Azərbaycan - Ukrayna tərəfdaşlığı yeni mərhələdə

Bakı:

26 °C

38 %

1 m/s

Əlaqə

AZ RU EN

Ana səhifə / YAP xəbərləri / Azərbaycan - Ukrayna tərəfdaşlığı yeni mərhələdə

Azərbaycan - Ukrayna tərəfdaşlığı yeni mərhələdə

27.04.2026 [16:38]

Azərbaycan Prezidenti İlham Əliyev ilə Ukrayna Prezidenti Volodimir Zelenski arasında keçirilən son görüş bir daha göstərdi ki, Azərbaycan–Ukrayna münasibətləri artıq sadəcə diplomatik çərçivəni aşaraq strateji tərəfdaşlıq səviyyəsində möhkəmlənərək yeni mərhələyə qədəm qoyur.

2026-cı il aprelin 25-də Bakıda mətbuata verilən bəyanatda Prezident İlham Əliyev qeyd etdi ki, dövlət başçıları arasında təmaslar müntəzəm xarakter alıb. Son dörd ildə yeddi dəfə görüşən liderlərin dialoqu, əslində, iki ölkə arasında formalaşmış etimad mühitinin aydın göstəricisidir. Bu münasibətlərin təməli isə 2019-cu ildə Prezident Zelenskinin Azərbaycana ilk səfəri zamanı qoyulub və ötən müddətdə daha da güclənib. Bəyanat iki ölkənin arasında münasibətlərin yüksək səviyyədə olduğunu bird aha nümayiş etdirir.

Ukrayna ilə Azərbaycanın əməkdaşlığı möhkəm siyasi əsaslara söykənir. Kiyev və Bakıda imzalanmış strateji tərəfdaşlıq sənədləri ölkələrin bir-birinin suverenliyinə, ərazi bütövlüyünə və sərhədlərinin toxunulmazlığına verdiyi dəstəyi açıq şəkildə təsbit edir. Bu prinsipial mövqe beynəlxalq platformalarda da ardıcıl şəkildə davam etdirilir. Ölkə başçısının vurğuladığ kimi, Azərbaycan və Ukrayna arasındakı əməkdaşlığın çox güclü siyasi təməli mövcuddur.

Əlaqələrin mühüm istiqamətlərindən biri iqtisadiyyat və energetikadır. Xüsusilə SOCAR-ın Ukraynada uzun illərdir uğurla fəaliyyət göstərməsi tərəfdaşlığın real nəticələrindən xəbər verir. Bu sahədə əldə olunan nailiyyətlərlə yanaşı, yeni investisiya layihələri və təşəbbüslər üçün də geniş imkanlar mövcuddur. Artıq yarım milyard dolları keçən ticarət dövriyyəsinin gələcəkdə daha da artacağına inam böyükdür.

Hərbi-texniki sahədə əməkdaşlıq da bəyənnamədə mühüm məsələlərdən biridir. Həm Azərbaycanda, həm də Ukraynada müdafiə sənayesinin inkişafı birgə istehsal və yeni sənaye layihələri üçün əlverişli zəmin yaradır. Bu istiqamətdə aparılan müzakirələr qarşılıqlı marağın və perspektivin yüksək olduğunu göstərir.

Bu gün Azərbaycan və Ukrayna arasında humanitar yardım və mədəni əlaqələr hərtərəfli inkişaf edir, xalqlar arasında tarixi dostluq əlaqələri, ortaq dəyərlər bu münasibətləri daha da möhkəmləndirir. Təhsil, mədəniyyət və digər sahələrdə həyata keçirilən layihələr xalqlarımız arasında əlaqələrin, əməkdaşlığın inkişafına töhfə verir. Bütün bunların fonunda aydın görünür ki, Azərbaycan–Ukrayna münasibətləri qarşılıqlı hörmət və etimada əsaslanır. Prezident İlham Əliyev qeyd etdi ki, bu səfər iki ölkə arasında dostluq əlaqələrinin daha da möhkəmlənməsinə və əməkdaşlığın yeni mərhələyə keçməsinə mühüm təkan verəcək.

Elşad Cəfərov YAP Culfa rayon təşkilatının məsləhətçisi

Paylaş:

Baxılıb: 327 dəfə