Xocalı Memorial Kompleksi qayıdışın zirvəsi və tarixin cavabdır

Bakı:

16 °C

94 %

2 m/s

Əlaqə

AZ RU EN

Ana səhifə / YAP xəbərləri / Xocalı Memorial Kompleksi qayıdışın zirvəsi və tarixin cavabdır

Xocalı Memorial Kompleksi qayıdışın zirvəsi və tarixin cavabdır

27.02.2026 [16:34]

Fevralın 26-sı Xocalıda zaman sanki dayanmışdı. Amma bu dayanma ümidsizliyin yox, tamamlanmanın anı idi. İllərlə içində daşıdığı ağrını səssizcə qoruyan bir şəhər həmin gün öz tarixinin yeni səhifəsini açdı. Azərbaycan Respublikasının Prezidenti cənab İlham Əliyev Xocalı Soyqırımı Memorial Kompleksinin açılışında çıxış edərkən təkcə keçmişdən danışmadı. O, bir yolun necə başa çatdığını, bir mübarizənin necə nəticələndiyini və bir xalqın necə ayaqda qaldığını ifadə etdi. Xocalı faciəsi illərlə Azərbaycanın milli yaddaşında yanğı kimi yaşadı. O gecə öldürülən uşaqların, anaların, qocaların taleyi heç vaxt unudulmadı. Hər il fevralın 26-sı anım günü idi. Lakin bu il fərqli idi. Bu dəfə Xocalı özü danışırdı. Azad torpaqda, öz səmasında, öz nəfəsi ilə. Cənab Prezident çıxışında hadisəni açıq şəkildə Ermənistan dövlətinin məsuliyyəti kimi təqdim etdi. Bu, diplomatik ehtiyatlılıqdan uzaq, qəti mövqedir. Bu mövqe illərlə aparılan hüquqi, siyasi və informasiya mübarizəsinin məntiqi davamıdır. Vaxtilə memorialın başqa məkanda ucaldılması planlaşdırılsa da, tarix başqa qərar verdi. Abidə məhz Xocalının özündə yüksəldi. Bu seçim təsadüfi deyil. Bu, inamın gerçəkləşməsidir. İnam torpağın geri qayıdacağına, ədalətin gec də olsa zəfər çalacağına, Azərbaycanın güclənəcəyinə idi. Bu gün həmin inamın nəticəsi göz önündədir. Xocalı həqiqətlərinin dünyaya çatdırılması asan başa gəlmədi. Beynəlxalq meydanlarda aparılan mübarizə, müxtəlif ölkələrdə keçirilən tədbirlər, nəşrlər, çağırışlar uzun bir yolun mərhələləri idi. Bu prosesdə Heydər Əliyev Fondu və “Xocalıya ədalət!” təşəbbüsü mühüm rol oynadı. Fondun vitse-prezidenti Leyla Əliyevanin təşəbbüsləri nəticəsində Xocalı artıq təkcə Azərbaycanın yox, beynəlxalq ictimaiyyətin gündəmində olan mövzuya çevrildi. Bu mübarizə göstərdi ki, informasiya meydanı da cəbhədir.

Cənab Prezident çıxışında 44 günlük müharibəyə xüsusi yer ayırdı. Bu, sadəcə hərbi əməliyyat deyildi. Bu, uzun illərin hazırlığının sınaq anı idi. Güclü iqtisadiyyat, müasir silahlanma, diplomatik əlaqələr – bütün bunlar bir məqsədə xidmət edirdi: ərazi bütövlüyünün bərpasına. Cəmi 44 günə başa çatan müharibə regionun siyasi xəritəsini dəyişdi. Ardınca 2023-cü ildə keçirilən qısa müddətli əməliyyatla suverenlik tam təmin olundu. Separatizm tarixə qovuşdu. Cənab Prezidentin çıxışında səslənən mesajlardan biri də gələcəyə yönəlmiş xəbərdarlıq idi: Azərbaycan artıq zəif dövlət deyil. Bu gün ölkə özünü müdafiə etməyə qadirdir və milli maraqlarından geri çəkilməyəcək. Amma bu güc aqressiya deyil. Bu güc məsuliyyətdir. Dövlət başçısının vurğuladığı kimi, müharibə müharibə qaydaları ilə aparıldı. Mülki əhaliyə qarşı əməliyyat aparılmadı. Bu prinsipial mövqe Azərbaycanın mənəvi üstünlüyünü daha da möhkəmləndirdi. Memorialın açılışında iştirak edən Xocalı sakinlərinin simasında bir xalqın dözümlülüyü görünürdü. Onlar doğmalarını itirdilər, illərlə köçkün həyatı yaşadılar. Amma inamlarını itirmədilər. Bu inam dövlətə, orduya və ədalətə idi. Bu gün ucalan memorial təkcə şəhidlərin xatirəsinə ehtiram deyil. O, həm də səbrin, iradənin və birliyin daşlaşmış ifadəsidir. Cənab Prezident çıxışında onu da qeyd etdi ki, müharibə cinayətkarlarının məhkəmə qarşısına çıxarılması ədalətin son mərhələsi idi. Bu, həm hərbi, həm hüquqi, həm də mənəvi qələbənin tamamlanması deməkdir.

Dünyada nadir hallarda bir dövlət həm müharibədə qəti zəfər qazanır, həm də suverenliyini tam bərpa edir və məsul şəxsləri ədalət qarşısına çıxarır. Azərbaycan bunu bacardı. Xocalı artıq yalnız bir faciənin adı deyil. O, bir xalqın sınmadığını sübut edən rəmzdir. O, torpağın, yaddaşın və ədalətin qovuşduğu nöqtədir. Fevralın 26-sı Xocalıda açılan Memorial Kompleks təkcə keçmişi anmır. O, gələcəyə mesaj verir: Azərbaycan öz tarixini unutmur. Azərbaycan öz haqqını müdafiə edi və .Azərbaycan öz taleyini özü yazır.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 300 dəfə