44 günün Zəfəri və ədalətin təntənəsi

Bakı:

14 °C

67 %

3 m/s

Əlaqə

AZ RU EN

Ana səhifə / YAP xəbərləri / 44 günün Zəfəri və ədalətin təntənəsi

44 günün Zəfəri və ədalətin təntənəsi

27.02.2026 [20:22]

26 fevral tarixində Xocalı Memorial Kompleksinin açılış mərasimində Prezident İlham Əliyevin səsləndirdiyi fikirlər təkcə bir anım nitqi deyildi. Həmin gün Xocalıda tarix danışdı, ədalət danışdı, qürur danışdı. Çıxış edən İlham Əliyev isə bu tarixi məqamı həm emosional, həm də siyasi baxımdan ümumiləşdirən lider kimi çıxış etdi.

Prezident açıq və qəti şəkildə bildirdi: “Cəmi 44 gün ərzində düşməni məğlubiyyətə uğratdıq, düşmən təslim oldu, kapitulyasiya aktına imza atdı və biz müharibəni dayandırdıq.” Bu fikir sadəcə hərbi faktın xatırladılması deyil, yeni reallığın fəlsəfi izahıdır. Çünki məhz 44 günlük Vətən müharibəsində qazanılmış Qələbə nəticəsində Xocalıda bu gün memorial kompleks ucalır, Azərbaycan bayrağı dalğalanır və anım mərasimi öz torpağımızda keçirilir.

Bu Zəfər təkcə ərazi bütövlüyünün bərpası deyildi. Bu, illərlə gözlənilən tarixi ədalətin təmin olunması idi. Xocalı faciəsinin baş verdiyi məkanda memorial kompleksin açılması göstərdi ki, zaman keçsə də, ədalət unudulmur və gec-tez öz yerini tapır.

Prezident İlham Əliyev çıxışında başqa bir mühüm məqama da toxundu: “Ermənistandan fərqli olaraq günahsız, əliyalın mülkü əhaliyə qarşı heç vaxt müharibə aparmamışıq və bu, bizim xalqımızı daha da ucaltdı.” Bu sözlər Azərbaycan dövlətinin və xalqının mənəvi üstünlüyünü ifadə edir. 44 günlük müharibə təkcə hərbi meydanda deyil, həm də əxlaq müstəvisində qazanılmış Qələbə idi. Azərbaycan Ordusu yalnız hərbi hədəfləri vurdu, beynəlxalq hüquqa əməl etdi və mülki əhaliyə qarşı məqsədli hücumlar həyata keçirmədi. Bu fakt xalqımızın humanist dəyərlərə sadiqliyini bütün dünyaya göstərdi.

Xocalı Memorial Kompleksi bu gün həm faciənin xatirəsini yaşadır, həm də Qələbənin nəticəsini simvolizə edir. Burada ağrı ilə qürur yanaşı dayanır. Burada keçmişlə gələcək arasında körpü qurulur. Çünki dağıdılmış şəhərin dirçəlməsi, quruculuq işlərinin sürətlə aparılması göstərir ki, Azərbaycan yalnız müharibə aparan dövlət deyil - o, həm də sülh və quruculuq dövlətidir.

Memorial kompleksin açılışı həm də gələcək nəsillərə ünvanlanmış mesajdır. Bu məkan yalnız anım yeri deyil - milli yaddaşın qorunduğu, həqiqətlərin yaşadıldığı və dövlətçilik iradəsinin nümayiş olunduğu müqəddəs məkandır. Burada səslənən fikirlər göstərdi ki, Xocalı artıq yalnız faciə simvolu deyil, həm də dirçəlişin və qələbənin rəmzidir.

Sevinc Xəlilova

YAP Samux rayon təşkilatının sədr müavini

Paylaş:

Baxılıb: 462 dəfə