Humanist liderliyə beynəlxalq ehtiram

Bakı:

27 °C

48 %

6 m/s

Əlaqə

AZ RU EN

Ana səhifə / YAP xəbərləri / Humanist liderliyə beynəlxalq ehtiram

Humanist liderliyə beynəlxalq ehtiram

06.02.2026 [22:39]

Prezident İlham Əliyevin Birləşmiş Ərəb Əmirliklərinin paytaxtı Əbu Dabidə nüfuzlu “Zayed İnsan Qardaşlığı Mükafatı ”na layiq görülməsi Azərbaycanın həyata keçirdiyi humanist, sülhpərvər və tolerant siyasətin beynəlxalq səviyyədə yüksək qiymətləndirilməsinin bariz nümunəsidir.Bu mükafat təkcə dövlət başçısının deyil, eyni zamanda Azərbaycanın ümumbəşəri dəyərlərə söykənən dövlət siyasətinə verilən etimadın ifadəsidir.

Prezident İlham Əliyevin “Zayed İnsan Qardaşlığı Mükafatı ”nı qəbul edərkən səsləndirdiyi və ABŞ Prezidenti Donald Trampın Azərbaycan-Ermənistan sülh prosesinə verdiyi töhfəni xüsusi vurğulayan fikirləri həm regional, həm də qlobal miqyasda mühüm siyasi məna daşıyır. Bu çıxış təkcə təşəkkür ifadəsi deyil, eyni zamanda 30 ildən artıq davam etmiş qanlı münaqişənin başa çatmasını təsdiqləyən tarixi reallığın beynəlxalq ictimaiyyətə təqdimidir.

Prezident İlham Əliyevin çıxışında ABŞ Prezidenti Donald Trampa minnətdarlıq etməsi sülh prosesinin beynəlxalq legitimliyini ön plana çıxarır.2025-ci il avqustun 8-də keçirilmiş üçtərəfli zirvə görüşünə ABŞ Prezidentinin ev sahibliyi etməsi göstərdi ki, Azərbaycan-Ermənistan sülhü artıq regional çərçivəni aşaraq qlobal diqqət mərkəzinə çevrilmişdir.

Çıxışda xüsusi vurğulanan məqamlardan biri sülh sazişinin paraflanması və birgə bəyənnamənin imzalanmasıdır.Bu fakt sülhün yalnız niyyət səviyyəsində qalmadığını, konkret siyasi və hüquqi çərçivəyə salındığını göstərir. Prezident İlham Əliyevin bu məqamı qeyd etməsi Azərbaycanın sülh prosesində əsas təşəbbüskar və məsuliyyətli tərəf olduğunu bir daha nümayiş etdirir.

Dövlət başçısının “üç onillikdən artıq davam edən qanlı və ölümcül münaqişəyə son qoyulmuşdur” fikri tarixi bir yekun kimi səslənir.Bu ifadə təkcə keçmişə verilən qiymət deyil, eyni zamanda gələcəyə yönəlmiş siyasi mesajdır. Azərbaycan bu çıxışla dünyaya açıq şəkildə bəyan edir ki, müharibə mərhələsi geridə qalıb və region yeni inkişaf, əməkdaşlıq və təhlükəsizlik mərhələsinə qədəm qoyur.

Nəticə etibarilə, Prezident İlham Əliyevin mükafat mərasimində səsləndirdiyi fikirlər Azərbaycanın sülh siyasətinin beynəlxalq miqyasda qəbul olunduğunu, qlobal aktorların bu prosesdə rol oynadığını və Cənubi Qafqazda yeni siyasi reallıqların formalaşdığını təsdiqləyir. Bu çıxış həm qalib dövlətin liderinin məsuliyyətli mövqeyini, həm də Azərbaycanın insan qardaşlığına və davamlı sülhə sadiqüliyini əks etdirir.

Prezident İlham Əliyevin Əbu Dabidə nüfuzlu “Zayed İnsan Qardaşlığı Mükafatı” ilə təltif olunması Azərbaycanın sülhə,tolerantlığa və insan qardaşlığına əsaslanan siyasətinin beynəlxalq miqyasda yüksək dəyərləndirilməsidir. Bu hadisə ölkəmizin humanist dəyərlərə sadiq yolunun doğru və davamlı olduğunu təsdiqləyən mühüm beynəlxalq mesajdır.

Sevinc Xəlilova

YAP Samux rayon təşkilatının sədr müavini

Paylaş:

Baxılıb: 785 dəfə