Qubadlı şəhəri günü: Azadlıq və dirçəlişin tarixi

Bakı:

27 °C

46 %

3 m/s

Əlaqə

AZ RU EN

Ana səhifə / YAP xəbərləri / Qubadlı şəhəri günü: Azadlıq və dirçəlişin tarixi

Qubadlı şəhəri günü: Azadlıq və dirçəlişin tarixi

24.10.2025 [19:15]

25 oktyabr Azərbaycan xalqının yaddaşında əbədi qalacaq tarixi bir gündür — Qubadlı şəhərinin işğaldan azad olunduğu gün. 2020-ci ilin bu tarixində Azərbaycan Ordusu Ali Baş Komandan İlham Əliyevin rəhbərliyi ilə qəhrəmanlıq və birlik nümunəsi göstərərək Qubadlını düşmən işğalından azad etdi. Bu xəbər bütün ölkədə böyük sevinclə qarşılandı. Çünki Qubadlının azadlığı təkcə bir rayonun deyil, bütöv Azərbaycanın azadlıq salnaməsində yeni bir səhifə idi.

İllərlə işğal altında qalan Qubadlı, öz tarixi, təbiəti, igid insanları ilə xalqımızın qəlbində daim yaşayırdı. Qubadlılılar doğma yurdlarına qayıdacağı günü səbirsizliklə gözləyirdilər. Vətən müharibəsində əldə olunan Qələbə sayəsində bu arzu gerçəyə çevrildi. Şəhidlərimizin qanı, qazilərimizin igidliyi, xalqın birliyi və ordumuzun gücü bu torpaqlarda azadlıq bayrağını yenidən dalğalandırdı.

İşğaldan azad olunduqdan sonra Prezident İlham Əliyev Qubadlıya bir neçə dəfə səfər edib. Dövlət başçısı şəhərdə və rayon ərazisində görülən işlərlə, bərpa və yenidənqurma layihələri ilə tanış olub. Onun iştirakı ilə müxtəlif təməlqoyma mərasimləri keçirilib, yeni yolların, yaşayış evlərinin, sosial və iqtisadi infrastrukturun bərpasına start verilib. Qubadlıda yeni məktəblərin, xəstəxanaların, mədəniyyət ocaqlarının tikintisi, kəndlərin bərpası bu torpaqlara həyatın yenidən qayıtdığını göstərir.

Prezident İlham Əliyev “Qubadlı şəhəri günü”nün qeyd olunması ilə bağlı da xüsusi sərəncam imzalayıb. Bu sərəncam həmin tarixi günün əhəmiyyətini dövlət səviyyəsində təsdiqləyir və xalqımızın qəhrəmanlıq salnaməsinin rəmzinə çevrilir. Eyni zamanda, Qubadlı rayonunun azad edilməsində fərqlənən bir çox hərbçilərimiz medallarla və fəxri adlarla təltif olunublar. Bu mükafatlar həm onların şəxsi igidliyinə, həm də Vətənə olan sədaqətlərinə verilən yüksək qiymətdir.

Bu gün Qubadlı dirçəliş və inkişaf mərhələsindədir. Azad edilən digər bölgələr kimi, burada da “Böyük Qayıdış” proqramı çərçivəsində geniş tikinti və abadlıq işləri görülür. Qubadlı artıq təkcə bir coğrafi məkan deyil, həm də milli iradənin, vətən sevgisinin və qələbə ruhunun simvoluna çevrilib.

“Qubadlı şəhəri günü” Azərbaycan xalqının birliyinin, ordumuzun şücaətinin və dövlətimizin gücünün təntənəsidir. Bu gün biz şəhidlərimizin müqəddəs xatirəsini ehtiramla yad edir, qazilərimizə minnətdarlıq bildiririk. Qubadlının azadlığı, onun yenidən dirçəlişi hər bir azərbaycanlının qəlbində qürur hissi doğurur və gələcək nəsillərə vətənpərvərlik nümunəsi kimi çatdırılır.

Sahib Şükürov

YAP Göyçay rayon təşkilatının sədri

Paylaş:

Baxılıb: 469 dəfə