Dövrümüzün ən mütərəqqi Konstitusiyası- Ana qanunumuz TƏHLİL

Bakı:

30 °C

39 %

4 m/s

Əlaqə

AZ RU EN

Ana səhifə / YAP xəbərləri / Dövrümüzün ən mütərəqqi Konstitusiyası- Ana qanunumuz TƏHLİL

Dövrümüzün ən mütərəqqi Konstitusiyası- Ana qanunumuz TƏHLİL

12.11.2025 [17:28]

Azərbaycan Respublikasının Konstitusiyası müasir dövlətçiliyimizin əsas qanunu olmaqla, xalqımızın siyasi iradəsini, milli dəyərlərini və dövlətin inkişaf istiqamətlərini özündə əks etdirən mühüm sənəddir. Ulu Öndər Heydər Əliyevin dərin zəkası və uzaqgörən siyasəti nəticəsində hazırlanmış bu Konstitusiya, ümumbəşəri dəyərlərlə milli ənənələrin vəhdətini təmin etmiş, hüquqi dövlət və vətəndaş cəmiyyəti quruculuğunun möhkəm hüquqi bazasını yaratmışdır.

“Xalqımızın Ümummilli Lideri, müasir Azərbaycan dövlətinin qurucusu Heydər Əliyevin bilavasitə rəhbərliyi ilə hazırlanmış Konstitusiya müasir dünyanın sivil dəyərləri və qanun yaradıcılığı təcrübəsinə, xalqımızın çoxəsrlik dövlətçilik ənənələrinə, milli və ümumbəşəri prinsiplərə söykənərək demokratik, hüquqi, dünyəvi dövlət quruculuğu üçün möhkəm təməl yaratmışdır.”

Azərbaycan Respublikasının Prezidenti İlham Əliyev

Azərbaycan Respublikasının Konstitusiyası dövlətimizin siyasi, iqtisadi və hüquqi sisteminin inkişafında dönüş nöqtəsi olmuşdur. Ulu Öndər Heydər Əliyevin rəhbərliyi ilə hazırlanan bu mühüm sənəd, müasir beynəlxalq hüquq prinsipləri ilə milli dövlətçilik təcrübəsini birləşdirərək, demokratik, hüquqi və dünyəvi dövlətin əsaslarını təsbit etmişdir. Konstitusiyanın qəbulundan sonra ölkəmizdə hüquqi islahatlar sistemli şəkildə həyata keçirilmiş, insan və vətəndaş hüquq və azadlıqlarının təminatı dövlət siyasətinin prioritet istiqamətlərindən birinə çevrilmişdir.

1995-ci il noyabrın 12-də ümumxalq səsverməsi yolu ilə qəbul edilən Konstitusiya, Azərbaycan dövlətçiliyinin inkişafında yeni mərhələnin başlanğıcını qoydu. Bu sənəd xalqın suverenliyinin, dövlət müstəqilliyinin və demokratik prinsiplərin qorunmasının əsas hüquqi təminatına çevrildi. Konstitusiyanın qəbulu ilə Azərbaycan Respublikasında hakimiyyətin bölünməsi prinsipi, insan hüquqlarının üstünlüyü, çoxpartiyalı siyasi sistem və iqtisadi azadlıqlar kimi mühüm prinsiplər konstitusion səviyyədə təsbit olundu.

Müstəqil Azərbaycan Respublikasının Konstitusiyasının qəbuluna qədər ölkəmiz 1978-ci ildə qəbul edilmiş Azərbaycan SSR Konstitusiyası ilə idarə olunurdu. Lakin sovet dövrü qanunvericilik sistemi müstəqil dövlət quruculuğunun tələblərinə cavab vermirdi. Yeni dövrün çağırışları, milli dövlətin formalaşması və suveren hüquqların bərpası 1995-ci ildə tamamilə yeni, müasir və milli Konstitusiyanın qəbulunu zəruri etmişdi.

Azərbaycan Respublikasının Konstitusiyasının hazırlanması və qəbul prosesi Ulu Öndər Heydər Əliyevin dövlət quruculuğu sahəsindəki ən mühüm nailiyyətlərindən biridir. O, bu prosesə bilavasitə rəhbərlik edərək, sənədin həm hüquqi, həm də ideoloji əsaslarını formalaşdırmışdır. Heydər Əliyevin rəhbərliyi ilə qəbul olunan Konstitusiya müstəqil Azərbaycanın gələcək inkişaf strategiyasını müəyyən etmiş, dövlətin hüquqi, siyasi və sosial sisteminin bünövrəsini qoymuşdur.

Azərbaycan Respublikasının Konstitusiyası dövlətin strateji fəaliyyət istiqamətlərini müəyyənləşdirir. Dövlətin ali məqsədi insan və vətəndaş hüquqlarının qorunması, xalqın rifahının yüksəldilməsi, ədalətli və demokratik idarəetmə sisteminin möhkəmləndirilməsidir. Konstitusiyanın müəyyən etdiyi prinsiplərə uyğun olaraq, dövlət siyasəti milli təhlükəsizliyin təmininə, iqtisadi inkişafın davamlılığına, sosial ədalətə, hüququn aliliyinə və vətəndaş həmrəyliyinə yönəlmişdir.

2025-ci ildə Azərbaycan Respublikasının Konstitusiyasının qəbulundan 30 il ötür. Bu münasibətlə “Azərbaycan Respublikası Konstitusiyasının 30 illiyi (1995–2025)” yubiley medalı təsis edilmişdir. Bu medal Konstitusiyanın qəbulunda, onun prinsiplərinin həyata keçirilməsində, hüquqi dövlət və vətəndaş cəmiyyəti quruculuğunda xüsusi xidmətləri olan şəxslərin əməyinə verilən yüksək dövlət qiymətidir. Yubiley medalı həm də dövlətimizin hüquqi və siyasi inkişaf yolunda keçdiyi şərəfli tarixi mərhələnin rəmzidir.

Azərbaycan Respublikasının Konstitusiyası müstəqil dövlətimizin hüquqi dayağı, xalqın azad iradəsinin ifadəsi və milli inkişafın təminatçısıdır. Ulu Öndər Heydər Əliyevin müəllifi olduğu bu sənəd müasir Azərbaycanın sabit, demokratik və hüquqi dövlət kimi inkişafının əsasını təşkil edir.

Kənan Quliyev
YAP Laçın rayon təşkilatının məsləhətçisi

Paylaş:

Baxılıb: 447 dəfə