Prezident İlham Əliyevin yerli televiziyalara müsahibəsi müasir Azərbaycan gerçəkliyinin siyasi uğurudur

Bakı:

23 °C

78 %

5 m/s

AZ RU EN

Ana səhifə / YAP xəbərləri / Prezident İlham Əliyevin yerli televiziyalara müsahibəsi müasir Azərbaycan gerçəkliyinin siyasi uğurudur

Prezident İlham Əliyevin yerli televiziyalara müsahibəsi müasir Azərbaycan gerçəkliyinin siyasi uğurudur

08.01.2026 [12:48]

Yanvarın 5-də Azərbaycan Respublikasının Prezidenti cənab İlham Əliyevin yerli televiziya kanallarına verdiyi geniş müsahibə təkcə ilin əvvəlində səsləndirilən mövqe deyil, müstəqil Azərbaycanın yeni mərhələdə özünü necə gördüyünün və necə təqdim etdiyinin siyasi xəritəsi idi. Bu müsahibə bir daha sübut etdi ki, Azərbaycan dövləti artıq hadisələrin arxasınca qaçan yox, prosesləri formalaşdıran, gündəmi müəyyən edən güc mərkəzinə çevrilib. Bu müsahibədə Prezident İlham Əliyev keçmişin dərslərini, bu günün reallıqlarını və gələcəyin konturlarını vahid dövlət məntiqi çərçivəsində birləşdirərək, həm cəmiyyətə açıq hesabat verdi, həm də beynəlxalq auditoriyaya ünvanlanmış çoxqatlı mesajlar səsləndirdi.

Cənab Prezidentin müsahibəsində Qarabağ mövzusu artıq münaqişə prizmasından deyil, qələbədən sonrakı quruculuq və suverenliyin tam bərpası mərhələsi kimi təqdim olundu. Bu, özü-özlüyündə mühüm siyasi göstəricidir. Çünki Azərbaycan üçün Qarabağ məsələsi bağlanmış hərbi-siyasi səhifə, açılmış dövlət quruculuğu və milli dirçəliş mərhələsidir. Cənab Prezident İlham Əliyevin mövqeyi qətidir: Qarabağda heç bir “xüsusi status”, heç bir “keçid dövrü”, heç bir “boz zona” mövcud deyil. Orada Azərbaycan Konstitusiyası işləyir, Azərbaycan qanunları tətbiq olunur və Azərbaycan bayrağı dalğalanır. Bu, təkcə hüquqi yox, geosiyasi həqiqətin qəbul etdirilməsi deməkdir. Müsahibədə Böyük Qayıdış proqramı humanitar layihə kimi deyil, strateji dövlət siyasəti kimi təqdim olundu. Cənab Prezident İlham Əliyev açıq şəkildə göstərdi ki, azad edilmiş ərazilərə qayıdış təsadüfi proses deyil-bu, planlı, mərhələli və təhlükəsizlik, infrastruktur, sosial rifah prinsiplərinə söykənən milli missiyadır. Burada diqqətçəkən əsas məqam ondan ibarətdir ki, dövlət yalnız ev tikmir, yaşayış fəlsəfəsi qurur. Ağıllı şəhərlər, müasir kəndlər, sosial obyektlər, yollar, enerji infrastrukturu-bütün bunlar Böyük Qayıdışı sadəcə nostalji qayıdışdan çıxarıb, dövlət-vətəndaş münasibətlərinin yeni modelinə çevirir. Cənab Prezident İlham Əliyevin müsahibəsində Zəngəzur dəhlizi məsələsi xüsusi strateji çəkiyə malik idi. Dövlət başçısının mesajı birmənalıdır: bu dəhliz açılacaq. Adı dəyişə bilər, formatı dəqiqləşə bilər, amma mahiyyəti dəyişməzdir. Çünki Zəngəzur dəhlizi artıq təkcə Azərbaycan layihəsi deyil — Avrasiya miqyaslı nəqliyyat və logistika xəttidir. Bu yol Türk dünyasını birləşdirir, Şərqlə Qərbi qovuşdurur və Cənubi Qafqazı geosiyasi çıxılmazlıqdan çıxarıb əməkdaşlıq məkanına çevirir. Ermənistan üçün bu layihə seçim anıdır: ya regionun iqtisadi xəritəsinə daxil olmaq, ya da özünü daha dərin təcridə məhkum etmək.

Müsahibədə xüsusi incəliklə toxunulan mövzulardan biri də Azərbaycanın Qərb və Rusiya ilə münasibətlərində qoruduğu strateji balans siyasəti idi. Cənab Prezident İlham Əliyev bir daha nümayiş etdirdi ki, Azərbaycan nə Qərbin forpostudur, nə də Rusiyanın orbitindədir. Azərbaycan öz orbitinə malik dövlətdir. Bu balans siyasəti nə kompromis zəifliyi, nə də tərəddüddür. Əksinə, bu, güclü dövlətin seçim azadlığıdır. Cənab Prezidentin mövqeyi aydındır: əməkdaşlıq qarşılıqlı hörmətə əsaslanmalıdır, təzyiq dili isə qəbulolunmazdır. Bu prinsipial yanaşma Azərbaycanın beynəlxalq nüfuzunu artıran əsas amillərdən biridir. Prezident İlham Əliyevin müsahibəsinin ümumi ruhu bir həqiqəti ortaya qoydu: Azərbaycan sözlə yox, əməl ilə danışan dövlətdir. Qarabağda qurulan şəhərlər, qayıdan insanlar, açılan yollar, reallaşan layihələr dövlət sözünün konkret nəticələridir. Bu baxımdan, müsahibə siyasi bəyanatların toplusu deyil, reallaşmış dövlət siyasətinin şərhi idi. Cənab Prezident populizmdən uzaq, lakin milli ruhu yüksək olan nitqi ilə həm cəmiyyətə güvən verdi, həm də beynəlxalq aləmə mesaj göndərdi: Azərbaycanla yalnız bərabərhüquqlu tərəfdaş kimi danışmaq olar. Beləliklə Yanvarın 5-də səslənən fikirlər efir vaxtı ilə məhdudlaşmadı. Bu müsahibə Azərbaycanın yaxın onilliklər üçün siyasi xəritəsini cızan strateji sənəd funksiyasını daşıyır. Burada keçmişin dərsləri, bu günün qətiyyəti və gələcəyin inamı vahid dövlət məntiqində birləşdi.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 728 dəfə