Azərbaycan siyasətində yeni dövrün başlanğıcı

Bakı:

30 °C

39 %

4 m/s

Əlaqə

AZ RU EN

Ana səhifə / YAP xəbərləri / Azərbaycan siyasətində yeni dövrün başlanğıcı

Azərbaycan siyasətində yeni dövrün başlanğıcı

20.11.2025 [16:21]

İlqar İlyasov

YAP Laçın rayon təşkilatının sədri

1992-ci il 21 noyabr tarixində Yeni Azərbaycan Partiyasının təsis konfransı müstəqil Azərbaycanın siyasi tarixində yeni bir mərhələnin başlanğıcı olmuşdur. YAP-ın yaranması ölkənin çətin və taleyüklü dövründə dövlətçilik ideyalarının qorunması, siyasi sabitliyin bərpası və gələcək inkişaf strategiyasının müəyyənləşdirilməsi baxımından həlledici rol oynamışdır. Bu siyasi təşkilat, Ulu Öndər Heydər Əliyevin rəhbərliyi və uzaqgörən siyasi xətti əsasında qısa müddətdə Azərbaycanın dövlət idarəçiliyində mühüm mövqeyə sahib olmuş, cəmiyyətin bütün təbəqələrini ətrafında birləşdirən aparıcı qüvvəyə çevrilmişdir. Yeni Azərbaycan Partiyasının dövlətçilik ənənələrinin davam etdirilməsi isə 2003-cü ildən etibarən Prezident İlham Əliyevin rəhbərliyi ilə yeni və daha dinamik mərhələyə qədəm qoydu. İlham Əliyevin Heydər Əliyev yoluna sədaqətlə bağlılığı, müasir idarəetmə təcrübəsi və siyasi iradəsi, YAP-ın ölkənin inkişaf strategiyasını uğurla davam etdirməsinə şərait yaratdı. Onun rəhbərliyi dövründə Azərbaycan regional və qlobal miqyasda öz mövqeyini daha da gücləndirdi, iqtisadiyyat sürətlə inkişaf etdi, sosial rifah yüksəldi və ən əsası, ölkənin ərazi bütövlüyü bərpa edildi. İki əsrə yaxın müddətdə nəzarətdən kənarda qalan torpaqların azad edilməsi tarixi ədalətin bərpası olmaqla yanaşı, həm də Azərbaycanın dövlətçilik iradəsinin təntənəsi idi. Bu böyük Qələbənin əldə olunması, Prezident İlham Əliyevin qətiyyətli rəhbərliyi, güclü ordu quruculuğu siyasəti və xalq-iqtidar birliyinin nəticəsi kimi yadda qaldı. Məhz bu tarixi hadisədən sonra Yeni Azərbaycan Partiyası cəmiyyətdə “Zəfər partiyası” kimi dəyərləndirilir və dövlətin strateji hədəflərinin reallaşmasında əsas siyasi dayaqlardan biri olaraq çıxış edir. Müasir dövrdə YAP-ın fəaliyyəti Azərbaycanın dayanıqlı inkişafı, modern dövlət idarəçiliyinin formalaşdırılması, sosial rifahın yüksəldilməsi və beynəlxalq arenada nüfuzun daha da möhkəmləndirilməsi istiqamətində genişlənməkdədir. Partiya həm də post-müharibə dövrünün reallıqlarına uyğun olaraq ölkənin yeni inkişaf modelinin qurulmasında, Qarabağ və Şərqi Zəngəzurun bərpa və yenidən qurulmasında mühüm siyasi dəstək funksiyasını yerinə yetirir. YAP, milli həmrəyliyi gücləndirmək, dövlətçilik ideyalarını möhkəmləndirmək və cəmiyyətin bütün sahələrində islahatların davam etdirilməsinə dəstək göstərməklə, Azərbaycanın gələcək yüksəlişində əsas siyasi qüvvə kimi fəaliyyət göstərir. 1992-ci il 21 noyabrda əsası qoyulan Yeni Azərbaycan Partiyası bu gün həm tarixi missiyasını uğurla davam etdirir, həm də Azərbaycanın gələcək inkişaf hədəflərinin reallaşdırılmasında aparıcı rol oynayır. YAP-ın keçdiyi yol və müasir dövrdəki fəaliyyəti bir daha göstərir ki, bu siyasi təşkilat, həqiqətən də, dünənin təcrübəsini, bu günün dinamizmini və gələcəyin strateji hədəflərini özündə birləşdirən partiyadır.

Paylaş:

Baxılıb: 449 dəfə