkar fəaliyyətini dəstəkləyən, onu inkişafın əsas dayaqlarından biri hesab edən ölkədir. Qlobal informasiya məkanında gedən manipulyasiyalara, ikili standartlara və təxribatlara qarşı Azərbaycanın müstəqil, faktlara əsaslanan və milli maraqlara xidmət edən mövqeyi ortaya qoyuldu. Prezidentin səsləndirdiyi fikirlər media ilə hökumət arasında şəffaf münasibətin, qarşılıqlı etimadın və milli informasiya təhlükəsizliyinin vacib olduğunu bir daha təsdiqlədi.

Xüsusilə qeyd olunmalıdır ki, Forumun Xankəndidə – uzun illər işğal altında olmuş və separatçı rejimin yuvasına çevrilmiş ərazidə keçirilməsi həm rəmzi, həm də strateji baxımdan önəmli idi. Bu, Azərbaycan dövlətinin suverenliyini və ərazi bütövlüyünü tam bərpa etməsindən sonra beynəlxalq ictimaiyyətə verilən bir mesaj idi: Qarabağ Azərbaycandır və bu torpaqlarda artıq yalnız sülh, inkişaf və əməkdaşlıq hökm sürür.

Prezidentin çıxışında həm keçmişin dərsləri, həm də gələcəyə yönəlik baxışlar öz əksini tapdı. O, Ermənistanla sülh prosesinin perspektivlərini aydın və konkret şərtlərlə ifadə etdi – konstitusiya dəyişiklikləri, işğalçılıq iddialarından imtina və Minsk qrupunun tarixə qovuşması. Sülh üçün əsas şərt məhz bu geridönməzlikdir. Prezidentin “Heç vaxt təslim olmamaq və işğalla barışmamaq” çağırışı isə yalnız Azərbaycan xalqına deyil, eyni zamanda digər işğala məruz qalmış xalqlara da ünvanlanmış universal bir mesaj kimi dəyərləndirilə bilər.

Forumda mühüm müzakirə predmetlərindən biri Zəngəzur dəhlizinin açılması və bu marşrutun region üçün daşıdığı iqtisadi və geosiyasi əhəmiyyət idi. Prezident bu dəhlizin yalnız Azərbaycanla Naxçıvanı deyil, bütövlükdə region ölkələrini birləşdirən beynəlxalq tranzit xətti olacağını bildirdi. Bu, Şərq-Qərb və Şimal-Cənub dəhlizlərinin yeni bir vektorla tamamlanması deməkdir. Azərbaycan artıq müasir infrastruktur, limanlar, dəmir yolları və gömrük sistemləri vasitəsilə regionun əsas tranzit qovşaqlarından birinə çevrilməkdədir.

Forumda eyni zamanda Azərbaycanın beynəlxalq enerji və iqlim siyasətinə dair fikirlər də səsləndi. COP29 konfransına ev sahibliyi və yaşıl gündəliyin həyata keçirilməsi Azərbaycanın davamlı inkişaf, çoxtərəfli diplomatiya və ekoloji məsuliyyət sahəsində liderliyini nümayiş etdirir. Prezident İlham Əliyevin çıxışlarında enerji resurslarından siyasi alət kimi istifadə edilmədiyi, əksinə, kommersiya prinsiplərinə əsaslanan tərəfdaşlığın əsas götürüldüyü bir daha vurğulandı. Bu da Azərbaycanın etibarlı və öhdəliklərinə sadiq tərəfdaş imicini gücləndirir.

Azərbaycan-Rusiya münasibətlərində yaşanan son hadisələr – xüsusilə AZAL təyyarəsinin vurulması ilə bağlı məsələyə münasibət – dövlətin prinsipial və hüquqa əsaslanan mövqeyini ortaya qoydu. Prezident qeyd etdi ki, bu hadisənin araşdırılması və ədalətin bərqərar olunması üçün beynəlxalq hüquq müstəvisində mübarizə davam etdiriləcək. Bu, həm də Azərbaycanın beynəlxalq hüququn və ədalətin müdafiəçisi olduğunu göstərir.

Bütün bu çıxışlar fonunda Prezidentin medianın rolu ilə bağlı fikirləri də xüsusi vurğulanmalıdır. O, Azərbaycan mediasının həm daxildə, həm də beynəlxalq müstəvidə nüfuz qazandığını bildirdi və mediamızın dövlət maraqlarını qorumaqla yanaşı, informasiya cəbhəsində fəal şəkildə iştirak etdiyini qeyd etdi. Əsassız iddialara qarşı arqumentli cavablar vermək, informasiya manipulyasiyalarını ifşa etmək medianın əsas vəzifələrindən biridir və Azərbaycan mətbuatı bu istiqamətdə əhəmiyyətli yol qət edib.

III Şuşa Qlobal Media Forumu yalnız medianın gündəlik problemlərinin müzakirə edildiyi bir platforma deyil, eyni zamanda, Azərbaycanın mövcud reallıqları, postmünaqişə dövrünün strateji xətti, beynəlxalq əməkdaşlıq imkanları və qlobal çağırışlara verdiyi cavabların təhlil edildiyi mühüm bir siyasi və informasiya hadisəsi idi. Forumda səsləndirilən fikirlər, verilən mesajlar həm daxili sabitliyin, həm də regional və qlobal etibarlılığın bünövrəsini təşkil edir.

Namiq Əhmədov,

YAP Xəzər rayon təşkilatının sədri

Paylaş:

Baxılıb: 211 dəfə